ନୂଆଦିଲ୍ଲୀ,୧୧।୮: ଦେବାଳିଆ ସ୍ଥିତିକୁ ଚାଲିଯାଇଥିବା ଟେଲିକମ୍ କମ୍ପାନୀଗୁଡିକ ଉପରେ ରହିଥିବା ଆଡଜଷ୍ଟେଡ୍ ଗ୍ରସ୍ ରେଭେନ୍ୟୁ(ଏଜିଆର୍)ର ବକେୟା ଅର୍ଥ ଆଦାୟ କରାଯିବ। ଏହି ଅର୍ଥକୁ ଆଦାୟ କରିବା ଲାଗି ଏକ ବିସ୍ତୃତ ଯୋଜନା ଆଣିବାକୁ ସୁପ୍ରିମକୋର୍ଟ ସୋମବାର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ମାମଲା ଉପରେ ସୁପ୍ରିମକୋର୍ଟ ବର୍ତ୍ତମାନ ଶୁଣାଣି କରୁଥିବା ବେଳେ ଏଭଳି ନିର୍ଦ୍ଦେଶ ସରକାରଙ୍କୁ ଦେଇଥିବା ଜଣାପଡିଛି। ମାମଲାର ପରବର୍ତ୍ତୀ ଶୁଣାଣି ଅଗଷ୍ଟ ୧୪ରେ ହେବ। ସରକାର ହୁଏତ ଏଜିଆର ଦେୟ ଆଦାୟ କରିବାକୁ ସକ୍ଷମ ହେବେ ନାହିଁ ବୋଲି ସର୍ବୋଚ୍ଚ ନ୍ୟାୟାଳୟ ଅନୁଭବ କରିଛନ୍ତି। କାରଣ ରିଲାଏନ୍ସ କମ୍ୟୁନିକେଶନ, ଏୟାରସେଲ ଏବଂ ଭିଡିଓକନ କମ୍ୟୁନିକେଶନ ଭଳି କମ୍ପାନୀ ବର୍ତ୍ତମାନ ଇନ୍ସଲଭେନ୍ସି ଧାରା ଦେଇ ଗତି କରୁଛନ୍ତି। ଜଷ୍ଟିସ ଅରୁଣ ମିଶ୍ର, ଜଷ୍ଟିସ ଏ.ଅବଦୁଲ ନାଜିର ଏବଂ ଜଷ୍ଟିସ ଏମ୍.ଆର୍.ଶାହା ଏହି ମାମଲା ଉପରେ ଶୁଣାଣି କରୁଛନ୍ତି। ଜୁଲାଇ ୨୦ ହୋଇଥିବା ଶୁଣାଣିରେ ସର୍ବୋଚ୍ଚ ନ୍ୟାୟାଳୟ ଇନ୍ସଲଭେନ୍ସିକୁ ଚାଲିଯାଇଥିବା କମ୍ପାନୀଗୁଡିକ ବିସ୍ତୃତ ରିପୋର୍ଟ ଟେଲିକମ୍ ମନ୍ତ୍ରଣାଳୟର ଟେଲିକମ୍ ବିଭାଗକୁ ମାଗିଥିଲେ। ଏହି କମ୍ପାନୀଗୁଡିକ ଉପରେ ୩୮,୯୬୪ କୋଟି ଟଙ୍କା ବକେୟା ରହିଛି। ସେହିଭଳି ଭୋଡାଫୋନ-ଆଇଡିଆଇ, ଟାଟା ଟେଲି ସର୍ଭିସେସ୍ ଏବଂ ଏୟାରଟେଲ ଭଳି କମ୍ପାନୀଗୁଡିକ ଦେୟ ପ୍ରଦାନ ମାମଲାର ଶୁଣାଣିକୁ ବର୍ତ୍ତମାନ ସର୍ବୋଚ୍ଚ ନ୍ୟାୟାଳୟ ସଂରକ୍ଷିତ ରଖିଛନ୍ତି। ଟେଲିକମ୍ କମ୍ପାନୀଗୁଡିକ କେତେ ସମୟ ମଧ୍ୟରେ ଦେୟ ପଇଠ କରିବେ ସେ ନେଇ ବର୍ତ୍ତମାନ ସୁଦ୍ଧା କୌଣସି ସୀମା ଜାରି ହୋଇ ନ ଥିବା ଜଣାପଡିଛି।
