ନୂଆଦିଲ୍ଲୀ,୧୨।୧୨: କ୍ରିକେଟର ଭଗବାନ କୁହାଯାଉଥିବା ଭାରତୀୟ ବ୍ୟାଟ୍ସମ୍ୟାନ୍ ନିଜ କ୍ୟାରିୟରରେ ଅନେକ ବୋଲରଙ୍କ ବଲ୍କୁ ଖେଳିଛନ୍ତି। ସେନ ଓ୍ବାର୍ନ, ମୁଥୟା ମୁରଲୀଧରନ୍, ଗ୍ଲୋନ୍ ମୈକ୍ସୋ, ଓ୍ବକାର ୟୁନିସ, ଓ୍ବାସିମ୍ ଅକ୍ରମ ଏବଂ ଏଲନ୍ ଡୋନାଲ୍ଡଙ୍କ ଭଳି ଦିଗ୍ଗଜଙ୍କ ବଲ୍ରେ ଚଉକା-ଛକା ମାରିଛନ୍ତି। ଏବେ ଯଦି ସଚିନ କ୍ରିକେଟ ଖେଳୁଥାନ୍ତେ ତେବେ କେଉଁଭଳି ବୋଲରଙ୍କ ସମ୍ମୁଖୀନ ହୋଇଥାନ୍ତେ, କାହାର ବଲ୍କୁ ଖେଳିବା ପସନ୍ଦ କରିଥାନ୍ତେ ବୋଲି ଅନେକ ପ୍ରଶ୍ନ କରିଥାନ୍ତି। ସଚିନ ନିଜେ ଏହାର ଉତ୍ତର ଦେଇଛନ୍ତି।
ସଚିନ ନିଜ ୟୁଟ୍ୟୁବ୍ ଚ୍ୟାନେଲରେ କହିଛନ୍ତି, ଆଜିକାଲିର ସମୟରେ ସେ ଖେଳୁଥିଲେ ପୈଟ୍ କ୍ୟୁମିନ୍ସ, ଜୋଫ୍ରା ଆର୍ଚର, ଜସପ୍ରିତ ବୁମରାହ, ନାଥନ ଲିୟୋନ, ମିସେଲ ଷ୍ଟାର୍କ, କଗିସୋଙ୍କ ବଲ୍କୁ ଖେଳିବାକୁ ଚାହିଁଥାନ୍ତେ। ତେବେ ବିଶେଷକରି ଆଫଗାନିସ୍ତାନର ଲେଗ୍ ସ୍ପିନର ରଶିଦ ଖାନଙ୍କ ବଲ୍ ଖେଳିବାକୁ ଚାହଁନ୍ତି ବୋଲି କହି ସମସ୍ତଙ୍କୁ ଚମକାଇ ଦେଇଛନ୍ତି। କାରଣ ରଶିଦଙ୍କ ବୋଲିଂ ବହୁତ ଭୟଙ୍କର ବୋଲି ସେ କହିଛନ୍ତି।
ଆଇପିଏଲ୍ ୨୦୧୩ରେ ସେ ଶେଷଥର ପାଇଁ ଆଇପିଏଲ୍ରେ ଖେଳିଥିଲେ। ଏହାପରେ ସେ କ୍ରିକେଟରୁ ସନ୍ୟାସ ନେଇଥିଲେ। ହେଲେ ରଶିଦ ୨୦୧୫ରେ ନିଜର ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିଲେ। ୨୦୧୭ରେ ସେ ପ୍ରଥମ ଆଇପିଏଲ୍ ଖେଳିଥିଲେ। ଏଥିଯୋଗୁ ଉଭୟ ପରସ୍ପରକୁ ଭେଟି ପାରିନାହାନ୍ତି। ଏଣୁ ଯଦି ଏବେ ପୀଢ଼ିର କୌଣସି ବୋଲରଙ୍କ ସାମ୍ନା କରିବାକୁ ଚାହାନ୍ତି ତେବେ ସେ ରଶିଦ ବୋଲି ସଚିନ କହିଛନ୍ତି।
