ମାଲକାନଗିରି,୧୮ା୧(ଦୁର୍ଯ୍ୟୋଧନ ପାତ୍ର)- ମାଲକାନଗିରିରୁ ବିଶାଖାପାଟଣାସ୍ଥିତ ଅନିଲ ନିରୁକୋଣ୍ଡା ହସ୍ପିଟାଲରେ ଚିକିତ୍ସା ପାଇଁ ରୋଗୀଙ୍କୁ ନେଇ ଯାଉଥିବା ଏକ ବସ୍ ଶନିବାର ଦୁର୍ଘଟଣାଗ୍ରସ୍ତ ହୋଇଛି। ଏହି ବସ୍ଟି ରାସ୍ତାରେ ଖରାପ ହୋଇ ଛିଡ଼ାହୋଇଥିବା ଏକ ଟ୍ରକ୍କୁ ଧକ୍କାଦେବା ଫଳରେ ଘଟଣାସ୍ଥଳରେ ବାପଝିଅଙ୍କର ମୃତ୍ୟୁ ଘଟିଛି। ମୃତକ ହେଲେ ମାଲକାନଗିରି ଜିଲା ପଡ଼ିଆ ଥାନା ଏମ୍ଭି ୫୮ ଗ୍ରାମର ସୁବ୍ରତ ରାୟ ଏବଂ ତାଙ୍କ ସାନ ଝିଅ। ଏହା ସହ ୨୦ରୁ ଊର୍ଦ୍ଧ୍ୱ ଆହତ ହୋଇଛନ୍ତି। ମୃତ ସୁବ୍ରତ ଏମ୍ଭି ୫୮ ଭାଜପା ଗ୍ରାମ ବୁଥ୍ ସଭାପତି ସହ ପଡ଼ିଆ ମଣ୍ଡଳ ଭାଜପା ଯୁବନେତା ଥିଲେ।
ସୂଚନାଯୋଗ୍ୟ, ଆନ୍ଧ୍ରପ୍ରଦେଶର ବିଜୟନଗରମ୍ ଜିଲା ଗଜପତିନଗର ଥାନା ମଧୁପଦାଠାରେ ବସ୍ଟି ଏକ ଟ୍ରକ୍ ସହ ଧକ୍କାହୋଇ ଦୁର୍ଘଟଣାଗ୍ରସ୍ତ ହୋଇଥିଲା। ବସ୍ରେ ମାଲକାନଗିରି ଜିଲାର ବିଭିନ୍ନ ଅଞ୍ଚଳରୁ ପ୍ରାୟ ୩୦ ରୋଗୀ ବିଶାଖାପାଟଣା ଚିକିତ୍ସା ହେବା ପାଇଁ ଯାଉଥିଲେ। କୁହୁଡ଼ି ଯୋଗୁ ବସ୍ ଚାଳକ ଛିଡ଼ାହୋଇଥିବା ଟ୍ରକ୍କୁ ଦେଖି ନ ପାରି ଧକ୍କାଦେଇଥିଲେ। ସ୍ଥାନୀୟ ଲୋକ ଏବଂ ପୋଲିସ ସହଯୋଗରେ ଆହତମାନଙ୍କୁ ଚିକିତ୍ସା ପାଇଁ ନିଆଯାଇଥିବା ବେଳେ ମୃତଦେହ ବ୍ୟବଚ୍ଛେଦ ପାଇଁ ପଠାଯାଇଛି।
