ରାୟଗଡ଼ା ଅଫିସ,୯ା୯:ସଚେତନତା ହିଁ ବାଲ୍ୟବିବାହ, ଶିଶୁ ଅପରାଧ, ଘରୋଇ ହିଂସା ଓ ଲିଙ୍ଗ ଭିତ୍ତିକ ହିଂସାକୁ ରୋକିପାରିବ। ଲୋକଙ୍କୁ ଅଧିକ ସଚେତନ କରିବା ଉଦ୍ଦେଶ୍ୟରେ ରାୟଗଡ଼ା ଜିଲା ପ୍ରଶାସନ ପକ୍ଷରୁ ପ୍ରଚେଷ୍ଟା ଅଭିଯାନରେ ସଚେତନତା ରଥର ଶୁଭାରମ୍ଭ କରାଯାଇଛି। ଏହି ରଥ ଜିଲାର ସମସ୍ତ ଗ୍ରାମକୁ ଯାଇ ଲୋକଙ୍କୁ ସଚେତନ କରିବ। ରାୟଗଡ଼ା ଅତିରିକ୍ତ ଜିଲାପାଳ ଧର୍ମାନନ୍ଦ ବେହେରା ସବୁଜ ପତାକା ଦେଖାଇ ରଥର ଶୁଭାରମ୍ଭ କରିଛନ୍ତି।
ନାବାଳିକାଙ୍କୁ ପାଠପଢ଼ା ବୟସରେ ବିବାହ ବନ୍ଧନରେ ଛନ୍ଦି ଦିଆଯାଉଛି। ଯୋଗ୍ୟ ବୟସ ପୂର୍ବରୁ ମାତୃତ୍ୱ ଲାଭ କରୁଥିବାରୁ ମାତୃ ଏବଂ ଶିଶୁ ମୃତ୍ୟୁହାର ବୃଦ୍ଧିପାଉଛି। ଏହାକୁ ରୋକିବା ମୂଳ ଲକ୍ଷ୍ୟ। ପିଲାଙ୍କୁ ପାଠ ପଢ଼ିବା ପାଇଁ ସଚେତନ କରାଯିବ। ୨୦୩୦ ସୁଦ୍ଧା ସମଗ୍ର ଜିଲାକୁ ବାଲ୍ୟବିବାହ ମୁକ୍ତ କରିବା ଏହି ଅଭିଯାନର ମୂଳ ଲକ୍ଷ୍ୟ। ଏଥିପାଇଁ ପ୍ରଚେଷ୍ଟା ଅଭିଯାନ ମାଧ୍ୟମରେ ଜିଲା ସମାଜ କଲ୍ୟାଣ ବିଭାଗ, ଶିଶୁ ସୁରକ୍ଷା ୟୁନିଟ, ୟୁନିସେଫ୍ ଓ ଆକ୍ସନଏଡ୍ର ମିଳିତ ପ୍ରୟାସରେ ଏକ ଯୋଜନା ମୂଳକ କାର୍ଯ୍ୟକ୍ରମ ପ୍ରସ୍ତୁତ କରାଯାଇଛି। ସଚେତନତା ରଥ ଗାଁରେ ପହଞ୍ଚିବା ପରେ ଆଶାକର୍ମୀ, ଏସ୍ଏଚ୍ଜି ସଭ୍ୟା, ନିର୍ବାଚିତ ପଞ୍ଚାୟତ ପ୍ରତିନିଧି, ସମସ୍ତ ଜାତି ସମାଜ ମୁଖ୍ୟ, କିଶୋରୀ, ବାଳିକା ଓ ଗ୍ରାମର ଅନ୍ୟ ବ୍ୟକ୍ତିଙ୍କୁ ନେଇ ଅଙ୍ଗନଓ୍ବାଡି କର୍ମୀମାନେ ବୈଠକ କରିବେ। ବଲ୍ୟ ବିବାହକୁ ନା ଏବଂ ସ୍କୁଲ ଯିବାକୁ ହଁ କହିବା ଉପରେ ସାମୁହିକ ଶପଥ କରାଇବେ ବୋଲି ଜିଲା ସମାଜ ମଙ୍ଗଳ ଅଧିକାରୀ ଯାଜ୍ଞସେନୀ ବେହେରା କହିଛନ୍ତି। ଜିଲା କାର୍ଯ୍ୟାଳୟ ପରିସରରେ ରଥ ଶୁଭାରମ୍ଭ କାର୍ଯ୍ୟକ୍ରମରେ ଏବିଇଓ ଭଜନଲାଲ ମାଝି, ଜିଲା ଶିଶୁ ସୁରକ୍ଷା ଅଧିକାରୀ ରମେଶ ଚନ୍ଦ୍ର ନାୟକ, ଡିଅଇପିଆର୍ଓ ବସନ୍ତ କୁମାର ପ୍ରଧାନ, ଓର୍ମାସର ଡେପୁଟି ସିଇଓ ମନୋଜ ପାତ୍ର, ଜିଲା କ୍ରୀଡ଼ା ଅଧିକାରୀ, ସମାଜ ମଙ୍ଗଳ ବିଭାଗର କାର୍ଯ୍ୟକ୍ରମ ଅଧିକାରୀ କାମାକ୍ଷୀ ମଞ୍ଜରୀ ପାଢ଼ୀ, ଆକ୍ସନଏଡ୍ର ଜିଲା ବାଲ୍ୟବିବାହ ନିଷେଧ ପରାମର୍ଶଦାତା ରତ୍ନେଶ୍ବର ସାହୁ, ସିଡିପିଓ ମିନାକ୍ଷୀ ଦାସ, ଜିଲା ସମାଜ ମଙ୍ଗଳ ବିଭାଗ ଓ ଜିଲା ଶିଶୁ ସୁରକ୍ଷା ୟୁନିଟର କର୍ମକର୍ତ୍ତା ପ୍ରମୁଖ ଉପସ୍ଥିତ ଥିଲେ।
