ବାଲୁଗାଁ, ୧୮ା୧୨(ଡି.ଏନ୍.ଏ.): ଶୀତର ପ୍ରକୋପ ଦିନକୁ ଦିନ ବୃଦ୍ଧି ପାଉଥିବା ବେଳେ ସୁଦୂର ବରଫାବୃତ୍ତ ରାଷ୍ଟ୍ରାଞ୍ଚଳରୁ ଚିଲିକାକୁ ରଙ୍ଗବେରଙ୍ଗର ବିଦେଶାଗତ ପକ୍ଷୀଙ୍କ ଆଗମନ ବଢ଼ିବାରେ ଲାଗିଛି। ୧୫ ତାରିଖ(ଗୁରୁବାର) ସୁଦ୍ଧା ସମଗ୍ର ଚିଲିକାରେ ୧୦୬ ପ୍ରଜାତିର ୭ ଲକ୍ଷ ୭ ହଜାର ୪୪୧ ବିଦେଶାଗତ ପକ୍ଷୀଙ୍କ ସମାଗମ ହୋଇଥିବା ବାଲୁଗାଁ ବନ୍ୟପ୍ରାଣୀ ବିଭାଗ ପକ୍ଷରୁ ସୂଚନା ମିଳିଛି। ତେବେ ଚିଲିକା ମଧ୍ୟରେ ଥିବା ପକ୍ଷୀ ଅଭୟାରଣ୍ୟ ନଳବଣରେ ୩ ଲକ୍ଷ ୧୨ ହଜାର ୧୭୮ ପକ୍ଷୀଙ୍କ ସମାଗମ ହୋଇଥିବା ବେଳେ ଭୂଷଣ୍ଡପୁର, ମଙ୍ଗଳାଯୋଡ଼ି, ସୋରଣ, ସୁନ୍ଦରପୁର, କାଳୁପଡ଼ା, ସାତପଡ଼ା, ଗୁରୁବାଇ, ନୂଆପଡ଼ା, କୃଷ୍ଣପ୍ରସାଦ, ଜହ୍ନିକୁଦା, ସିପକୁଦା, ବାଲିପାଟପୁର ଓ ରମ୍ଭା ଆଦି ଅଞ୍ଚଳରେ ୩ ଲକ୍ଷ ୯୫ ହଜାର ୨୬୩ ପକ୍ଷୀଙ୍କ ସମାଗମ ହୋଇଥିବା ଜଣାପଡ଼ିଛି। ବିଦେଶାଗତ ପକ୍ଷୀଙ୍କ ମଧ୍ୟରେ ସର୍ବାଧିକ ନର୍ଦ୍ଦର୍ନ ପିଣ୍ଟେଲ୍, ଗର୍ଡଓ୍ବାଲ୍, ସୋଭଲର, କମନ ସେଲଡକ୍, ବ୍ଲାକ୍ ଟେଲ୍ଡ ଗଡଓ୍ବିଟି, ବାର୍ଡ ହେଡେଡ୍ ଗୁଚ୍, ଫ୍ଲେମିଙ୍ଗୋ ଆଦି ପ୍ରଜାତିର ପକ୍ଷୀ ରହିଛନ୍ତି। ଗତବର୍ଷ ସମଗ୍ର୍ର ଚିଲିକାକୁ ୧୦ ଲକ୍ଷ ୭୪ ହଜାର ପକ୍ଷୀ ଆଗମନ କରିଥିବା ବିଭାଗୀୟ ଗଣନାରୁ ଜଣାପଡ଼ିଥିଲା। ଚଳିତ ବର୍ଷ ଶୀତ ପଡ଼ିବାରେ ବିଳମ୍ବ ଯୋଗୁ ପକ୍ଷୀଙ୍କ ସଂଖ୍ୟା ହ୍ରାସ ପାଇବା ଆଶଙ୍କା କରାଯାଇଛି।
ଚିଲିକାକୁ ଚଳିତ ବର୍ଷ ଅକ୍ଟୋବର ଶେଷ ସପ୍ତାହରୁ ବିଦେଶାଗତ ପକ୍ଷୀଙ୍କ ଆଗମନ ଆରମ୍ଭ ହୋଇଥିଲା। ଶୀତ ପଡ଼ିବାରେ ବିଳମ୍ବ ଯୋଗୁ ପକ୍ଷୀଙ୍କ ଆଗମନରେ ବାଧା ଉପୁଜିଥିଲା। ଗତ କିଛିଦିନ ହେବ ଶୀତର ପ୍ରକୋପ ବୃଦ୍ଧି ପାଇଥିବା ବେଳେ ପକ୍ଷୀଙ୍କ ସଂଖ୍ୟା ମଧ୍ୟ ବୃଦ୍ଧି ପାଉଥିବା ଦେଖାଯାଇଛି। ବାଲୁଗାଁ ବନ୍ୟପ୍ରାଣୀ ବିଭାଗ ଆନୁକୂଲ୍ୟରେ ଆସନ୍ତା ୨୧ ତାରିଖରେ ଚିଲିକାରେ ଡଲ୍ଫିନ୍ ଗଣନା ହେବାକୁ ଥିବା ବେଳେ ଜାନୁୟାରୀ ୪ରେ ପକ୍ଷୀ ଗଣନା ହେବ। ଏଥିପାଇଁ ବିଭାଗ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି। ପକ୍ଷୀଙ୍କ ବିଚରଣରେ ଯେପରି ବାଧା ନ ଉପୁଜିବ ସେଥିଲାଗି ଗଣନାର ୧୦ ଦିନ ପୂର୍ବରୁ ନଳବଣ ନିଷିଦ୍ଧାଞ୍ଚଳକୁ ଡଙ୍ଗା ଏବଂ ପର୍ଯ୍ୟଟକଙ୍କୁ ବାରଣ କରାଯାଇଛି। ଡିସେମ୍ବର ୨୧ରୁ ୨୩ ତିନିଦିନ ବ୍ୟାପୀ ସମଗ୍ର ଚିଲିକାରେ ଡଲଫିନ୍ ଗଣନା ହେବ। ଏଥିପାଇଁ ୨୦ ତାରିଖରେ ଡଲଫିନ୍ ଅଭୟାରଣ୍ୟ କୁହାଯାଉଥିବା ସାତପଡ଼ା ଏବଂ ବାଲୁଗାଁଠାରେ ପୃଥକ୍ ଭାବେ ଗଣନାକାରୀଙ୍କୁ ତାଲିମ ଦିଆଯିବ। ସାତପଡ଼ାରେ ୮ଟି ଏବଂ ବାଲୁଗାଁରେ ୧୦ ଟିମ୍ ରହି ଡଲଫିନ୍ ଗଣନା କରିବେ। ଏଥିରେ ଡଙ୍ଗା ଚାଳକ ଏବଂ ଗଣନାକାରୀଙ୍କୁ ମିଶାଇ ମୋଟ୍ ୧୪୦ ଜଣ ଅଂଶଗ୍ରହଣ କରିବେ ବୋଲି ବିଭାଗ ପକ୍ଷରୁ ଜଣାପଡ଼ିଛି। ଗତବର୍ଷ ସମଗ୍ର ଚିଲିକାରେ ୧୬୭ଟି ଡଲ୍ଫିନ ଦୃଷ୍ଟିଗୋଚର ହୋଇଥିବା ଗଣନାରୁ ଜଣାପଡ଼ିଥିଲା।
ସେହିପରି ଜାନୁୟାରୀ ୩ ରେ ବାଲୁଗାଁ ନିକଟ ଚନ୍ଦ୍ରାପୁଟସ୍ଥିତ ସିଡିଏ ଗବେଷଣା କେନ୍ଦ୍ରଠାରେ ପକ୍ଷୀ ଗଣନାକାରୀଙ୍କୁ ତାଲିମ ଦିଆଯିବ। ୪ ତାରିଖ ଭୋରରୁ ଚିଲିକା ମଧ୍ୟରେ ୨୦ଟି ଦଳ ଗଣନା କରିବେ। ପ୍ରତି ଦଳରେ ଜଣେ ଅଭିଜ୍ଞ ପକ୍ଷୀ ବିଶାରଦଙ୍କ ସମେତ ୫ଜଣ ସଦସ୍ୟ ରହିବେ। ଏଥିପାଇଁ ପ୍ରତ୍ୟେକ ଟିମକୁ ଗଣନା କାର୍ଯ୍ୟ ପାଇଁ ଜିପିଏସ୍, ବାଇନାକୁଲାର ଏବଂ ୱାକିଟକି ଆଦି ଯନ୍ତ୍ର ଯୋଗାଇ ଦିଆଯିବ। ଭୋର ୬ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ପକ୍ଷୀଗଣନା କରାଯିବ ବୋଲି ବିଭାଗୀୟ ଏସିଏଫ୍ ପ୍ରଶାନ୍ତ କୁମାର ପଣ୍ଡା କହିଛନ୍ତି। ଏହି ଗଣନା ଦଳରେ ବମ୍ବେ ନାଚୁରାଲ ହିଷ୍ଟ୍ରି ଅଫ୍ ସୋସାଇଟି, ୱାଇଲ୍ଡ ଓଡ଼ିଶା, ବିଭିନ୍ନ ମହାବିଦ୍ୟାଳୟ ଓ ବିଶ୍ୱବିଦ୍ୟାଳୟର ଛାତ୍ରୀଛାତ୍ର ସମେତ ରାଜ୍ୟ ଏବଂ ରାଜ୍ୟ ବାହାରୁ ପକ୍ଷୀ ବିଶାରଦମାନେ ସାମିଲ ହେବେ ବୋଲି ଜଣାପଡ଼ିଛି।
