ନୂଆଦିଲ୍ଲୀ,୧୭।୬: ଭାରତରେ ଟେଲିଗ୍ରାମ (Telegram) କୁ ସାମୟିକ ଭାବେ ବ୍ୟାନ କରାଯାଇଛି। NEET-UG ୨୦୨୬ ପୁନଃ-ପରୀକ୍ଷା ପୂର୍ୱରୁ କପି ଏବଂ ଗୁଜବ ବା ଭୁଲ ସୂଚନା ରୋକିବା ପାଇଁ କର୍ତ୍ତୃପକ୍ଷ ଏହି ପଦକ୍ଷେପ ନେଇଛନ୍ତି। ତେବେ ଏହି ମେସେଜିଂ ଆପର ପ୍ରତିଷ୍ଠାତା ତଥା ସିଇଓ (CEO) ପାଭେଲ ଦୁରୋଭ (Pavel Durov) ସରକାରଙ୍କ ଏହି ନିଷ୍ପତ୍ତିକୁ ସମାଲୋଚନା କରିଛନ୍ତି। ଏହାଦ୍ୱାରା ମୂଳ ସମସ୍ୟାର ସମାଧାନ ନହୋଇ ଓଲଟା ଲକ୍ଷ ଲକ୍ଷ ସାଧାରଣ ବ୍ୟବହାରକାରୀ ପ୍ରଭାବିତ ହେବେ ବୋଲି ସେ ଯୁକ୍ତି ବାଢ଼ିଛନ୍ତି।
କେନ୍ଦ୍ର ସରକାର ଗତ ମଙ୍ଗଳବାରଠାରୁ ଆସନ୍ତା ୨୨ ଜୁନ ୨୦୨୬ ପର୍ଯ୍ୟନ୍ତ ଟେଲିଗ୍ରାମ ବ୍ୟବହାର ଉପରେ କଟକଣା ଲଗାଇଛନ୍ତି। ଆସନ୍ତା ଜୁନ ୨୧ ରେ ହେବାକୁ ଥିବା NEET-UG ୨୦୨୬ ପୁନଃ-ପରୀକ୍ଷା ଏବଂ ତା’ର ପରବର୍ତ୍ତୀ ସମୟକୁ ନଜରରେ ରଖି ଜାତୀୟ ପରୀକ୍ଷା ସଂସ୍ଥା (NTA) ର ସୁପାରିଶ କ୍ରମେ ଏହି ପଦକ୍ଷେପ ନିଆଯାଇଛି। ଗୁଗୁଲ ନିଜ ପ୍ଲେ-ଷ୍ଟୋରରୁ ଏହି ଆପକୁ ହଟାଇ ସାରିଥିବାବେଳେ, ଆପଲ ମଧ୍ୟ ନିର୍ଦ୍ଦେଶ ପାଳନ କରି ଖୁବ ଶୀଘ୍ର ଏହାକୁ ହଟାଇବ ବୋଲି ଆଶା କରାଯାଉଛି।
ଟେଲିଗ୍ରାମ ସିଇଓ କହିଛନ୍ତି, “କିଛି ବ୍ୟବହାରକାରୀ ଲିକ ହୋଇଥିବା ପ୍ରଶ୍ନପତ୍ର ସେୟାର କରିବା ଯୋଗୁଁ ଭାରତର ଆଇଟି ମନ୍ତ୍ରଣାଳୟ ଟେଲିଗ୍ରାମକୁ ଗୋଟିଏ ସପ୍ତାହ ପାଇଁ ବ୍ୟାନ କରିଛି। ଏହା ଭାରତର ୧୫ କୋଟିରୁ ଅଧିକ ସାଧାରଣ ଟେଲିଗ୍ରାମ ବ୍ୟବହାରକାରୀଙ୍କୁ ଦଣ୍ଡିତ କରୁଛି, ସେହି ଲୋକଙ୍କୁ ନୁହେଁ ଯେଉଁମାନେ ପରୀକ୍ଷା ସାମଗ୍ରୀ ଲିକ କରିଛନ୍ତି। ଏବଂ ଏହି ବ୍ୟାନ କିଛି ବି ରୋକି ପାରିନାହିଁ। ଲିକ ହୋଇଥିବା ସେହି ଜିନିଷଗୁଡ଼ିକ ଏବେ ଅନ୍ୟ ଆପକୁ ଚାଲିଯାଇଛି।”
