କଟକ ଅଫିସ,୨୫।୯: କଟକ ମୁଣ୍ଡୁଳି ଜଳ ସ୍ରୋତରେ ନିଖୋଜ ଥିବା ଓଡ୍ରାଫ କର୍ମଚାରୀ ସୀତାରାମ ମୁର୍ମୁଙ୍କ ମୃତଦେହ ଶନିବାର ଧବଳେଶ୍ୱରରୁ ଉଦ୍ଧାର ହୋଇଥିବା ନେଇ ଏସ୍ଆରସି ପ୍ରଦୀପ ଜେନା ସୂଚନା ଦେଇଥିଲେ। ସେ ଏହାର ଅଳ୍ପ ସମୟ ପରେ ପୁଣି ଏକ ଟୁଇଟ୍ କରିଥିଲେ ଯେଉଁଥିରେ ସେ ସ୍ପଷ୍ଟୀକରଣ କରିଥିଲେ ଯେ, ଏହା ସୀତାରାମଙ୍କ ମୃତଦେହ ନୁହେଁ। ଏହା ସହ ସେ ଦୁଃଖ ପ୍ରକାଶ କରିବା ସହିତ ମୋ କାର୍ଯ୍ୟାଳକୁ ଆସିଥିବା ତଥ୍ୟ ସମ୍ପୂର୍ଣ୍ଣ ଠିକ୍ ନୁହେଁ ବୋଲି କହିଛନ୍ତି। ଉକ୍ତ ମୃତଦେହଟି ପଚି ଯାଇଥିବା ବେଳେ ତାହାକୁ ସୀତାରାମଙ୍କ ପରିବାର ଓଡ୍ରାଫ ଟିମ ଚିହ୍ନଟ କରି ନ ଥିବା ଏସ୍ଆରସି କହିଛନ୍ତି। ଏଥିସହ ନିଖୋଜ ଯବାନ ସୀତାରାମ ମୁର୍ମୁଙ୍କର ସୂଚନା ମିଳିନି ବୋଲି ସେ ଟୁଇଟ କରିଛନ୍ତି।
ଏ ନେଇ ଏନଡିଆରଏଫ ଅଧିକାରୀ କହିଛନ୍ତି, ମୃତକଜଣକ ନିଖୋଜ ଓଡ୍ରାଫ ଟିମ ସଦସ୍ୟଙ୍କର ନୁହେଁ ବୋଲି ଓଡ୍ରାଫ ଟିମ ସ୍ପଷ୍ଟ କରିଛନ୍ତି। ମୃତଦେହକୁ କଟକ ସେକ୍ଟର-୧୧ ପୋଲିସକୁ ହସ୍ତାନ୍ତର କରାଯାଇଛି। ନିଖୋଜ ଯବାନଙ୍କୁ ଖୋଜିବାକୁ ଏବେ ଏନ୍ଡିଆରଏଫର ୪ଟି ଟିମ୍ ନିୟୋଜିତ ହୋଇଛନ୍ତି। ଘଟଣାସ୍ଥଳରୁ ଯୋବ୍ରା ପର୍ଯ୍ୟନ୍ତ ଏହି ଟିମ୍ ନିୟୋଜିତ ଅଛନ୍ତି।
ଏବେବି ସୀତାରାମଙ୍କୁ ଚାଲିଛି ଖୋଜା
