ଭୁବନେଶ୍ୱର,୨୦ା୪(ବ୍ୟୁରୋ): ୨୦୨୩ ଏପ୍ରିଲ ପହିଲାରୁ ୧୫ ବର୍ଷ ପୂରଣ କରିଥିବା ବ୍ୟବସାୟିକ ବଡ଼ ଯାନବାହନକୁ ଆଉ ନବୀକରଣ ପାଇଁ ଅନୁମତି ମିଳିବ ନାହିଁ। ସେହି ଯାନଗୁଡ଼ିକୁ ୪ ମାସ ପାଇଁ ଅସ୍ଥାୟୀ ଅନୁମତି( ଟେମ୍ପରାରି ପର୍ମିଟ) ଦେବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ମୋଟର ଯାନ ଆଇନର ସେକ୍ସନ ୮୭ର ସବ୍ସେକ୍ସନ (୧) ଅନୁଯାୟୀ ଏହି ପର୍ମିଟ ଦିଆଯିବ। ଏ ନେଇ ପରିବହନ ବିଭାଗ ପକ୍ଷରୁ ରାଜ୍ୟ ପରିବହନ କର୍ତ୍ତୃପକ୍ଷ (ଏସ୍ଟିଏ) ଏବଂ ଆଞ୍ଚଳିକ ପରିବହନ କର୍ତ୍ତୃପକ୍ଷଙ୍କୁ ଚିଠି ଲେଖି ଲେଖାଯାଇଛି। ପୂର୍ବରୁ ପରିବହନ କର୍ତ୍ତୃପକ୍ଷ ବସ୍ ଓ ଅନ୍ୟାନ୍ୟ ଭାରିଯାନଗୁଡ଼ିକୁ ୫ ବର୍ଷିଆ ପର୍ମିଟ ଦେଉଥିଲେ। ବସ ମାଲିକମାନଙ୍କର ପରିସ୍ଥିତିକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନିଆଯାଇଛି। ଏଠାରେ ସୂଚନାଯୋଗ୍ୟ ୨୦୨୧ ଅଗଷ୍ଟ ମାସରେ କେନ୍ଦ୍ର ସରକାର ଜାତୀୟ ଅଟୋମୋବାଇଲ ସ୍କାରପେଜ ପଲିସି ଆରମ୍ଭ କରିଛନ୍ତି। ଆସନ୍ତା ୨୦୨୩ ଏପ୍ରିଲ ପହିଲାରୁ ଏହାକୁ କଡ଼ାକଡ଼ି ଭାବେ ଲାଗୁ କରାଯିବ। ଏଥିରେ ୧୫ ବର୍ଷ ଗାଡ଼ିଗୁଡ଼ିକର ଫିଟ୍ନେସ ଯାଞ୍ଚକୁ ବାଧ୍ୟତାମୂଳକ କରାଯାଇଛି। ସେହିପରି ୨୦୨୪ ଜୁନ ମାସରୁ ଅନ୍ୟାନ୍ୟ ୧୫ ବର୍ଷିଆ ଯାନବାହନଗୁଡ଼ିକର ଫିଟ୍ନେସ ପରୀକ୍ଷା ବାଧ୍ୟତାମୂଳକ କରାଯିବ। ସହରାଞ୍ଚଳରୁ ଯାନବାହନଜନିତ ପ୍ରଦୂଷଣ ହ୍ରାସ କରିବାକୁ ଏହି ନୀତି କାର୍ଯ୍ୟକାରୀ କରାଯାଇଛି।
