କୁହାଯାଏ ଯିଏ ବିପଦବେଳେ ସାହା ହୁଅନ୍ତି ସେ ପ୍ରକୃତ ବନ୍ଧୁ। ଖରାପ ସମୟରେ ହିଁ ଜଣାପଡ଼େ କିଏ ପ୍ରକୃତ ବନ୍ଧୁ ଓ କିଏ ବନ୍ଧୁ ମୁଖାଧାରୀ ଶତ୍ରୁ। ଆଉ ଦକ୍ଷିଣ ଆଫ୍ରିକାର ଏକ ଘଟଣାକୁ ଦେଖିଲେ ଜଣାପଡ଼େ ପ୍ରକୃତରେ ବନ୍ଧୁତାର ସଂଜ୍ଞା କ’ଣ। ଏଠାରେ ଗେର୍ଡି ମାକ୍କେନା ନାମ୍ନୀ ଜଣେ ମହିଳା ସ୍ତନ କର୍କଟ ରୋଗରେ ଆକ୍ରାନ୍ତ ହୋଇଥିଲେ। ତେଣୁ ତାଙ୍କୁ କେମୋ ଥେରାପୀ ଦିଆଯାଉଥାଏ। ଫଳରେ ଅତ୍ୟଧିକ କେଶ ଝଡ଼ିବା ଯୋଗୁ ଅନ୍ୟ କର୍କଟ ରୋଗୀଙ୍କ ପରି ସେ ବି କେଶ କାଟି ଲଣ୍ଡା ହେଲେ। କର୍କଟ ରୋଗର କଷ୍ଟ ସହ ସୌନ୍ଦର୍ଯ୍ୟ ନଷ୍ଟ ହେବାର ଯନ୍ତ୍ରଣା କେତେ ତାହା କେବଳ ଅନୁଭବୀ ହିଁ ଜାଣେ। ଏ ସମ୍ପର୍କରେ ଜାଣିବା ପରେ ତାଙ୍କର ୧୧ଜଣ ବାନ୍ଧବୀ ମାକ୍କେନୀଙ୍କ ମନରେ ଟିକେ ଖୁସି ଭରିବା ପାଇଁ ଆପଣେଇଥିଲେ ଏକ ଅଭିନବ ଉପାୟ। ସେମାନେ ମାକ୍କେନୀଙ୍କ ସହ ଏକ ଫଟୋଶୁଟ୍ କରିବାକୁ ଯୋଜନା କଲେ। ତେବେ ତାହା ସାଧାରଣ ଫଟୋଶୁଟ୍ରୁ ଥିଲା କିଛି ଊର୍ଦ୍ଧ୍ୱରେ। କାରଣ ତାଙ୍କ ବାନ୍ଧବୀମାନେ ନିଷ୍ପତ୍ତି ନେଇଥିଲେ ଯେ, ଲଣ୍ଡା ହୋଇ ମାକ୍କେନୀଙ୍କ ସହ ଫଟୋଶୁଟ୍ କରିବେ; ଯଦ୍ଦ୍ବାରା କି ମାକ୍କେନୀଙ୍କ ମୁହଁରେ ହସ ଫୁଟିବ। ଆଉ ତାଙ୍କର ଏହି ବିପତ୍ତି ସମୟରେ ତାଙ୍କ ବନ୍ଧୁମାନେ ପୂରାପୂରି ତାଙ୍କ ସହ ଅଛନ୍ତି ବୋଲି ଜାଣି ମନ ଦୃଢ଼ ହେବ। ଫଟୋଶୁଟ୍ ଦିନ ମାକ୍କେନୀ ଯେବେ ବାନ୍ଧବୀମାନଙ୍କୁ ଲଣ୍ଡା ଅବସ୍ଥାରେ ଦେଖିଲେ ତାଙ୍କ ଆଶ୍ଚର୍ଯ୍ୟର ସୀମା ନ ଥିଲା। ତାଙ୍କ ପ୍ରତି ତାଙ୍କ ବାନ୍ଧବୀମାନଙ୍କର ଏତେ ଭଲ ପାଇବା ଦେଖି ସେ ଖୁସିରେ କାନ୍ଦି ପକାଇଥିଲେ। ଦକ୍ଷିଣ ଆଫ୍ରିକାର ଫଟୋଗ୍ରାଫର ତଥା ଭିଡିଓଗ୍ରାଫର୍ ଅଲବର୍ଟ ବ୍ରେଣ୍ଡେନହାନ୍ ଏହି ମୁହୂର୍ତ୍ତକୁ ଭିଡିଓ କରିନେଇଥିଲେ। ତା’ସହ କରିଥିଲେ ଏହି ଅଭିନବ ଫଟୋଶୁଟ୍।
