ଗାଜିଆବାଦ, ୨୭।୭: ଉତ୍ତର ପ୍ରଦେଶର ଗାଜିଆବାଦରୁ ଚକିତ କଲା ଭଳି ଏକ ଖବର ଆସିଛି। ସୋମବାର ସକାଳେ ଗାଜିଆବାଦର ସାହିବାବାଦ୍ ଥାନା ଅଞ୍ଚଳରେ ଗୋଟିଏ ସୁଟ୍କେସ ମଧ୍ୟରୁ ଜଣେ ନବବିବାହିତ ଯୁବତୀଙ୍କ ଶବ ଉଦ୍ଧାର କରାଯାଇଛି। ଯାହାକୁ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି। ପୋଲିସ ପକ୍ଷରୁ କୁହାଯାଇଛି ଯେ ସକାଳେ ସ୍ଥାନୀୟ ଜିଟି ରୋଡସ୍ଥିତ ଦଶମେସ ଭାଟିକା ପାଖ ରାସ୍ତାରେ ଏକ ବ୍ରାଉନ ରଙ୍ଗର ସୁଟ୍କେସ ପଡ଼ିଥିଲା। ଏହି ସୁଟ୍କେସ ଚାରିପାଖରେ କୁକୁର ବୁଲୁଥିବାରୁ ସ୍ଥାନୀୟ ଲୋକଙଙ୍କ ମନରେ ସନ୍ଦେହଜାତ ହୋଇଥିଲା। ଏହାପରେ ସେମାନେ ସ୍ଥାନୀୟ ଥାନାକୁ ଏନେଇ ସୂଚନା ଦେଇଥିଲେ। ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚତ୍ ଯେତେବେଳେ ସୁଟ୍କେସ ଖୋଲିଥିଲା ସେତେବେଳେ ସେଠାରେ ଉପସ୍ଥିତ ଥିବା ଲୋକ ଚକିତ ହୋଇଯାଇଥିଲେ। ସୁଟ୍କେଶ ମଧ୍ୟରେ ଜଣେ ୨୩-୨୪ ବର୍ଷୀୟ ନବବିବାହିତ ଯୁବତୀଙ୍କ ଶବ ଦେଖିବାକୁ ମିଳିଥିଲା। ତାଙ୍କ ହାତ ଓ ଗୋଡ଼ ଚୁନିରେ ବନ୍ଧା ହୋଇଥିବାବେଳେ ତାଙ୍କ ଦେହରେ ଖଣ୍ଡିଆର ଚିହ୍ନ ରହିଥିଲା। ତେଣୁ ଯୁବତୀଙ୍କୁ ଅନ୍ୟତ୍ର କେଉଁଠାରେ ହତ୍ୟା କରାଯିବା ପରେ ସୁଟ୍କେସରେ ପୁରାଇ ସୋମବାର ଭୋର ସମୟରେ ଏଠାରେ ଆଣି ଫିଙ୍ଗି ଦିଆଯାଇଥିବା ପୋଲିସ ଅନୁମାନ କରୁଛି। ପୋଲିସ ସ୍ଥାନୀୟ ଅଞ୍ଚଳରେ ଲାଗିଥିବା ସିସିଟିଭି ଫୁଟେଜକୁ ଯାଞ୍ଚ କରି ତଦନ୍ତ ଆରମ୍ଭ କରିଛି।
