ଓ୍ବାଶିଂଟନ୍,୩୦ା୭: କୃତ୍ରିମ ବୁଦ୍ଧିମତ୍ତା (ଏଆଇ) ସାରା ବିଶ୍ୱର ନିଯୁକ୍ତି କ୍ଷେତ୍ରରେ ବଡ଼ ବିପଦ ହେବାକୁ ଯାଉଛି। ଏଆଇ ପାଇଁ ନିକଟ ଭବିଷ୍ୟତରେ ଅଗଣିତ କର୍ମଚାରୀ ସେମାନଙ୍କ ନିଯୁକ୍ତି ହରାଇବାକୁ ଯାଉଛନ୍ତି। ଏଆଇ ଆମେରିକାର ନିଯୁକ୍ତି ବଜାରକୁ କିଭଳି ପ୍ରଭାବିତ କରିବ ଏବଂ କେଉଁ ବର୍ଗର କର୍ମଚାରୀ ସର୍ବାଧିକ କ୍ଷତିଗ୍ରସ୍ତ ହେବେ, ତା’ର ଏକ ସଦ୍ୟ ରିପୋର୍ଟ ପ୍ରକାଶ ପାଇଛି। ନୂଆ ରିପୋର୍ଟ ଅନୁଯାୟୀ ୨୦୩୦ ବେଳକୁ ଆମେରିକା ଅର୍ଥନୀତିର କାର୍ଯ୍ୟ ସମୟର ୩୦ ପ୍ରତିଶତ ପର୍ଯ୍ୟନ୍ତ ଏଆଇ ଦଖଲ କରିବାକୁ ଯାଉଛି। ‘ଜେନେରେଟିଭ୍ ଏଆଇ ଏବଂ ଆମେରିକାରେ କାର୍ଯ୍ୟର ଭବିଷ୍ୟତ’ ନାମରେ ଏହି ଅଧ୍ୟୟନ ମାକିନ୍ସେ ଗ୍ଲୋବାଲ ଇନ୍ଷ୍ଟିଚ୍ୟୁଟ ପକ୍ଷରୁ କରାଯାଇଥିଲା। ଆର୍ଥତ୍କ ସଞ୍ଚାଳନ କମାଇବାରେ ଏଆଇର ବଡ଼ ଭୂମିକା ରହିବ ବୋଲି ରିପୋର୍ଟରେ କୁହାଯାଇଛି। ଏଆଇ କେବଳ ବହୁସଂଖ୍ୟାରେ ନିଯୁକ୍ତି ଅଧିକାର ଛଡ଼ାଇ ନେବ ତାହା ନୁହେଁ, ବରଂ ସମସ୍ୟା ସମାଧାନ, ସୃଜନଶୀଳତା, ବ୍ୟବସାୟ ଏବଂ ଆଇନଗତ ପେସାଦାରି କାର୍ଯ୍ୟ ମଧ୍ୟ ବଢ଼ାଇବ। ଏଆଇ ବିପ୍ଳବ ଯୋଗୁ ୨୦୩୦ ସୁଦ୍ଧା କେବଳ ଆମେରିକାରେ ଅତିରିକ୍ତ ୧୨ ନିୟୁତ ପେସାଦାରି ପରିବର୍ତ୍ତନ ଆବଶ୍ୟକ ହୋଇପାରେ ବୋଲି ରିପୋର୍ଟରେ କୁହାଯାଇଛି।
ରିପୋର୍ଟ ଅନୁଯାୟୀ ଭବିଷ୍ୟତରେ ସ୍ବାସ୍ଥ୍ୟସେବା ଶିଳ୍ପରେ ନିଯୁକ୍ତି ବଢ଼ିବା ଆଶା କରାଯାଉଛି। ଏହି ସେକ୍ଟରରେ ୩.୫ ନିୟୁତ ଅଧିକ ନିଯୁକ୍ତିର ଆବଶ୍ୟକ ହେବ ବୋଲି ଆକଳନ କରାଯାଇଛି। ସେହିପରି ୨୦୩୦ ବେଳକୁ ଏସ୍ଟିଇଏମ୍ ନିଯୁକ୍ତି ଚାହିଦା ୨୩ ପ୍ରତିଶତ ବଢ଼ିବ। ଯଦିଓ ପ୍ରଯୁକ୍ତି ସେକ୍ଟରରେ ବ୍ୟାପକ ଛଟେଇ ଚଳିତ ବର୍ଷର ଶିରୋନାମା ମଣ୍ଡନ କରିଛି, ବଡ଼ କମ୍ପାନୀଗୁଡ଼ିକରେ ମେଧାବୀମାନଙ୍କ ପାଇଁ ଦୀର୍ଘମିଆଦୀ ଚାହିଦାରେ କୌଣସି ପରିବର୍ତ୍ତନ ହେବ ନାହିଁ। ବ୍ୟାଙ୍କିଙ୍ଗ୍, ବୀମା, ଔଷଧ ଶିଳ୍ପ ଏବଂ ସ୍ବାସ୍ଥ୍ୟସେବା ସେକ୍ଟରରେ ଅଧିକ ଡିଟିଟାଲ ପରିବର୍ତ୍ତନ କରାଯାଉଥିବାରୁ ଆଗାମୀ ଦିନରେ ଅଧିକ ଦକ୍ଷତା ସହ ଟେକ୍ନିକାଲ କର୍ମଚାରୀଙ୍କ ଆବଶ୍ୟକତା ବଢ଼ିବ। ୨୦୩୦ ବେଳକୁ ପରିବହନ ସେବାରେ ୯ ପ୍ରତିଶତ ନିଯୁକ୍ତି ବଢ଼ିବା ଆଶା କରାଯାଉଛି।
ଅନ୍ୟପକ୍ଷରେ ଅଫିସ ସହାୟକ, ଗ୍ରାହକ ସେବା, ଖାଦ୍ୟ ଯୋଗାଣ ସେବା ଆଦିରେ ନିଯୁକ୍ତି ଆଗାମୀ ଦିନରେ ଯଥେଷ୍ଟ ହ୍ରାସ ପାଇବ। ରିପୋର୍ଟ ଅନୁଯାୟୀ ଆମେରିକାରେ କିରାଣି ଚାହିଦା ୧୬ ଲକ୍ଷ କମିଯିବ। ସେହିପରି ଖୁଚୁରା ବିକ୍ରେତା ୮,୩୦,୦୦୦ ହ୍ରାସ ପାଇବା ସହ ପ୍ରଶାସନିକ ସହାୟକ ନିଯୁକ୍ତି ୭,୧୦,୦୦୦ ଏବଂ କ୍ୟାଶିୟର ନିଯୁକ୍ତି ୬,୩୦,୦୦୦ ହ୍ରାସ ପାଇବ। ଅଟୋମେଶନ ବା ଲୋକଙ୍କ ବଦଳରେ ମେଶିନ୍ର ବ୍ୟବହାର ଯୋଗୁ ଦୋହରା କାମ, ଡେଟା ସଂଗ୍ରହ ଏବଂ ଏଲିମେଣ୍ଟାରି ଡେଟା ପ୍ରୋସେସିଂ କାର୍ଯ୍ୟ ସହ ସମ୍ପୃକ୍ତ ନିଯୁକ୍ତି ଯଥେଷ୍ଟ ପ୍ରଭାବିତ ହେବ। ଆମେରିକାରେ କମ୍ ପାରିଶ୍ରମିକରେ କାର୍ଯ୍ୟ କରୁଥିବା କର୍ମଚାରୀ ସର୍ବାଧିକ କ୍ଷତିଗ୍ରସ୍ତ ହେବେ। ଚଳିତ ଦଶନ୍ଧି ଶେଷ ସୁଦ୍ଧା ସେମାନଙ୍କ ପାଇଁ ପେସା ପରିବର୍ତ୍ତନ କରିବା ଜରୁରୀ ହୋଇପଡ଼ିବ ବୋଲି ରିପୋର୍ଟରେ କୁହାଯାଇଛି। ସେହିପରି ମହିଳାମାନେ ପୁରୁଷଙ୍କ ତୁଳନାରେ ଦେଢ଼ଗୁଣ ଅଧିକ ନୂଆ ପେସାକୁ ଗତି କରିବା ଆବଶ୍ୟକ ହେବ।
