ଗୁଆହାଟୀ,୧୬।୧୨:ଉତ୍ତରପୂର୍ବାଞ୍ଚଳର ୩ ରାଜ୍ୟ ନାଗାଲାଣ୍ଡ, ମେଘାଳୟ ଏବଂ ତ୍ରିପୁରା ନିର୍ବାଚନରେ କଂଗ୍ରେସ କ୍ଷମତାକୁ ଫେରିବାକୁ ହେଲେ ବହୁତ କିଛି କରିବାକୁ ପଡ଼ିବ। ଏକଦା ଏହି ଦଳ ସମଗ୍ର ଉତ୍ତରପୂର୍ବାଞ୍ଚଳରେ କ୍ଷମତାରେ ଥିଲା। ୨୦୧୪ରେ ଭାଜପା କ୍ଷମତାକୁ ଆସିବା ପରେ କଂଗ୍ରେସ ହାତରୁ ଗୋଟିଏ ପରେ ଗୋଟିଏ ରାଜ୍ୟ ଖସିବା ଆରମ୍ଭ ହୋଇଥିଲା। ଫେବୃୟାରୀରେ ଉପରୋକ୍ତ ୩ ରାଜ୍ୟରେ ଏକସଙ୍ଗେ ବିଧାନସଭା ନିର୍ବାଚନ ହେବା ଆଶା କରାଯାଉଛି। ତେବେ କୌଣସି ରାଜ୍ୟରେ କଂଗ୍ରେସ କ୍ଷମତା ଦୌଡ଼ରେ ନାହିଁ ଏବଂ ଅଧିକାଂଶ ନେତା ଦଳ ଛାଡ଼ି ଶାସକ ଦଳ କିମ୍ବା ଅନ୍ୟ ଦଳରେ ସାମିଲ ହୋଇଛନ୍ତି।
ନାଗାଲାଣ୍ଡରେ କଂଗ୍ରେସର ଆଦୌ ବିଧାୟକ ନ ଥିବାବେଳେ ତ୍ରିପୁରା ଓ ମେଘାଳୟରେ ଜଣେ ଲେଖାଏ ବିଧାୟକ ରହିଛନ୍ତି। ଚଳିତ ବର୍ଷ ଆରମ୍ଭରେ ମେଘାଳୟର ୫ କଂଗ୍ରେସ ବିଧାୟେକ କନ୍ରାଡ ସାଙ୍ଗମା ସରକାରଙ୍କ ଆଡ଼କୁ ଢଳୁଥିବା ଜଣାପଡ଼ିବା ପରେ ଦଳ ତାଙ୍କୁ ନିଲମ୍ବନ କରିଥିଲା। ୨୦୧୮ ବିଧାନସଭା ନିର୍ବାଚନରେ କଂଗ୍ରେସ ଏକକ ସଂଖ୍ୟାଗରିଷ୍ଠ ଦଳ ହୋଇଥିଲେ ମଧ୍ୟ ସେଠାରେ ନ୍ୟାଶନାଲ ପିପୁଲ୍ସ ପାର୍ଟି (ଏନ୍ପିପି) ନେତୃତ୍ୱରେ ସରକାର ଗଢ଼ାଯାଇଥିଲା। ଗତବର୍ଷ ନଭେମ୍ବରରେ ୧୭ କଂଗ୍ରେସ ବିଧାୟକଙ୍କ ମଧ୍ୟରୁ ୧୨ ଜଣ ପୂର୍ବତନ ମୁଖ୍ୟମନ୍ତ୍ରୀ ମୁକୁଲ ସାଙ୍ଗମାଙ୍କ ନେତୃତ୍ୱରେ ତୃଣମୂଳ କଂଗ୍ରେସରେ ଯୋଗ ଦେଇଥିଲେ। ଫଳରେ ମମତା ବାନାର୍ଜୀଙ୍କ ଦଳ ସେଠାରେ ମୁଖ୍ୟ ବିରୋଧୀ ଦଳ ହୋଇଥିଲା।
ସେହିପରି ତ୍ରିପୁରା ବିଧାନସଭାରେ ସୁଦୀପ ରାୟ ବର୍ମନ ଏକମାତ୍ର କଂଗ୍ରେସ ବିଧାୟକ। ସେ ପୂର୍ବ ନିର୍ବାଚନରେ ଭାଜପା ଟିକେଟରେ ବିଜୟୀ ହୋଇ ମନ୍ତ୍ରିମଣ୍ଡଳରେ ସାମିଲ ହୋଇଥିଲେ ମଧ୍ୟ ପରବର୍ତ୍ତୀ ସମୟରେ ବିଧାନସଭାରୁ ଇସ୍ତଫା ଦେଇଥିଲେ ଏବଂ ଉପନିର୍ବାଚନରେ କଂଗ୍ରେସ ଟିକେଟରେ ବିଜୟୀ ହୋଇଥିଲେ। ସେହିପରି ନାଗାଲାଣ୍ଡ ବିଧାନସଭା ୨୦୧୮ରୁ କଂଗ୍ରେସ ଶୂନ୍ୟ ରହିଛି। ସେଠାରେ ଭାଜପା, ନ୍ୟାଶନାଲ ଡେମୋକ୍ରାଟିକ୍ ପ୍ରୋଗ୍ରେସିଭ୍ ପାର୍ଟି ଏବଂ ନାଗା ପିପୁଲ୍ସ ଫ୍ରଣ୍ଟର ମେଣ୍ଟ ସରକାର ଚାଲିଛି।
