ଖଡିଆଳ,୧୦।୧: ନୂଆପଡ଼ା ଜିଲା ଖଡିଆଳ ବ୍ଲକ ବିରିଘାଟ ପଞ୍ଚାୟତ ଗଦାପଦର ଗ୍ରାମରେ ପ୍ରଧାନମନ୍ତ୍ରୀ ଆବାସ ଯୋଜନାରେ ନିର୍ମାଣାଧୀନ ଘର ୪ ବର୍ଷ ପରେ ସମ୍ପୂର୍ଣ୍ଣ ନ ହୋଇ ପଡ଼ିରହିିଛି। ଗଦାପଦର ଗ୍ରାମର ବୃଦ୍ଧା କୁନ୍ଧନେ ମାଝି(୮୦)ଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ୨୦୧୭-୧୮ରେ କାର୍ଯ୍ୟାଦେଶ ପ୍ରଦାନ କରାଯାଇଥିଲା। ଗୃହ ନିର୍ମାଣ ପାଇଁ ପଞ୍ଚାୟତ ଜିଓଟେକ ନିଜେ ଠିକାରେ ନେଇଥିଲେ। ତୁରନ୍ତ ନିର୍ମାଣ କରିବାକୁ କହି ଘର ଫାଉଣ୍ଡେଶନ ବାବଦକୁ ପ୍ରଥମ କିସ୍ତି ୧୩ ଡିସେମ୍ବର, ୨୦୧୮ରେ ୨୦ ହଜାର ଟଙ୍କା ସମ୍ପୃକ୍ତ ଜିଓଟେକଙ୍କୁ ଦେଇଥିଲେ। ଟଙ୍କା ପାଇ ଗୋଟିଏ ବର୍ଷ ଗୃହ କାର୍ଯ୍ୟ କରି ନ ଥିଲେ। ଅନ୍ୟ ଲୋକଙ୍କ ଫାଉଣ୍ଡେଶନ ଫଟୋ ଦେଖାଇ ପୁଣି ଥରେ ୧୬ ଜୁଲାଇ, ୨୦୧୯ରେ ଦ୍ୱିତୀୟ କିସ୍ତି ୩୫ ହଜାର ଟଙ୍କା ଉଠାଇଥିଲେ ମଧ୍ୟ ଘର କାମ କରି ନ ଥିଲେ। ଜିଓଟେକ ଚଳିତ ବର୍ଷ ଘର କାମ ୬ ଫୁଟ ପର୍ଯ୍ୟନ୍ତ ଉଠାଇ ଅର୍ଦ୍ଧନିର୍ମିତ ଭାବେ ଛାଡି ଦେଇଛନ୍ତି। ନିୟମ ଅନୁଯାୟୀ ପ୍ରଧାନମନ୍ତ୍ରୀ ଆବାସ ଯୋଜନାକୁ ୮୪ ଦିନ ମଧ୍ୟରେ ସମ୍ପୂର୍ଣ୍ଣ କରି ଏମ୍ଜିଏନ୍ଆର୍ଇଜିଏସ୍ ଯୋଜନା ଅନୁଯାୟୀ ଦୈନିକ ୧୯୮ ଟଙ୍କା ହିସାବରେ ୨୦ ହଜାର ୫୧୦ ଟଙ୍କା ବିଲ ହୋଇସାରିଛି। ମୋଟ ୭୫ ହଜାର ୫୧୦ ଟଙ୍କା ଗୃହ ନିର୍ମାଣ ବାବଦକୁ ଉଠାଣ ହୋଇଛି। ଏପରି କି କୁନ୍ଧନେଙ୍କ ଦୁଇଟି କୋଠରି ନିର୍ମାଣ କରୁଥିବା ବେଳେ ୩ କୋଠରି ଥିବା ଫଟୋ ଦେଇ ଟଙ୍କା ଉଠାଣ ହୋଇଥିବା ଅଭିଯୋଗ ହେଉଛି। ସୂଚନାଯୋଗ୍ୟ ବିଧବା ବୃଦ୍ଧାଙ୍କ ଘର ନ ଥିବାରୁ ଅନ୍ୟ ଘରେ ଆଶ୍ରୟ ନେଉଛନ୍ତି। ଏ ନେଇ ଖଡିଆଳ ବିଡିଓ ଉତ୍ତମ କୁମାର ବାଗଙ୍କୁ ପଚାରିବାରୁ ପଞ୍ଚାୟତସ୍ତରରେ ମିଶନ ଶକ୍ତି ନାମରେ ଟ୍ରେନିଂ କ୍ୟାମ୍ପ କରାଯାଇଛି। ଏଥିରେ ହିତାଧିକାରୀଙ୍କ ସମସ୍ୟା କ’ଣ ଅଛି ସେ ନେଇ ସମାଧାନ କରି ଅର୍ଦ୍ଧନିର୍ମିତ ଗୃହଗୁଡିକ ସମ୍ପୂର୍ଣ୍ଣ କରାଯିବ ବୋଲି କହିଛନ୍ତି।
