ବାରିପଦା ଅଫିସ, ୩୦ା୭-ଶିମିଳିପାଳରୁ ବାହାରିଥିବା ବୁଢ଼ାବଳଙ୍ଗ ନଦୀ ମୟୂରଭଞ୍ଜ ଜିଲା ସଦର ମହକୁମା ଦେଇ ପ୍ରବାହିତ ହେଉଛି। ଏହି ନଦୀ ଅବବାହିକାରେ ଅବସ୍ଥିତ ଅନେକ ଗଁାଗଣ୍ଡା ବନ୍ୟା ସମୟରେ ପ୍ରଭାବିତ ହୋଇଆସୁଛି। ସଦର ମହକୁମାରୁ ୧୦କି.ମି. ଦୂରରେ ଥିବା ଗଁାଗୁଡ଼ିକ ଏବେ ନଦୀଗର୍ଭରେ ଲୀନହେବାକୁ ବସିଛି। ବନ୍ୟାଜଳ ଅତଡ଼ା ଖାଇବା ଦ୍ୱାରା ବହୁ ଚାଷଜମି ନଦୀରେ ମିଶିଯାଇଛି। ବିପଜ୍ଜନକ ପରିସ୍ଥିତିରେ ଅଞ୍ଚଳବାସୀ ରହୁଥିବା ବେଳେ ନଦୀକୂଳରେ ପଥରପ୍ୟାକିଂ କରାଯାଉ ନ ଥିବାରୁ ବୁଢାବଳଙ୍ଗ ଗତିପଥ ବଦଳାଇ ଗଁାଆଡ଼କୁ ମାଡ଼ି ଆସୁଛି। ପ୍ରଶାସନିକ ସ୍ତରରେ ଏହାର ପ୍ରତିକାର ବ୍ୟବସ୍ଥା କରାଯାଉ ନ ଥିବାରୁ ଅଞ୍ଚଳବାସୀଙ୍କ ମଧ୍ୟରେ ଉଦ୍ବେଗ ପ୍ରକାଶ ପାଉଛି।
ଲଘୁଚାପଜନିତ ବର୍ଷା ଆରମ୍ଭ ହେଲେ ନଦୀକୂଳବାସୀଙ୍କ ଚିନ୍ତା ଦ୍ୱିଗୁଣିତ ହୋଇଥାଏ ା ଶିମିଳିପାଳରୁ ଉଦ୍ବୃତ୍ତ ବର୍ଷାଜଳ ବୁଢ଼ାବଳଙ୍ଗରେ ବନ୍ୟା ସ୍ଥିତି ସୃଷ୍ଟି କରିଥାଏ ା ଫଳରେ ବର୍ଷାଦିନେ ପ୍ରତ୍ୟେକ ବର୍ଷ ବନ୍ୟାଜଳ କୂଳ ଲଙ୍ଘନ କରିଥାଏ। ଏହି ସମୟରେ ନଦୀର ଉଭୟ ପାର୍ଶ୍ୱ ଅତଡ଼ା ଖସିବା ଦ୍ୱାରା ବନ୍ୟାଜଳ ପଶି ଗାଁ ଗଣ୍ଡାଗୁଡ଼ିକ ଜଳମଗ୍ନ ହୋଇଥାଏ। ବାରିପଦା ସଦର ବ୍ଲକ ହାତୀକୋଟ ପଞ୍ଚାୟତର ଯାମଦାପାଳ, କଞ୍ଚନପାଳ, ବାଲିପାଳ, କୁଣ୍ଡସାହି ଓ ମୁଗରାସାହି ଆଦି ୫ଟି ଗଁା ବର୍ତ୍ତମାନ ବିପଦସଙ୍କୁଳ ଅବସ୍ଥାରେ ରହିଛି। ଦୁର୍ବଳ ନଦୀବନ୍ଧ ଯୋଗୁ ଏସବୁ ଗ୍ରାମର ଲୋକେ ପ୍ରମାଦ ଗଣିବା ଆରମ୍ଭ କରିଛନ୍ତି। ପ୍ରତ୍ୟେକ ବର୍ଷ ବନ୍ୟାଜଳ ଅତଡ଼ା ଖାଇବା ସହିତ କୂଳ ଲଙ୍ଘି ଚାଷଜମି ଓ ଗଁାଗୁଡ଼ିକରେ ବ୍ୟାପକ କ୍ଷତି କରିଥାଏ। ନଦୀରେ ଆଡ଼ିବନ୍ଧ କିମ୍ବା ପଥର ପ୍ୟାକିଂ କରାଯାଉ ନ ଥିବାରୁ କିଛି ବର୍ଷ ମଧ୍ୟରେ ୫୦ଫୁଟରୁ ଅଧିକ ଜମି କୂଳ ଖାଇ ନଦୀରେ ମିଶିଯାଇଥିବା ଯାମଦାପାଳ ଗ୍ରାମର ହୃଷୀକେଶ ସେନାପତି, ସନ୍ତୋଷ ଭୂୟାଁ, ଦେବେନ ଘୋଷ କହିଛନ୍ତି। କେତେଜଣ ଦାୟିତ୍ୱହୀନ ଅଧିକାରୀ ଓ ଯନ୍ତ୍ରୀଙ୍କ ଅଣଦେଖା ପାଇଁ ନଦୀକୂଳବାସୀ ବିପଦସଙ୍କୁଳ ଅବସ୍ଥାରେ ଥିବା ବାଲିପାଳ ଗ୍ରାମର ଅଶୋକ ଘୋଷ, ସନ୍ତୋଷ ନାଏକ, ବସନ୍ତ ନାଏକ, ମୋହନ ସିଂ ଓ ପ୍ରଫୁଲ୍ଲ ବାରିକ ପ୍ରମୁଖ ପ୍ରକାଶ କରିଛନ୍ତି। ପଞ୍ଚାୟତବାସୀ ବାରମ୍ବାର ମୟୂରଭଞ୍ଜ ଜଳ ସମ୍ପଦ ବିଭାଗ ଅଧୀକ୍ଷଣ ଯନ୍ତ୍ରୀଙ୍କୁ ଅବଗତ କରାଇଥିଲେ ସୁଦ୍ଧା ବିଭାଗ ପକ୍ଷରୁ ପଥରପ୍ୟାକିଂ ପାଇଁ କୌଣସି ପଦକ୍ଷେପ ଗ୍ରହଣ କରାଯାଉନାହିଁ। ଯୁଦ୍ଧକାଳୀନ ଭିତ୍ତିରେ ଏଥିପ୍ରତି ଗୁରୁତ୍ୱ ଦିଆ ନ ଗଲେ ଆଗାମୀ ଦିନରେ ଏହି ଗ୍ରାମଗୁଡ଼ିକ ନଦୀ ଗର୍ଭରେ ଲୀନହେବା ଆଶଙ୍କାକୁ ଏଡ଼ାଇ ଦେଇହେବ ନାହିଁ। ଏ ସଂକ୍ରାନ୍ତରେ ମୟୂରଭଞ୍ଜ ଜଳସେଚନ ବିଭାଗ ନିର୍ବାହୀ ଯନ୍ତ୍ରୀ ଲୋକନାଥ ମହାନ୍ତିଙ୍କୁ ପଚାରିବାରୁ ସେ କହିଛନ୍ତି, ବାଲିପାଳ ଗ୍ରାମର ସୁରକ୍ଷା ନିମନ୍ତେ ନଦୀବନ୍ଧରେ ପଥର ପ୍ୟାକିଂ ପାଇଁ ୧୭ କୋଟି ଟଙ୍କାର ପ୍ରକଳ୍ପ ଅନୁମୋଦନ ଲାଗି ପଠାଯାଇଛି। ମଞ୍ଜୁରୀ ମିଳିଲେ କାମ ଆରମ୍ଭ ହେବ।
