ଭେଡେନ,୨।୩(ଡି.ଏନ.ଏ.): ବରଗଡ ଜିଲା ଭେଡେନ ଟ୍ରେକର ଷ୍ଟାଣ୍ଡ ନିକଟରେ ଥିବା ସୁଲଭ ଶୌଚାଳୟ ଏବେ ବ୍ୟବହାର ଅନୁପଯୋଗୀ ହୋଇ ଭୂତକୋଠି ପାଲଟିଛି। ଲୋକେ ଏହାର ସୁଯୋଗ ନେଇ ଅଳିଆ ଆବର୍ଜନା ଏହା ଭିତରକୁ ଫିଙ୍ଗିଦେଉଥବାରୁ ପୂତିଗନ୍ଧମୟ ପରିବେଶ ସୃଷ୍ଟି ହେଉଛି। ଫଳରେ ଶୌଚାଳୟ ଚତୁଃପାର୍ଶ୍ୱରେ ରହୁଥିବା ପରିବାର ଅନେକ ସଂକ୍ରାମକ ରୋଗରେ ଆକ୍ରାନ୍ତ ହେଉଛନ୍ତି। ଶୌଚାଳୟ ନ ଥିବାରୁ ପ୍ରତ୍ୟହ ବ୍ଲକ ମହକୁମାକୁ ବିଭିନ୍ନ କାମରେ ଆସୁଥିବା ୨୨ଟି ପଞ୍ଚାୟତର ହଜାର ହଜାର ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ବିଶେଷ କରି ମହିଳାମାନେ ବେଶୀ ଅସୁବିଧା ଭୋଗୁଛନ୍ତି। ଏପରିକି ଜିଲା ସଦର ମହକୁମାକୁ ଯିବା ଆସିବା ପାଇଁ ବସ୍ଷ୍ଟାଣ୍ଡରେ ଅପେକ୍ଷାରତ ଯାତ୍ରୀମାନଙ୍କ ସମାନ ଅବସ୍ଥା। ଏହି ସୁଲଭ ଶୌଚାଳୟକୁ ପୁନରୁଦ୍ଧାର ପାଇଁ ସ୍ଥାନୀୟ ସରପଞ୍ଚ ଅକ୍ଷୟ ନାଏକ ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ବି କୌଣସି ପଦକ୍ଷେପ ଗ୍ରହଣ କରାଯାଉନାହିଁ। ତେବେ ଶୀଘ୍ର ଏହାର ପୁନରୁଦ୍ଧାର କରା ନ ଗଲେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ ବୋଲି ସରପଞ୍ଚ ନାଏକଙ୍କ ସମେତ ଅଞ୍ଚଳବାସୀ ଚେତାବନୀ ଦେଇଛନ୍ତି । ସୂଚନାଯୋଗ୍ୟ, ୧୯୯୪ ନଭେମ୍ବର ୨୭ରେ ବରଗଡର ତତ୍କାଳୀନ ଜିଲାପାଳଙ୍କ ଦ୍ୱାରା ଏହାର ଉଦ୍ଘାଟନ କରାଯାଇଥିଲା। ପରେ ଏହି ଶୌଚାଳୟ ମାତ୍ର ୩ ବର୍ଷ ସୂଚାରୁ ରୂପେ ଚାଲିବା ପରେ ବନ୍ଦ ହୋଇଯାଇଥିଲା ।
