ଶ୍ରୀନଗର,୧୭।୧୦: ଜମ୍ମୁ-କଶ୍ମୀରରେ ଆତଙ୍କବାଦୀମାନେ ସାଧାରଣ ଲୋକଙ୍କୁ ଟାର୍ଗେଟ କରି ଆତଙ୍କ ସୃଷ୍ଟି କରିବାକୁ ଚେଷ୍ଟା କରୁଛନ୍ତି। ବିଶେଷକରି ଅଣ-ମୁସଲମାନ ଏବଂ ଅଣ-କାଶ୍ମୀରବାସୀଙ୍କୁ ଟାର୍ଗେଟ କରାଯାଉଛି। ପାକିସ୍ତାନ ଗୁପ୍ତଚର ସଂସ୍ଥା ଆଇଏସ୍ଆଇ ନିର୍ଦ୍ଦେଶରେ ଏକ ଷଡ଼ଯନ୍ତ୍ର ରଚାଯାଇଛି। ଏନେଇ ଭାରତୀୟ ଗୋଇନ୍ଦା ସଂସ୍ଥା ପକ୍ଷରୁ ଏକ ରିପୋର୍ଟ ପ୍ରକାଶ ପାଇଛି।
ରିପୋର୍ଟରେ ଉଲ୍ଲେଖ କରାଯାଇଛି ଯେ, ଆଇଏସ୍ଆଇ ନିର୍ଦ୍ଦେଶରେ ଆତଙ୍କବାଦୀମାନେ ୨୦୦ରୁ ଅଧିକ ସ୍ଥାନୀୟ ଲୋକଙ୍କର ଏକ ହିଟ୍ଲିଷ୍ଟ୍ ପ୍ରସ୍ତୁତ କରିଛନ୍ତି। ତାଲିକାରେ ସରକାରଙ୍କ ନିକଟତମ ବ୍ୟକ୍ତି ବିଶେଷ, ଗଣମାଧ୍ୟମରେ କାର୍ଯ୍ୟ କରୁଥିବା ଲୋକେ, କଶ୍ମୀର ପଣ୍ଡିତ ଏବଂ ସୁରକ୍ଷା ବାହିନୀ ସହ ଯୋଗାଯୋଗ କରୁଥିବା ବ୍ୟକ୍ତିଙ୍କ ନାମ ରହିଛି।
ପୁରୁଣା ଆତଙ୍କବାଦୀ ସଂଗଠନକୁ ସହାୟତା କରିବା ଲାଗି ଆଇଏସ୍ଆଇ ନୂଆ ସଂଗଠନ ଗଠନ ଉପରେ ଗୁରୁତ୍ୱାରୋପ କରୁଛି। ଗତ ବର୍ଷ ଲଶ୍କର ଇ ତୋଏବାର ନୂଆ ସଂଭଗଠନ ‘ଦ ରେଜିଷ୍ଟାନ୍ସ ଫୋର୍ସ’(ଟିଆରଏଫ) ଗଠନ କରାଯାଇଥିଲା। ଏହି ସଂଗଠନ ଦ୍ୱାରା ଲଗାତାର ସାଧାରଣ ନାଗରିକଙ୍କୁ ହତ୍ୟା କରାଯାଉଛି। ଏହି କ୍ରମରେ, ଗିଲାନି ନାମରେ ଏକ ସଂଗଠନ ମଧ୍ୟ ଗଠନ କରାଯାଇଛି।
ଆତଙ୍କବାଦୀଙ୍କ ରାଡାରରେ ଏବେ ସରକାରଙ୍କ ନିକଟତର ଲୋକେ ରହିଛନ୍ତି। ସେହିପରି ଭାରତରେ ସୀମାପାର୍ ଅନୁପ୍ରବେଶ ବୃଦ୍ଧି ପାଇଁ ଆଇଏସ୍ଆଇ ପକ୍ଷରୁ ଆବଶ୍ୟକ ସହାୟତା ଆତଙ୍କବାଦୀ ସଂଗଠନଗୁଡ଼ିକୁ ଯୋଗାଇ ଦିଆଯାଉଛି। ସେହିପରି ପାକିସ୍ତାନ ଫରଓ୍ବାର୍ଡ ପୋଷ୍ଟ ନିକଟରେ ଥିବା ଲଞ୍ଚ୍ ପ୍ୟାଡ୍ରେ ଅନୁପ୍ରବେଶ ଲାଗି ଆତଙ୍କବାଦୀଙ୍କୁ ପ୍ରସ୍ତୁତ ରଖାଯାଇଥିବା ଗୋଇନ୍ଦା ବିଭାଗ ପକ୍ଷରୁ ସତର୍କ ସୂଚନା ଜାରି ହୋଇଛି।
