ଭୁବନେଶ୍ୱର, ୩o।୧୨: ସାହିତ୍ୟ ପତ୍ରିକା ‘ଝୁମୁକା’ର ୩୬ ତମ ସାରସ୍ବତ ସମାରୋହ ଶୁକ୍ରବାର ଅନୁଷ୍ଠିତ ହୋଇଯାଇଛି। ଏଥିରେ ସହଜ ଓ ବୋଧଗମ୍ୟ ଭାଷାରେ ଶିଶୁ ସାହିତ୍ୟ ରଚନା କଲେ ଏହା ପାଠକଙ୍କ ନିକଟରେ ଅପହଞ୍ଚ ହେବ ନାହିଁ ବୋଲି ମତ ପ୍ରକାଶ ପାଇଛି।
ସ୍ଥାନୀୟ ବୁଦ୍ଧ ମନ୍ଦିର ପରିସରରେ ଅନୁଷ୍ଠିତ ଏହି ଉତ୍ସବରେ ବିଶିଷ୍ଟ ସାହିତ୍ୟ ସମାଲୋଚକ ଓ ପ୍ରାବନ୍ଧିକ ପ୍ରଫେସର ଯତୀନ୍ଦ୍ର କୁମାର ନାୟକ ମୁଖ୍ୟବକ୍ତା ଭାବରେ ଯୋଗଦେଇ କହିଛନ୍ତି, ସାହିତ୍ୟ ଜୀବନ ଦେଇଥାଏ। ଗଦ୍ୟ ସାହିତ୍ୟକୁ ବାଦ୍ ଦେଲେ ସାହିତ୍ୟ ରସୋତୀର୍ଣ୍ଣ ହୋଇପାରିବ ନାହିଁ l ଏଥିରେ ସମ୍ମାନିତ ବକ୍ତା ଭାବରେ ଯୋଗ ଦେଇ ଅସମୀୟା ସାହିତି୍ୟକା- ଅନୁବାଦିକା ନିର୍ମାଲି ମହନ୍ତ କହିଛନ୍ତି, ପରସ୍ପର ମଧ୍ୟରେ ଭାଷାର ଆଦାନ ପ୍ରଦାନ ପାଇଁ ଅନୁବାଦର ଆବଶ୍ୟକତା ରହିଛି l ଏହି ଅବସରରେ ” ଶିଶୁ ସାହିତ୍ୟର ବିକାଶରେ ଅନୁବାଦର ଭୂମିକା ” ଶୀର୍ଷକ ଏକ ରାଜ୍ୟ ସ୍ତରୀୟ ଆଲୋଚନା ଚକ୍ର ବିଶିଷ୍ଟ ସାହିତି୍ୟକ ଦାଶ ବେନହୁରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା। ‘ଝୁମୁକା’ ର ସମ୍ପାଦକ ମାନସ ରଞ୍ଜନ ସାମଲ ସମ୍ପାଦକୀୟ ପାଠ କରି କହିଥିଲେ, ପିଲାର ରୁଚି, ଆଗ୍ରହ ଓ ସାମର୍ଥ୍ୟକୁ ଲକ୍ଷ୍ୟ ରଖି ସାହିତ୍ୟ ସୃଷ୍ଟି କରିବାକୁ ଯୋଜନାବଦ୍ଧ ଉଦ୍ୟମ ଜରୁରୀ।
ତେବେ ଏହି କାର୍ଯ୍ୟକ୍ରମରେ ଝୁମୁକା ପୃଷ୍ଠାର ସଫଳ ଲେଖକ ତଥା ବିଜ୍ଞାନ ଭିତ୍ତିକ ଲେଖା ପାଇଁ ପ୍ରଫେସର ରମେଶ ଚନ୍ଦ୍ର ପରିଡାଙ୍କୁ ତାଙ୍କର ଜୀବନ୍ୟାପୀ ସାଧନା ପାଇଁ ମର୍ଯ୍ୟାଦାପୂର୍ଣ୍ଣ ଝୁମୁକା ପୁରସ୍କାର, ଲେଖିକା – ଅନୁବାଦିକା ସଂଘମିତ୍ରା ଭଞ୍ଜ, ନଗେନ୍ଦ୍ରନାଥ ପଟ୍ଟନାୟକ ଓ ଡ଼. ରବି ନାରାୟଣ ସାହୁଙ୍କୁ ଚଳିତ ବର୍ଷର ଝୁମୁକା ସାରସ୍ବତ ସମ୍ମାନ – ୨o୨୨ ପ୍ରଦାନ କରାଯାଇଥିଲା l ପୁରସ୍କୃତ ପ୍ରତିଭା ମାନଙ୍କୁ ଫଳକ, ଅଙ୍ଗବସ୍ତ୍ର, ମାନପତ୍ର ଓ ଉପାୟନ ଦେଇ ସମ୍ମାନିତ କରାଯାଇଥିଲା l ଉତ୍ସବରେ ଝୁମୁକାର ନୂଆବର୍ଷ – ୨o୨୩ ଅନୁବାଦ ବିଶେଷ ସଂଖ୍ୟା ଓ ରବି ନାରାୟଣ ସାହୁଙ୍କ ଲିଖିତ ” ଧନୁଯାତ୍ରା ଓ ଅନ୍ୟାନ୍ୟ ଗୀତିନାଟ୍ୟ ” ପୁସ୍ତକକୁ ଅତିଥିମାନେ ଲୋକାର୍ପିତ କରିଥିଲେ l ଶେଷରେ ସୁଜାତା ଦାଶ ଧନ୍ୟବାଦ ଦେବା ସହ କଣ୍ଠଶିଳ୍ପୀ ପ୍ରତିଭା ପ୍ରଧାନ ସଙ୍ଗୀତ ପରିବେଷଣ କରିଥିଲେ l ରାଜ୍ୟର ବିଭିନ୍ନ ଅଞ୍ଚଳରୁ ବହୁ ସାହିତି୍ୟକ ଏହି ଆଲୋଚନା ଚକ୍ରରେ ଅଂଶଗ୍ରହଣ କରିଥିଲେ l l
