ଲୋଇସିଂହା,୧୮।୪(ସୁଶାନ୍ତ ବାରିକ):ବଲାଙ୍ଗୀର ଜିଲାର ନବଗଠିତ ଲୋଇସିଂହା ଏନଏସିରେ ସଫେଇ କାମ ଓ ଉପକରଣ ଯୋଗାଣରେ ଟେଣ୍ଡର ଫିକ୍ସିଂ ହୋଇଥିବା ଅଭିଯୋଗ ହେଉଛି। ଗତ ଫେବୃୟାରୀ ୨୫ ତାରିଖରେ ଲୋଇସିଂହା ଏନଏସିର ଅସ୍ଥାୟୀ କାର୍ଯ୍ୟାଳୟକୁ ଆଭାସି ମାଧ୍ୟମରେ ସ୍ବାସ୍ଥ୍ୟମନ୍ତ୍ରୀ ଡ. ମୁକେଶ ମହାଲିଙ୍ଗ ଉଦ୍ଘାଟନ କରିଥିଲେ। ସେହି ସମୟରେ ଏଠାରେ ଉପଜିଲାପାଳ ଆଲୋକ ପଟେଲ ଉପସ୍ଥିତ ଥିଲେ। ଲୋଇସିଂହା ବିଡିଓ ଅକ୍ଷୟ ପାଣି ଉଦ୍ଦୁ ଏନଏସିର ଭାରପ୍ରାପ୍ତ କାର୍ଯ୍ୟନିର୍ବାହୀ ଅଧିକାରୀ ଦାୟିତ୍ୱରେ ରହିଛନ୍ତି। ନବଗଠିତ ଲୋଇସିଂହା ଏନଏସି ଅଞ୍ଚଳରେ ପ୍ରଥମ ଦଫାରେ ମାର୍ଚ୍ଚ ୧୯ ତାରିଖରେ ଏନଏସି ପକ୍ଷରୁ ସଫେଇ ଓ ଉପକରଣ ଯୋଗାଣ ପାଇଁ ଟେଣ୍ଡର ଆହ୍ବାନ କରାଯାଇଥିଲା। ଟେଣ୍ଡର ଦାଖଲର ଶେଷ ତାରିଖ ମାର୍ଚ୍ଚ ୨୬ ଅପରାହ୍ନ ୫ଟା ସୁଦ୍ଧା ରଖାଯାଇଥିଲା। ପ୍ରାପ୍ତ ଟେଣ୍ଡରଗୁଡିକୁ ସେହି ମାସ ୩୦ ତାରିଖ ଅପରାହ୍ନ ୩ଟାରେ ଖୋଲାଯିବ ବୋଲି କୁହାଯାଇଥିଲା ା ଟେଣ୍ଡର ପେପର ମୂଲ୍ୟ ଜିଏସଟି ସହିତ ୫୯ ହଜାର ଟଙ୍କା ନିର୍ଦ୍ଧାରିତ ହୋଇଥିଲା। ସଫେଇ କାମ ପାଇଁ ପ୍ରତି ମାସରେ ପ୍ରାୟ ୧୩ ଲକ୍ଷ ୯୦ ହଜାର ୪୨୨ ଟଙ୍କା ନିର୍ଦ୍ଧାରିତ ହୋଇଛି ା ଚୁକ୍ତି ସମୟ ସୀମା ୩ ବର୍ଷ ରହିଛି। ଟେଣ୍ଡରରେ ଭାଗ ନେବା ପାଇଁ ୩୦ ହଜାର ଟଙ୍କା ଜମା କରିବାକୁ କୁହାଯାଇଥିଲା। ଏହାସହିତ ଟେଣ୍ଡର ପାଇଥିବା ବ୍ୟକ୍ତିଙ୍କୁ ୫୦ ହଜାର ଟଙ୍କା ସିକ୍ୟୁରିଟି ବାବଦକୁ ପଇଠ କରିବାକୁ କୁହାଯାଇଥିଲା ା ଏହାପୂର୍ବରୁ ୨୪ ମାର୍ଚ୍ଚରେ ବିଡିଓ ତଥା ଏନଏସି କାର୍ଯ୍ୟନିର୍ବାହୀ ଅଧିକାରୀ ଉଦ୍ଦୁ, ବ୍ଲକ ସହକାରୀ ଯନ୍ତ୍ରୀ ସିଦ୍ଧାର୍ଥ ପାଢୀ, ବିଏଫଓ ସଚିଦାନନ୍ଦ ଭୂଏ, ଏମଆଇଏସ ଏହି ୪ ଜଣଙ୍କୁ ନେଇ ଚୟନ କମିଟି ଗଠନ କରାଯାଇଥିଲା। ବିଡଓଙ୍କୁ ବାଦ ଦେଲେ ବାକି ୩ ଜଣ ଅଧିକାରୀ ଏହି କମିଟି ସମ୍ପର୍କରେ ଏବଂ ଟେଣ୍ଡର ପ୍ରକ୍ରିୟା ନେଇ ଅବଗତ ନ ଥିବା କହିଛନ୍ତି। ଏପରି କି ଏନଏସି କାର୍ଯ୍ୟାଳୟରେ ଟେଣ୍ଡର ବାବଦକୁ ନୋଟିସ ମଧ୍ୟ ହୋଇନଥିବା କୁହାଯାଉଛି। ଲୁଚାଛପାରେ ଟେଣ୍ଡର ସଂକ୍ରାନ୍ତରେ ବିଜ୍ଞାପନ ହୋଇଥିବାରୁ ସ୍ଥାନୀୟ ଗଣମାଧ୍ୟମ ପ୍ରତିନିଧି ଓ ଠିକଦାର ଏ ବାବଦରେ ଜାଣିପାରି ନ ଥିଲେ ା ଭୁବନେଶ୍ୱର ଅଞ୍ଚଳର ଜଣେ ଠିକଦାର ଏହି ଟେଣ୍ଡର ପାଇଥିବା ଆଲୋଚନା ହେଉଛି। ଏ ନେଇ ବିଡିଓ ତଥା କାର୍ଯ୍ୟନିର୍ବାହୀ ଅଧିକାରୀ ଉଦ୍ଦୁଙ୍କୁ ପଚାରିବାରେ ମୁଖ୍ୟ ପ୍ରସଙ୍ଗକୁ ଏଡାଇ ଯାଇଥିଲେ। ଏହାର ନିରପେକ୍ଷ ତଦନ୍ତ କରାଗଲେ ଘଟଣାର ସତ୍ୟାସତ୍ୟ ପଦାକୁ ଆସିବ ବୋଲି ଏନଏସିବାସୀ ଦାବି କରିଛନ୍ତି।