ରାଞ୍ଚି,୨୫।୬: ଡିଭିଜନାଲ ରେଲ୍ଓ୍ବେ ମ୍ୟାନେଜର (ଡିଆର୍ଏମ୍)ଙ୍କ ସ୍ତ୍ରୀଙ୍କୁ ଚପଲ ଖୋଲିବାକୁ କହି ଝାଡଖଣ୍ଡ ଧନବାଦ ମଣ୍ଡଳ ରେଳ ହସ୍ପିଟାଲ ଆଟେଣ୍ଡାଣ୍ଟ ବସନ୍ତ ଉପାଧ୍ୟାୟଙ୍କୁ ହଟହଟା ହେବାକୁ ପଡ଼ିଛି। ଗୁରୁବାର ଡିଆର୍ଏମ୍ ଆଶିଷ ଝା’ଙ୍କ ସ୍ତ୍ରୀ ଚେକ୍ଅପ୍ ପାଇଁ ଡାକ୍ତରଙ୍କ ନିକଟକୁ ଯାଇଥିଲେ । ଡାକ୍ତରଙ୍କ ଚାମ୍ବର ବାହାରେ ଡ୍ୟୁଟିରେ ଥିବା ବସନ୍ତ ତାଙ୍କୁ ଚପଲ ଖୋଲି ଭିତରକୁ ଯିବା ପାଇଁ କହିଥିଲେ। କାରଣ ପ୍ରତ୍ୟେକ ରୋଗୀ ଚପଲ ବାହାରେ ରଖି ଚାମ୍ବରକୁ ଚେକ୍ଅପ୍ ପାଇଁ ଯିବା ଲାଗି ପୂର୍ବରୁ ଡାକ୍ତର ନିର୍ଦ୍ଦେଶ ଦେଇଥିଲେ। ବସନ୍ତ କହିବା ପରେ ମଧ୍ୟ ଆଶିଷଙ୍କ ସ୍ତ୍ରୀ ଚପଲ ପିନ୍ଧି ଡାକ୍ତରଙ୍କ ନିକଟକୁ ଗଲେ। କିଛି ସମୟ ପରେ ଆଶିଷ ମୁଖ୍ୟ ମେଡିକାଲ ସୁପରିଣ୍ଟେଣ୍ଡ୍(ସିଏମ୍ଏସ୍)ଙ୍କ ଦ୍ୱାରା ବସନ୍ତଙ୍କୁ ଚାମ୍ବରକୁ ଡକେଇଲେ।
ସିଏମ୍ଏସ୍ ଏବଂ ବସନ୍ତ ଦୁହେଁ ମିଶି ଡିଆର୍ଏମ୍ଙ୍କ ନିକଟରେ ପହଞ୍ଚତ୍ଥିଲେ। ସ୍ତ୍ରୀଙ୍କୁ ଚପଲ ଖୋଲି ଡାକ୍ତରଙ୍କ ନିକଟକୁ ଯିବା କଥାକୁ ନେଇ ଡିଆର୍ଏମ୍ ବସନ୍ତଙ୍କୁ ପ୍ରଥମେ ଗାଳିକଲେ। ଏହାପରେ ତାଙ୍କୁ ନିର୍ଯାତିତ କରି ଅର୍ଦ୍ଧନଗ୍ନ ଅବସ୍ଥାରେ ଘରକୁ ପଠାଇଥିଲେ। ଡିଆର୍ଏମ୍ଙ୍କ ଅସ୍ବାଭାବିକ ବ୍ୟବହାର ପାଇଁ ବସନ୍ତ ଅବସାଦକୁ ଚାଲିଗଲେ। ତାଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିଯିବା ପରେ ବସନ୍ତଙ୍କୁ ଡିଭିଜନାଲ ରେଲ୍ଓ୍ବେ ହସ୍ପିଟାଲରେ ଭର୍ତ୍ତି କରାଗଲା। ଅବସ୍ଥା ଅଧିକ ଶୋଚନୀୟ ହେବା ପରେ ଶେଷରେ ତାଙ୍କୁ ଧାନବାଦର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି। ଘଟଣା ନେଇ ଡାକ୍ତରଖାନାର ଗ୍ରୁପ୍-ଡି କର୍ମଚାରୀ ଡିଆର୍ଏମ୍ଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଦାବି କରି ବିକ୍ଷୋଭ କରିଥିଲେ। ବରିଷ୍ଠ ଡିଭିଜନାଲ କମର୍ସିଆଲ ମ୍ୟାନେଜର (ଡିସିଏମ୍) ଅମରେଶ କୁମାର କିନ୍ତୁ ଆଶିଷଙ୍କ ବିରୋଧରେ ଆସିଥିବା ଅଭିଯୋଗ ଭିତ୍ତିହୀନ ବୋଲି କହିଛନ୍ତି। କର୍ମଚାରୀମାନେ ବସନ୍ତଙ୍କୁ ନ୍ୟାୟ ଦାବିରେ କାର୍ଯ୍ୟବନ୍ଦ ଡାକରା ଦେଇଥିବାରୁ ଡାକ୍ତରଖାନାରେ ରୋଗୀଙ୍କ ସେବା ପ୍ରଭାବିତ ହୋଇଥିଲା। ପରବର୍ତ୍ତୀ ସମୟରେ ସିଏମ୍ଏସ୍ କ୍ଷମା ମାଗିବା ପାଇଁ ରାଜିହେବା ପରେ କର୍ମଚାରୀମାନେ ଆନ୍ଦୋଳନରୁ ଓହରିଛନ୍ତି।
