ବ୍ରହ୍ମପୁର ଅଫିସ,୧୩।୨: ଗଞ୍ଜାମ ଜିଲା ଗୋପାଳପୁର ନିର୍ବାଚନ ମଣ୍ଡଳୀ ୧୦ନଂ. ଜିଲା ପରିଷଦ ଜୋନ୍ରେ ପ୍ରଥମ ପର୍ଯ୍ୟାୟ ଭୋଟ ଗ୍ରହଣ ଆସନ୍ତା ୧୬ରେ ହେବ। ବ୍ରହ୍ମପୁର ନିକଟ ଲୋଚାପଡ଼ା, ନିମଖଣ୍ଡି, ହୁଗୁଳାପଟା, ଗୁରୁଣ୍ଠି, ବୋରଗଁା, ଜଗଦଳପୁର, ଆଙ୍କୁଶପୁର ଓ ମସିହାଖାଲି ଏହି ୮ ପଞ୍ଚାୟତକୁ ନେଇ ଗଠିତ ୧୦ନଂ. ଜୋନ୍। ଏହି ସମସ୍ତ ପଞ୍ଚାୟତ ଦିଗପହଣ୍ଡି ନିର୍ବାଚନ ମଣ୍ଡଳୀ ଅନ୍ତର୍ଗତ କୁକୁଡ଼ାଖଣ୍ଡି ବ୍ଲକ ଅଧିନ ହୋଇଥିଲେ ମଧ୍ୟ ଗୋପାଳପୁରରେ ଅନ୍ତର୍ଭୁକ୍ତ ରହିଛି। ମହିଳାଙ୍କ ପାଇଁ ସଂରକ୍ଷିତ ଥିବା ଶାସକ ବିଜେଡିରୁ ଭାରତୀ ନାୟକ, ଭାଜପାରୁ ଅନିତା ବେହେରା ଓ କଂଗ୍ରେସରୁ କୃଷ୍ଣଲତା ଦାସ ପ୍ରାର୍ଥୀ ହୋଇଛନ୍ତି। ତ୍ରିମୁଖୀ ପ୍ରତିଦ୍ୱନ୍ଦ୍ୱିତା ମଧ୍ୟରେ ମୁଖ୍ୟତଃ ଶଙ୍ଖ ଓ ପଦ୍ମ ଦଳ ମଧ୍ୟରେ ଲଢ଼େଇ ତୀବ୍ର ହେଉଛି।
ସୂଚନାଯୋଗ୍ୟ, ୨୦୧୭ ନିର୍ବାଚନରେ ଏହି ଜୋନ୍ ପୁରୁଷଙ୍କ ପାଇଁ ଥିଲା। ଭାଜପାରୁ ବର୍ତ୍ତମାନର ଗଞ୍ଜାମ ସାଙ୍ଗଠନିକ ଜିଲା ଯୁବମୋର୍ଚ୍ଚା ସଭାପତି ଏଲ.ମୋହନ ଦାସ ଜିଲା ପରିଷଦକୁ ନିର୍ବାଚିତ ହୋଇଥିଲେ। ଚଳିତ ନିର୍ବାଚନରେ ଭାଜପା ହାତରୁ ଛଡ଼ାଇ ନେବା ପାଇଁ ବିଜେଡି ପ୍ରାଣମୂର୍ଚ୍ଛା ଉଦ୍ୟମ ଚଳାଇଛି। ଏହି ଜୋନ୍ ଉଭୟ ବିଜେଡି ଓ ଭାଜପାର ସମ୍ମାନର ପ୍ରଶ୍ନ ହୋଇଛି। ମୋହନ ଦାସ ଏବେ ଲୋଚାପଡ଼ା ସରପଞ୍ଚ ପ୍ରାର୍ଥୀ ହୋଇଛନ୍ତି। ଗତ ନିର୍ବାଚନରେ ଗୋପାଳପୁର କ୍ଷେତ୍ରର ୪ ଜୋନ୍ରୁ ୧୦ ଓ ୫୪ନଂ. ଜୋନ୍ରେ ଭାଜପା ଜିତିଥିଲା। ତାହା ବଜାୟ ରଖିତ୍ବା ନିମନ୍ତେ ପଦ୍ମ ଦଳ କସରତ କରୁଛି।
କୁକୁଡ଼ାଖଣ୍ଡି ବ୍ଲକର ଏହି ଜୋନ୍ରେ ବିଜେଡି ପକ୍ଷରୁ ଗୋପାଳପୁର ସେଗ୍ମେଣ୍ଟ ଦାୟିତ୍ୱରେ ଥିବା ମୁଖ୍ୟମନ୍ତ୍ରୀଙ୍କ ରାଜନୈତିକ ସଚିିବ ଗୋପବନ୍ଧୁ ଦାସ ଭୋଟରଙ୍କ ପାଖକୁ ଯାଇ ସଚେତନ କରୁଛନ୍ତି। ଭାଜପା ପ୍ରାର୍ଥୀଙ୍କୁ ଜିତାଇବା ପାଇଁ ରାଜନୀତିରେ ପୁରୁଣା ଏବଂ ଗୋପାଳପୁର ଆସନରେ ୩ ଥର ନିର୍ବାଚନ ଲଢ଼ିଥିବା ପାର୍ଟି ଜିଲା ସଭାପତି ବିଭୂତି ଜେନା କାଉଣ୍ଟର ପ୍ରଚାର କରୁଛନ୍ତି। ମୋହନ ଦାସଙ୍କ ସମେତ ଅନ୍ୟମାନେ ଭୋଟ ପ୍ରଚାରରେ ସାମିଲ ହେଉଛନ୍ତି। ତେବେ ନିର୍ବାଚନୀ ପ୍ରଚାରରେ କଂଗ୍ରେସ ଅନ୍ୟ ଜୋନ୍ଗୁଡ଼ିକ ଭଳି ୧୦ନଂ.ରେ ବହୁ ପଛରେ ଥିବା ଲକ୍ଷ୍ୟ କରାଯାଇଛି। ତେଣୁ ଭାଜପା ଓ ବିଜେଡି ମଧ୍ୟରେ କଡ଼ା ମୁକାବିଲା ହେଉଛି। ଯିଏ ଜିତିବ ଭୋଟ ବ୍ୟବଧାନ ଅଳ୍ପ ହେବାର ପ୍ରାକ୍ ଆକଳନ କରାଯାଇଛି। ସେହିପରି ଗୋପାଳପୁର କ୍ଷେତ୍ର ରଙ୍ଗେଇଲୁଣ୍ଡା ବ୍ଲକ ୫୪ନଂ. ଜୋନ୍ରେ ମଧ୍ୟ ବିଜେଡି -ଭାଜପା ମଧ୍ୟରେ ଟକ୍କର ହେଉଛି। ପୂର୍ବତନ ଜିଲା ପରିଷଦ ସଭ୍ୟ ଦୀପକ ସାମନ୍ତଙ୍କୁ ବିଜେଡି ପ୍ରାର୍ଥୀ କରିଥିବା ବେଳେ ଶୁଭାଶିଷ ସାହୁ ଭାଜପାରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି। ନୂଆ ଓ ପୁରୁଣାଙ୍କ ଏହି ଲଢ଼େଇ ରୋଚକ ହୋଇଛି। ଗତ ନିର୍ବାଚନରେ ବିଜେଡିରୁ ନିର୍ବାଚିତ ସଭ୍ୟା ମଞ୍ଜୁଶ୍ରୀ ଦଳାଇଙ୍କୁ ଏଥର ଟିକେଟ ଦିଆଯାଇନାହିଁ। ତଥାପି ସେ ଦୀପକଙ୍କ ପାଇଁ ପ୍ରଚାର କରୁଥିଲେ ମଧ୍ୟ ଅସନ୍ତୁଷ୍ଟ ଥିବା ଅଞ୍ଚଳରେ ଆଲୋଚନା ହେଉଛି। ଏହି ଜୋନ୍ରେ ମଧ୍ୟ କଂଗ୍ରେସ ପଛରେ ରହିଛି। କିଏ ଜିତିବ ଓ କିଏ ହାରିବ ସେନେଇ ସବୁ ଖଟିରେ ଜୋର ଧରିଛି ଚର୍ଚ୍ଚା।
