କର୍ଲାମୁଣ୍ଡା,୩୧।୭(ପ୍ରଦୀପ କୁମାର ସାହୁ): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକର ବିଭିନ୍ନ ସ୍ଥାନରେ ସାର ଓ କୀଟ ନାଶକ ଔଷଧର କଳାବଜାରୀ ରୋକିବା ଉଦ୍ୟମରେ କୃଷି ବିଭାଗ ପକ୍ଷରୁ ଗୁରୁବାର ଅଚାନକ ଚଢ଼ାଉ ହୋଇଛି। ଏଥିରେ ନର୍ଲା ଜିଲା କୃଷି ଅଧିକାରୀ ଶୁଭେନ୍ଦୁ କର, କର୍ଲାମୁଣ୍ଡା ବ୍ଳକ କୃଷି ଅଧିକାରୀ ଜିତେନ୍ଦ୍ର କୁମାର ସିଂ,ଏଏଓ କୁମାର ଚିରଞ୍ଜିବୀ ପ୍ରମୁଖ ବ୍ଲକର ଜୋରାଡ଼ବରା, କୁଶୁର୍ଲା, ଖଲିଆପାଲି, ଭଟାପଲା, ସାପଲହରା, ଡୁକେରମାଲ, କର୍ଲାମୁଣ୍ଡା ଆଦି ସ୍ଥାନମାନଙ୍କରେ ଥିବା ସାର ଓ କୀଟନାଶକ ଦୋକାନ ଗୁଡ଼ିକରେ ପହଞ୍ଚି ସମସ୍ତ ପ୍ରକାର କାଗଜ ପତ୍ର ଯାଞ୍ଚ କରିଛନ୍ତି। ଏହା ସହ ଏକ୍ସପାରୀ ଔଷଧ, ଷ୍ଟକ ରେଜିଷ୍ଟର, ବିକ୍ରି ରେଜିଷ୍ଟର, ସୋର୍ସ ସାଟିଫିକେଟ , ଚଢା ଦରରେ ବିକ୍ରିର ତନଖି କରିଥିଲେ। ତେବେ ଏହି ଚଢ଼ାଉ ସମୟରେ ବିଭିନ୍ନ ଗାଁର ୯ ଜଣ ସାର ଓ କୀଟନାଶକ ବ୍ୟବସାୟୀଙ୍କ ଅସାଧୁ ଉପାୟ ଅବଲମ୍ବନ କରିଥିବା ଚଢ଼ାଉ ବେଳେ ଜଣାପଡ଼ିଥିବାରୁ ସେମାନଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଥିବା ଏଏଓ କୁମାର ଚିରଞ୍ଜିବୀ ସୂଚନା ଦେଇଛନ୍ତି।
