ଭୁବନେଶ୍ୱର,୨୪।୪(ବ୍ୟୁରୋ): ରାଜଧାନୀର ବିଭିନ୍ନ ଥାନା ଅଞ୍ଚଳରେ ମୋବାଇଲ ଓ ସୁନା ଚେନ୍ ଲୁଟ୍ପାଟ୍ କରି ଆତଙ୍କ ଖେଳାଉଥିବା ଜଣେ ପେଷାଦାର ଲୁଟେରାଙ୍କୁ ବଡ଼ଗଡ଼ ଥାନା ପୋଲିସ ଗିରଫ କରିଛି। ସେ ହେଲେ ଖଣ୍ଡଗିରି ଥାନା ଅନ୍ତର୍ଗତ ବରମୁଣ୍ଡାରେ ରହୁଥିବା ନୟାଗଡ଼ ଜିଲା ଟାଉନ ଥାନା ଅଞ୍ଚଳର ରଞ୍ଜନ ପ୍ରଧାନ। ଏଥିସହ ରଞ୍ଜନଙ୍କ ବୟାନ ଆଧାରରେ ତାଙ୍କଠାରୁ ଲୁଟ୍ ତଥା ଚୋରି ମୋବାଇଲ ଓ ସୁନା ଚେନ୍ କିଣୁଥିବା ୨ ଅଭିଯୁକ୍ତ ମଧ୍ୟ ଗିରଫ ହୋଇଛନ୍ତି। ମୋବାଇଲ କିଣୁଥିବା ଆଲୋକ ନାୟକଙ୍କୁ କ୍ୟାପିଟାଲ ଥାନା ଓ ସୁନା ଚେନ୍ କିଣୁଥିବା ଚନ୍ଦନ ମହାରଣାଙ୍କୁ ଖାରବେଳନଗର ଥାନା ପୋଲିସ ଗିରଫ କରିଛି। ଆଲୋକଙ୍କଠାରୁ ୬ଟି ଚୋରା ମୋବାଇଲ, ଚନ୍ଦନଙ୍କଠୁ ୨ଟି ଚେନ ଏବଂ ମୁଖ୍ୟ ଅଭିଯୁକ୍ତ ରଞ୍ଜନଙ୍କ ପାଖରୁ ୨ଟି ସୁନା ଚେନ୍ ଓ ଗୋଟିଏ ବାଇକ ଜବତ ହୋଇଛି। ତିନି ଥାନାରେ ରୁଜୁ ହୋଇଥିବା ୩ଟି ମାମଲାରେ ଅଭିଯୁକ୍ତମାନଙ୍କୁ ରବିବାର କୋର୍ଟଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ସମସ୍ତଙ୍କୁ ଜେଲକୁ ପଠାଇ ଦିଆଯାଇଛି। ତେବେ ରଞ୍ଜନ ଜଣେ ପେଷାଦାର ଲୁଟେରା ହୋଇଥିବାବେଳେ ତାଙ୍କ ନାମରେ ଭୁବନେଶ୍ୱରର ବିଭିନ୍ନ ଥାନାରେ ୩୦ଟି ମାମଲା ରହିଛି। ତେଣୁ ତାଙ୍କ ବିରୋଧରେ ସିଆର୍ପିସି-୧୧୦ ଧାରା ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କମିଶନରେଟ ପୋଲିସ ପକ୍ଷରୁ କୁହାଯାଇଛି।
ଅନୁଯାୟୀ, ରଞ୍ଜନ ବିଶେଷକରି କ୍ୟାପିଟାଲ, ଏୟାରଫିଲ୍ଡ, ଏୟାରପୋର୍ଟ, ଖାରବେଳନଗର ଓ ବଡ଼ଗଡ଼ ଥାନା ଅଞ୍ଚଳରେ ଲୁଟ୍ପାଟ୍ କରୁଥିଲେ। ଏପରିକି ଏହି ମାମଲାରେ ସେ ଏକାଧିକଥର ଜେଲ୍ ଯାଇଛନ୍ତି। ଏକ ମାମଲାରେ ସେ ୨ ସପ୍ତାହ ତଳେ ବେଲ୍ରୁ ଆସିବା ପରେ ପୁଣି ଲୁଟ୍ପାଟ୍ ଜାରି ରଖିଥିଲେ। ଶୁକ୍ରବାର ମୋନାଲିସା ମହାନ୍ତିଙ୍କୁ ରଞ୍ଜନ ଓ ତାଙ୍କ ସହଯୋଗୀ କାଳିଆ ନାୟକ ଟାର୍ଗେଟ କରିଥିଲେ। ମୋନାଲିସା ତାଙ୍କ ପୁଅକୁ ସ୍କୁଟିରେ ବସାଇ ବିଜେବି କଲେଜରେ ପଢ଼ୁଥିବା ତାଙ୍କୁ ଝିଅଙ୍କୁ ଆଣିବାକୁ ଯାଇଥିଲେ। ଦିନ ପ୍ରାୟ ୧ଟାବେଳେ ବଡ଼ଗଡ଼ ଥାନା ଅନ୍ତର୍ଗତ ତାରା ପଟ୍ଟନାୟକ ଗଳି ଦେଇ ଘରକୁ ଫେରୁଥିଲେ। ପଛରେ ତାଙ୍କ ଝିଅ ମଧ୍ୟ ଅନ୍ୟଏକ ସ୍କୁଟିରେ ଆସୁଥିଲେ। ଏହି ସମୟରେ ପିଛା କରୁଥିବା ଅଭିଯୁକ୍ତଦ୍ୱୟ ମୋନାଲିସାଙ୍କ ବେକରୁ ସୁନା ଚେନ୍ ଝାମ୍ପି ନେଇ ଫେରାର ହୋଇଯାଇଥିଲେ। ଫଳରେ ସ୍କୁଟିରୁ ପଡ଼ି ମୋନାଲିସା ଓ ତାଙ୍କ ପୁଅ ଗୁରୁତର ଆହତ ହୋଇଥିଲେ। ଏନେଇ ମହିଳାଙ୍କ ସ୍ବାମୀ ମନୋଜ କୁମାର ପାତ୍ର ଥାନାରେ ଏତଲା ଦେବା ପରେ ପୋଲିସ ଏକ ମାମଲା (ନଂ.୧୯୯/୨୦୨୩) ରୁଜୁ କରି ତଦନ୍ତ ଆରମ୍ଭ କରିଥିଲା। ଶନିବାର ରଞ୍ଜନ ଧରାପଡ଼ିବା ପରେ ସେ ଆଲୋକଙ୍କୁ ମୋବାଇଲ ଓ ଚନ୍ଦନଙ୍କୁ ଚେନ ବିକ୍ରି କରୁଥିଲେ ବୋଲି ସ୍ବୀକାର କରିଥିଲେ।
