ମୁମ୍ବାଇ,୨୧।୧୨: ଗୋଆରେ ଖ୍ରୀଷ୍ଟମାସ୍ ପାଳନ ବେଳେ ମୁଖ୍ୟ ବ୍ୟଞ୍ଜନ ଭାବେ ବିଫ୍ (ଗୋମାଂସ) ପରିବେଷଣ କରାଯାଇଥାଏ। ଏଥର ଖ୍ରୀଷ୍ଟମାସ୍ ପୂର୍ବରୁ ସେଠାରେ ଗୋମାଂସ ସଙ୍କଟ ଗୋଆବାସୀଙ୍କୁ ଚିନ୍ତାରେ ପକାଇଦେଇଛି। ଗୋମାଂସ ବିନା ଏଥର ଖ୍ରୀଷ୍ଟମାସ ପାଳନ ଫିକା ପଡ଼ିବ ବୋଲି ଅନେକେ କହିଛନ୍ତି। ତେବେ ଦୁଇଦିନ ମଧ୍ୟରେ ଏହାର ସମାଧାନ ବାଟ ବାହାର କରିବା ଲାଗି ମୁଖ୍ୟମନ୍ତ୍ରୀ ପ୍ରମୋଦ ସାଓ୍ବନ୍ତ ପ୍ରତିଶ୍ରୁତି ଦେଇଛନ୍ତି। କର୍ନାଟକ ସରକାର ଗୋହତ୍ୟା ବିରୋଧରେ କଠୋର ଆଇନ ବିଧାନସଭାରେ ଗୃହୀତ କରାଇବା ପରେ ଗୋଆକୁ ମାଂସ ଯୋଗାଣ ବନ୍ଦ ହୋଇଯାଇଛି। ୧୩ ବର୍ଷରୁ କମ୍ ଗାଈ କିମ୍ବା ମଇଁଷି ଚୋରା ଚାଲାଣ କିମ୍ବା ହତ୍ୟା କଲେ ୩ରୁ ୭ ବର୍ଷ ଜେଲ୍ଦଣ୍ଡ ସହ ୫୦ ହଜାରରୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ଅର୍ଥଦଣ୍ଡ ବ୍ୟବସ୍ଥା ଉକ୍ତ ଆଇନରେ ରହିଛି। ଏହା କାର୍ଯ୍ୟକାରୀ ହୋଇ ନ ଥିଲେ ମଧ୍ୟ ମାଂସ ବ୍ୟବସାୟ ଗୁରୁତର ପ୍ରଭାବିତ ହୋଇଛି।
ଗୋଆର ଅଧିକାଂଶ ଲୋକ ଘୁଷୁରି ମାଂସ ଖାଆନ୍ତି ନାହିଁ। ସେଥିପାଇଁ ଆମକୁ କେବଳ ଚିକେନ୍ ତରକାରୀ କରିବାକୁ ପଡ଼ିବ ବୋଲି ଗୃହିଣୀ ଭାଲେନ୍ସିଆ ନତାଶା ଡିସୌଜା କହିଛନ୍ତି। କିଛିଦିନ ହେଲ ା ଗୋଆର ଗୋମାଂସ ଦୋକାନ ବନ୍ଦ ରହିଛି। ଖ୍ରୀଷ୍ଟମାସ ପ୍ରଭାବିତ ହେବା ପୂର୍ବରୁ ସରକାର କିଛି କରିବେ ବୋଲି ଅନ୍ୟ ଜଣେ ଗୃହିଣୀ ଆଶାବ୍ୟକ୍ତ କରିଛନ୍ତି। ଗୋଆର ୩୦% ଲୋକ କ୍ୟାଥୋଲିକ୍। ଶେଷ ମୁହୂର୍ତ୍ତରେ ମୁଖ୍ୟମନ୍ତ୍ରୀ କୌଣସି ସହାୟତା କରିପାରିବେ ନାହିଁ। ଏଥର ପର୍ବ ଫିକା ପଡ଼ିବ ବୋଲି ଅନ୍ୟ ଜଣେ ବାସିନ୍ଦା ପ୍ରଦୀପ ଆମୋଙ୍କର କହିଛନ୍ତି।
ମୁଖ୍ୟମନ୍ତ୍ରୀ ତାଙ୍କ ସଚିବ, ପ୍ର୍ରାଣୀ ଚିକିତ୍ସା ବିଭାଗ ନିର୍ଦ୍ଦେଶକଙ୍କ ବୈଠକ ଡାକିଛନ୍ତି। ବଜାରରେ ଗୋମାଂସ ଉପଲବ୍ଧ ପାଇଁ ଯଥାସମ୍ଭବ ଉଦ୍ୟମ କରାଯାଉଛି ବୋଲି ମୁଖ୍ୟମନ୍ତ୍ରୀ କହିଛନ୍ତି। ବୁଧବାର ଗୋଆର ଗୋମାଂସ ବ୍ୟବସାୟୀଙ୍କ ଏକ ପ୍ରତିନିଧି ଦଳ ମୁଖ୍ୟମନ୍ତ୍ରୀଙ୍କୁ ଭେଟି ଏହାର ପ୍ରତିକାର ପାଇଁ ଅନୁରୋଧ କରିଥିଲେ।
