ରାଜୌରୀ/ଜମ୍ମୁ,୩।୧: ଜମ୍ମୁ-କଶ୍ମୀରର ରାଜୌରୀ ଜିଲା ଅନ୍ତର୍ଗତ ଡାଙ୍ଗ୍ରୀ ଗ୍ରାମରେ ଆତଙ୍କବାଦୀମାନେ ୧୪ ଘଣ୍ଟା ମଧ୍ୟରେ ଦ୍ୱିତୀୟ ଆକ୍ରମଣ କରିଛନ୍ତି। ଏଥିରେ ଦୁଇ ନାବାଳକ ଭାଇଭଉଣୀ ପ୍ରାଣ ହରାଇବା ସହ ୬ ଜଣ ଆହତ ହୋଇଛନ୍ତି। ଦୁଇଟି ଆକ୍ରମଣରେ ମୋଟ ୬ ଜଣଙ୍କ ମୃତ୍ୟୁ ଘଟିଲାଣି। ରବିବାର ସନ୍ଧ୍ୟାରେ ଆତଙ୍କବାଦୀଙ୍କ ଗୁଳିରେ ୪ ଜଣ ନିହତ ହେବା ସହ ଅନ୍ୟ ୬ ଜଣ ଆହତ ହୋଇଥିଲେ। ସୋମବାର ସକାଳ ସାଢ଼େ ୯ଟା ବେଳେ ଡାଙ୍ଗ୍ରୀ ଗ୍ରାମରେ ଆତଙ୍କବାଦୀ ବିସ୍ଫୋରଣ ଘଟାଇବାରୁ ସାନ୍ଭି ଶର୍ମା(୭) ଏବଂ ବିହାନ କୁମାର ଶର୍ମା (୪)ଙ୍କର ଜୀବନ ଯାଇଛି। ଆକ୍ରମଣ ପ୍ରତିବାଦରେ ରାଜୌରୀ ସହର ସମେତ ଜିଲାର ବିଭିନ୍ନ ସ୍ଥାନରେ ବିକ୍ଷୋଭ ପ୍ରଦର୍ଶନ କରାଯାଇଛି। ଆତଙ୍କବାଦୀମାନେ ବରିଷ୍ଠ ଅଫିସରଙ୍କୁ ଟାର୍ଗେଟ କରିବା ଉଦ୍ଦେଶ୍ୟରେ ଆଇଇଡି ବିସ୍ଫୋରଣ ଘଟାଇଥିଲେ ବୋଲି ଜମ୍ମୁ-କଶ୍ମୀର ପୋଲିସ ମହାନିର୍ଦ୍ଦେଶକ (ଡିଜିପି) ଦିଲ୍ବାଗ ସିଂ କହିଛନ୍ତି। ଗ୍ରାମ ପ୍ରତିରକ୍ଷା କମିଟି (ଭିଡିସି)କୁ ପୁନର୍ଗଠନ କରାଯାଇ ସେମାନଙ୍କୁ ଅସ୍ତ୍ରଶସ୍ତ୍ର ଯୋଗାଇ ଦିଆଯିବ ବୋଲି ଦିଲ୍ବାଗ ଘୋଷଣା କରିଛନ୍ତି। ପୂର୍ବରୁ ଭିଡିସିରୁ ୬୦ ପ୍ରତିଶତ ବନ୍ଧୁକ ଫେରାଇ ନିଆଯାଇଥିବା ବରିଷ୍ଠ ଭାଜପା ନେତା ତଥା ପୂର୍ବତନ ଏମ୍ଏଲ୍ସି ବିବୋଧ ଗୁପ୍ତା କହିଛନ୍ତି। ଡିଜିପି ବିକ୍ଷୋଭକାରୀଙ୍କୁ ଭେଟି ବୁଝାଶୁଝା କରିଥିଲେ।
