କେସିଙ୍ଗା,୫।୬(ତୁମେଶ୍ବରସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ଗୁର୍ଜିମୁଣ୍ଡା ସ୍ଥିତ ମା’ଯୋଗମାୟା ପୀଠରେ ବିଶ୍ୱ ପରିବେଶ ଦିବସ ଉପଲକ୍ଷେ ମନ୍ଦିରର ୱେବସାଇଟ ଉନ୍ମୋଚନ ହେବା ସହ ବୃକ୍ଷ ରୋପଣ କାର୍ଯ୍ୟକ୍ରମ ଗୁରୁବାର ଅନୁଷ୍ଠିତ ହୋଇଯାଇଛି।
ମନ୍ଦିରର ୱେବସାଇଟକୁ ବ୍ଲକ ଅଧ୍ୟକ୍ଷ ଚନ୍ଦନ ସେନାପତି ଉନ୍ମୋଚନ କରିଛନ୍ତି। କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ବ୍ଲକ ଅଧ୍ୟକ୍ଷ ଚନ୍ଦନ ସେନାପତି, ସମ୍ନାନିତ ଅତିଥିଭାବେ ବିଡ଼ିଓ ଜନ୍ମେଜୟ ସ୍ବାଇଁ, କୁଣ୍ଡାବନ୍ଧ ସରପଞ୍ଚ ରୋଜି ପ୍ରଧାନ ଯୋଗଦାନ କରିଥିଲେ ।
ଏହି ଅବସରରେ ଅତିଥିମାନେ ଚାରା ରୋପଣ କରିବା ସହ ବିଶ୍ୱ ପରିବେଶ ଦିବସର ମହତ୍ୱ ଉପରେ ମତ ଦେଇଥିଲେ। ଏଥିସହ ମନ୍ଦିର ପରିସରରେ ରହିଥିବା ବିଭିନ୍ନ ବିଭିନ୍ନ ଗଛରେ ବାରକୋର୍ଡ଼ ଲଗାଯାଇଥିଲା । ଏହାଦ୍ୱାରା ଆସୁଥିବା ପର୍ଯ୍ୟଟକ ତଥା ବଣଭୋଜି ପାଇଁ ଆସୁଥିବା ଛାତ୍ରୀଛାତ୍ରୀମାନେ ଏହାକୁ ସ୍କାନ କରି ବୃକ୍ଷ ବିଷୟରେ ତଥ୍ୟ ପାଇପାରିବେ।
ଏହି କାର୍ଯ୍ୟକ୍ରମରେ ମନ୍ଦିର ପରିଚାଳନା ଟ୍ରଷ୍ଟ ଅଧ୍ୟକ୍ଷ ମୋତିଲାଲ ବଗର୍ତ୍ତୀ, ସମ୍ପାଦକ ଯଯାତି କେଶରୀ ଦେଓ, କୋଷାଧ୍ୟକ୍ଷ ଅଶ୍ୱନୀ ବିଶ୍ୱାଳ, ନବୀନ ପ୍ରଧାନ, ନେତ୍ରାନନ୍ଦ ବୁଡେକଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ।
