ଲକ୍ଷ୍ନୌ, ୫।୫ : ଉତ୍ତରପ୍ରଦେଶର କାଶୀ ଘାଟକୁ ଆକର୍ଷିତ କରିବା ଲାଗି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ନୂଆ ଯୋଜନା ପ୍ରସ୍ତୁତ କରିଛନ୍ତି। ଏଠାରେ ତମ୍ବୁ ସହର ନିର୍ମାଣ ଲାଗି ଯୋଜନା ପ୍ରସ୍ତୁତ ହୋଇଛି। ପୃଥିବୀର ବିଭିନ୍ନ ସ୍ଥାନରୁ ଶ୍ରଦ୍ଧାଳୁମାନେ ଗଙ୍ଗା କୂଳରେ ଥିବା କାଶୀ ଘାଟକୁ ଆସିଥାନ୍ତି। ବର୍ତ୍ତମାନ ଦୁନିଆର ସର୍ବ ପୁରାତନ ସହର କାଶୀରେ ତମ୍ବୁ ସହର( ଟେଣ୍ଟ ସିଟି) ନିର୍ମାଣ ହେବାକୁ ଯାଉଛି।
ଏହି ତମ୍ବୁ ସହର ନବରାତ୍ରରୁ ଆରମ୍ଭ କରି ଶିବରାତ୍ରୀ ପର୍ଯ୍ୟନ୍ତ କାଶୀର ଐତିହାସିକ ଘାଟ ସମ୍ମୁଖରେ ବାଲି ଉପରେ ନିର୍ମିତ ହେବ। ଗଙ୍ଗା କୂଳରେ ଥିବା ଏହି ଟେଣ୍ଟ ସହରରୁ, ସୁନ୍ଦର ଅର୍ଦ୍ଧଚନ୍ଦ୍ରାକୃତିର ୮୪ ଘାଟ ଦେଖିବାର ସୁଯୋଗ ମିଳିବ। ଏଠାରେ ଖାଦ୍ୟ, ପାରମ୍ପାରିକ ମନୋରଞ୍ଜନ, ଆଧ୍ୟାତ୍ମିକତା ଏବଂ କର୍ପୋରେଟ ସେମିନାର୍ ଏବଂ ସମ୍ମିଳନୀ ଆୟୋଜନ କରିବା ପାଇଁ ଏହି ଟେଣ୍ଟ ସିଟିରେ ସୁବିଧା ରହିବ।
କାଶୀର ନବୀକରଣ ପରେ ବାରାଣାସୀରେ ଏହାର ପରିବର୍ତ୍ତନଶୀଳ ରୂପ ଦେଖିବାକୁ ପର୍ଯ୍ୟଟକଙ୍କ ସଂଖ୍ୟା କ୍ରମାଗତ ଭାବରେ ବୃଦ୍ଧି ପାଉଛି। ଏଭଳି ପରିସ୍ଥିତିରେ ଯୋଗୀ ପର୍ଯ୍ୟଟକଙ୍କୁ ଉନ୍ନତ ସୁବିଧା ଯୋଗାଇବା ପାଇଁ ଗଙ୍ଗା କୂଳରେ ଏହି ଟେଣ୍ଟ ସହର ନିର୍ମାଣ ପାଇଁ ଏକ ପ୍ରସ୍ତାବ ଆଣୁଛନ୍ତି। ବାରାଣାସୀ ବିକାଶ ପ୍ରାଧିକରଣର ଉପାଧ୍ୟକ୍ଷ ଇଶା ଦୁହାନ କହିଛନ୍ତି ଯେ ପ୍ରାୟ ୫୦୦ ହେକ୍ଟରରେ ଗଙ୍ଗାର ଅପର ପାର୍ଶ୍ୱରେ ଥିବା ଆସୀ ଘାଟ ବାଲିରେ ରାମନଗରର କେଟସର ଅଞ୍ଚଳରେ ତମ୍ବୁ ସହର ସ୍ଥାପନ କରାଯିବ। ଆବଶ୍ୟକତା ଅନୁଯାୟୀ ଏହାକୁ ବୃଦ୍ଧି ମଧ୍ୟ କରାଯାଇପାରିବ।
ଗଙ୍ଗାରେ ବନ୍ୟା ସମୟରେ ତମ୍ବୁଗୁଡିକ ହଟାଯିବ। ଟେଣ୍ଟ ସହର ଏନ୍ଏଚ୍-୧୯ ଠାରୁ ୪ କିଲୋମିଟର, ରାମନଗର ଦୁର୍ଗଠାରୁ ୧ କିଲୋମିଟର, ବାରାଣାସୀ ରେଳ ଷ୍ଟେଶନରୁ ୧୦ କିଲୋମିଟର, ପଣ୍ଡିତ ଦିନଦୟାଲ ଉପାଧ୍ୟାୟ ରେଳ ଷ୍ଟେଶନଠାରୁ ୧୩ କିଲୋମିଟର ଏବଂ ବାରାଣାସୀ ବିମାନବନ୍ଦରଠାରୁ ୩୩ କିଲୋମିଟର ଦୂର ବୋଲି ଇଶା ଦୁହାନ କହିଛନ୍ତି ।
