ନଟବରଲାଲ, ଏଇ ନାଁ ଚୋରି ଓ ଠକେଇର ପ୍ରତୀକ ପାଲଟିଛି। କାରଣ ଏଇ ନାମଧାରୀ ବ୍ୟକ୍ତିଜଣକ ଭାରତରେ ବଡ଼ ବଡ଼ ଠକେଇ ସହ ସମ୍ପୃକ୍ତ ଥିଲେ। ଆଉ ସେଇ ଠକେଇ ଏତେ ବଡ ଥିଲା ଯେ, ଯେ କେହି ଶୁଣି ଆଶ୍ଚର୍ଯ୍ୟ ହୋଇଯିବେ। ଲାଲକିଲ୍ଲା ଓ ତାଜମହଲକୁ ବିକ୍ରି କରିପାରିଥିବା ଏହି ବିଶିଷ୍ଟ ଠକ ୧୯୧୨ରେ ଜନ୍ମଗ୍ରହଣ କରିଥିଲେ। ସେ ବିହାରର ସିୱାନ ଜିଲାର ନିବାସୀ ଥିଲେ। ସେ ଚୋରି ଓ ଜାଲସାଜି କରିବା ପାଇଁ ସେ ନିଜର ଅନେକ ନାମ ରଖିଥିଲେ। ତେବେ ତାଙ୍କର ବାସ୍ତବିକ ନାମ ଥିଲା ମିଥିଲେଶ କୁମାର ଶ୍ରୀବାସ୍ତବ। ଅନେକେ କହନ୍ତି, ନଟବର ଲାଲର ୫୦ରୁ ଊର୍ଦ୍ଧ୍ୱ ନାମ ଥିଲା। ସେହି ସବୁ ନାମ ସାହାଯ୍ୟରେ ସେ ଠକେଇ କରୁଥିଲେ। ତା’ର ଚୋରିର ଆରମ୍ଭ ୧୦୦୦ଟଙ୍କାରୁ ହୋଇଥିଲା। ସେ ଡୁପ୍ଲିକେଟ୍ ହସ୍ତାକ୍ଷର କରିବାରେ ମାହିର ଥିଲେ। ସେ କାହାର ବି ହସ୍ତାକ୍ଷରର ନକଲ ସହଜରେ କରିପାରୁଥିଲେ। ପ୍ରଥମ ଠକେଇ ବି ସେ ପଡୋଶୀଙ୍କ ଡୁପ୍ଲିକେଟ ହସ୍ତାକ୍ଷର କରି ବ୍ୟାଙ୍କରୁ ଟଙ୍କା ଉଠାଇ କରିଥିଲେ। ପାଠ ପଢି ସେ ଜଣେ ଓକିଲ ହୋଇଥିଲେ। ଏହାପରେ ଷ୍ଟକ ବ୍ରୋକର୍ ଓ କପଡା ବ୍ୟବସାୟ ବି କରିଥିଲେ। ହେଲେ ସେହି ପେସାସବୁ ପସନ୍ଦ ଆସି ନ ଥିଲା। ଆଉ ତାକୁ ଛାଡି ଠକେଇର ରାସ୍ତା ଆପଣେଇଥିଲେ। ବହୁ ଲୋକଙ୍କଠାରୁ ସେ ଲକ୍ଷ ଲକ୍ଷ ଠକିଲେ। ଧରାପଡିଲେ ଫେରାର ହେବାର ବି ସେ ଥିଲେ ମାହିର। ଏମିତି କି ପୋଲିସ୍ ଧରିବାପରେ ବି ସେ ଖସି ପଳାଇବାରେ ସକ୍ଷମ ହେଉଥିଲେ। ସେ ଭଲ କଥା କହି ଲୋକଙ୍କୁ ନିଜ ଜାଲରେ ଫସାଇ ପାରୁଥିଲେ। ଏହି ଛୋଟମୋଟ ଠକେଇ ବାଦ୍ ବହୁ ବଡ ଠକେଇ ବି କରିଛନ୍ତି। ଜାଣି ଆଶ୍ଚର୍ଯ୍ୟ ହେବେ ସେ ଅନେକଥର ଲାଲକିଲ୍ଲା ଓ ତାଜମହଲକୁ ବିକ୍ରି କରିଛନ୍ତି। ସେ ପୁଣି ବିଦେଶୀଙ୍କୁ। ତାଙ୍କ ଠକେଇର କୌଣସି ସୀମା ନ ଥିଲା। ସେ ତ ଭାରତର ରାଷ୍ଟ୍ରପତି ଭବନକୁ ବି ବିକ୍ରି କରିଦେଇଥିଲେ। ଆଉ ଏହାକୁ ସେ ରାଷ୍ଟ୍ର୍ରପତିଙ୍କ ଡୁପ୍ଲିକେଟ୍ ହସ୍ତାକ୍ଷର କରି ସମ୍ଭବ କରିପାରିଥିଲେ। ପାର୍ଲାମେଣ୍ଟ ହାଉସ୍କୁ ବି ବିକିବାରେ ସଫଳ ହୋଇଥିଲେ। ଫଳରେ ନଟବରଲାଲ ଉପରେ ଠକେଇ ଆରୋପରେ ୮ ରାଜ୍ୟରେ ୧୦୦ରୁ ଊର୍ଦ୍ଧ୍ୱ ମାମଲା ରୁଜୁ ହୋଇଥିଲା। ୭୦, ୮୦ ଓ ୯୦ ଦଶକରେ ନଟବରଲାଲ ସାରା ଭାରତରେ ବେଶ୍ ପରିଚିତ ନାଁଟିଏ ପାଲଟି ଯାଇଥିଲେ। ବହୁ ବଡ ବଡ ବ୍ୟବସାୟୀ ତାଙ୍କର ଜାଲରେ ଫସିଥିଲେ। ତାଙ୍କର ଏହି କାମ ପାଇଁ ତାଙ୍କୁ ୧୧୧ ବର୍ଷର କାରାଦଣ୍ଡ ଦିଆଯାଇଥିଲା। ଏହା ବାଦ୍ ବି ସେ ଜେଲରୁ ଅନେକ ଥର ଫେରାର୍ ହୋଇଯାଇଥିଲେ। ୨୦୦୪ରେ ନଟବରଲାଲଙ୍କ ନାଁ ଶେଷଥର ଉଠିଥିଲା। ସେତେବେଳେ ଜଣେ ଓକିଲ ଦାବି କରିଥିଲେ ଯେ,ନଟବରଲାଲ ତା’ ସମ୍ପତ୍ତି ଉକ୍ତ ଓକିଲଙ୍କ ନାମରେ କରେଇଦେଇଛନ୍ତି। ଏହାପରେ ନଟବରଲାଲର ମୃତ୍ୟୁ କେବେ ଓ କେମିତି ହେଲା ତାହା ଏବେ ବି ସ୍ପଷ୍ଟ ହୋଇପାରିନାହିଁ। ଅନେକେ କହନ୍ତି, ନଟବର ଲାଲ ୨୦୦୯ରେ ମୃତ୍ୟୁବରଣ କରିଥିଲେ କିନ୍ତୁ ପରିବାର ଲୋକ ଦାବି କରନ୍ତି, ସେ ୧୯୯୬ରେ ମୃତ୍ୟୁବରଣ କରିଛନ୍ତି। ତାଙ୍କ ଭାଇଙ୍କ କହିବାନୁସାରେ ଶେଷଥର ସେ ଏହି ମସିହାରେ ଜେଲ୍ରୁ ଖସିଥିଲେ। ଆଉ ପରେ ମୃତ୍ୟୁବରଣ କରିଥିଲେ। ତାଙ୍କ ଭାଇ ଅନ୍ତିମ ସଂସ୍କାର କରିଥିବା ଦାବି କରନ୍ତି।
