ପଟ୍ଟାଙ୍ଗୀ, ୨୮।୧୦(ଡି.ଏନ.ଏ.): କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ ଅନ୍ତର୍ଗତ ତଥା ଆନ୍ଧ୍ର ସୀମାକୁ ଲାଗିଥିବା କୋଟିଆ ପଞ୍ଚାୟତକୁ ନେଇ ଦୁଇ ରାଜ୍ୟ ମଧ୍ୟରେ ବିବାଦ ଲାଗିରହିଛି। ବିଭିନ୍ନ ସମୟରେ ଉଭୟ ରାଜ୍ୟର ଜିଲା ପ୍ରଶାସନ କୋଟିଆରେ ନିଜ କାର୍ଯ୍ୟକ୍ରମ ଜାରି ରଖିଛନ୍ତି। ମଙ୍ଗଳବାର ଆନ୍ଧ୍ରର ସାଲୁର ପ୍ରଶାସନ ପକ୍ଷରୁ ନେରେଡିବଲାସାରେ ଗ୍ରାମସଭା କରାଯାଇଥିବା ବେଳେ ଏହାର ୨୪ ଘଣ୍ଟା ନ ପୂରୁଣୁ ଓଡ଼ିଶାର କୋରାପୁଟ ଜିଲା ଏହାର ଜବାବ ରଖିଛି। ବୁଧବାର କୋଟିଆ ପଞ୍ଚାୟତର ବିଭିନ୍ନ ଗ୍ରାମକୁ ଯିବାପାଇଁ ପଟ୍ଟାଙ୍ଗୀ ବ୍ଲକ ପ୍ରଶାସନ ପକ୍ଷରୁ ବିଭିନ୍ନ ସ୍ଥାନରେ ନାମଫଳକ ଲଗାଯାଇଛି। କୋଟିଆ ପଞ୍ଚାୟତକୁ ପ୍ରବେଶ କରୁଥିବା ସୀମାନ୍ତ ରାସ୍ତାଗୁଡ଼ିକରେ କଡାକଡି ସୁରକ୍ଷା ବ୍ୟବସ୍ଥା କରାଯାଇଛି। ପ୍ରଥମ ପର୍ଯ୍ୟାୟରେ ହରୁମାଣ୍ଡିଙ୍ଗି, ଫାଟୁସିନେରି, ଡୋଲିଆମ୍ବ, ତଳଗଞ୍ଜେଇପଦର ଓ ନେରେଡିବାଲସା ଗ୍ରାମର ଛକଗୁଡ଼ିକରେ ନାମଫଳକ ଲଗାଯାଇଛି। ପରବର୍ତ୍ତୀ ସମୟରେ ପଞ୍ଚାୟତର ସମସ୍ତ ଗ୍ରାମ ଛକରେ ନାମଫଳକ ଲାଗିବ ବୋଲି ବିଡିଓ ସୌମ୍ୟସାର୍ଥକ ମିଶ୍ର କହିଛନ୍ତି। ଏହି କାର୍ଯ୍ୟକ୍ରମରେ ଅତିରିକ୍ତ ବିଡିଓ କୃଷ୍ଣଚନ୍ଦ୍ର ବିଶ୍ୱାସରାଏ, ଏପିଓ ସୌମେନ୍ଦ୍ର ନାୟକ, କନିଷ୍ଠଯନ୍ତ୍ରୀ ଅଜୟରାମ ତରାଇ, ପିଇଓ ନବହନ୍ତାଳ ପ୍ରମୁଖ ସାମିଲ ହୋଇଥିଲେ।
