ଜୋହାନ୍ସବର୍ଗ,୨୪ା୧୧: କୃତ୍ରିମ ବୁଦ୍ଧିମତ୍ତା (ଏଆଇ)ର ଦୁରୁପଯୋଗ ରୋକିବା ଲାଗି ଏକ ଗ୍ଲୋବାଲ କମ୍ପାକ୍ଟ ନିମନ୍ତେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଜି୨୦ ସମିଟ୍ରେ ଆହ୍ବାନ ଦେଇଛନ୍ତି। ଗୁରୁତ୍ୱପୂର୍ଣ୍ଣ ପ୍ରଯୁକ୍ତିଗୁଡ଼ିକ ଅର୍ଥକୈନ୍ଦ୍ରିକ ନ ହୋଇ ମାନବକୈନ୍ଦ୍ରିକ ହେବା ଉପରେ ପ୍ରଧାନମନ୍ତ୍ରୀ ଜୋର୍ ଦେଇଛନ୍ତି। ଗ୍ଲୋବାଲ କମ୍ପାକ୍ଟ ହେଉଛି ଏକ ଜାତିସଂଘ ଉପକ୍ରମ, ଯାହା ବ୍ୟବସାୟ କ୍ଷେତ୍ରରେ ମାନବାଧିକାର, ଶ୍ରମ, ପରିବେଶ, ଦୁର୍ନୀତି ନିବାରଣ ଆଦି ୧୦ଟି ସିଦ୍ଧାନ୍ତ ଭଳି ସ୍ଥାୟୀ ଏବଂ ସାମାଜିକ ଦାୟିତ୍ୱପୂର୍ଣ୍ଣ ନୀତି ଆପଣାଇବାକୁ ପ୍ରୋତ୍ସାହିତ କରିଥାଏ।
ଜି୨୦ ସମିଟ୍ର ତୃତୀୟ ଅଧିବେଶନରେ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ କହିଛନ୍ତି, ପ୍ରଯୁକ୍ତିର ପ୍ରୟୋଗ ଜାତୀୟ ପରିବର୍ତ୍ତେ ବୈଶ୍ୱିକ ହେବା ଆବଶ୍ୟକ। ଏହା ବିଶିଷ୍ଟ ମଡେଲ ବଦଳରେ ମୁକ୍ତ ଉତ୍ସ ଉପରେ ଆଧାରିତ ହେବା ଉଚିତ। ଭାରତର ପ୍ରଯୁକ୍ତି ବ୍ୟବସ୍ଥାରେ ଏହି ଦୃଷ୍ଟିକୋଣକୁ ସନ୍ନିବେଶିତ କରାଯାଇଛି, ଯେଉଁଥିରୁ ଉଲ୍ଲେଖନୀୟ ଫାଇଦା ମିଳିଛି। ମହାକାଶ ପ୍ରଯୁକ୍ତି, ଏଆଇ କିମ୍ବା ଡିଜିଟାଲ ପେମେଣ୍ଟରେ ଏହା ବିଶ୍ୱର ନେତୃତ୍ୱ ନେଇଥିବା ପ୍ରଧାନମନ୍ତ୍ରୀ କହିଛନ୍ତି। ‘ସମସ୍ତଙ୍କ ପାଇଁ ନିଷ୍ପକ୍ଷ ଓ ନିରପେକ୍ଷ ଭବିଷ୍ୟତ- ଗୁରୁତ୍ୱପୂର୍ଣ୍ଣ ଖଣିଜ, ଉତ୍କୃଷ୍ଟ କାର୍ଯ୍ୟ, କୃତ୍ରିମ ବୁଦ୍ଧିମତ୍ତା’ ଶୀର୍ଷକ ଉପରେ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ କହିଛନ୍ତି, ଏଆଇ ଯେପରି ବିଶ୍ୱ ମଙ୍ଗଳ ପାଇଁ ବ୍ୟବହାର ହୁଏ ଏବଂ ଏହାର ଦୁରୁପଯୋଗକୁ ରୋକାଯାଏ, ଏନେଇ ଆମ ସମସ୍ତଙ୍କୁ ସୁନିଶ୍ଚିତ କରିବାକୁ ପଡ଼ିବ। ମାନବ ଜୀବନ, ସୁରକ୍ଷା, ସାର୍ବଜନିକ ବିଶ୍ୱାସ ଉପରେ ପ୍ରଭାବ ପକାଉଥିବା ଏଆଇ ବ୍ୟବସ୍ଥା ଉତ୍ତରଦାୟୀ ଏବଂ ଯାଞ୍ଚ ଯୋଗ୍ୟ ହେବା ଆବଶ୍ୟକ। ଏଆଇ ମାନବ ସାମର୍ଥ୍ୟକୁ ବଢ଼ାଇବା ଉଚିତ। ତେବେ ନିଷ୍ପତ୍ତି ନେବାର ବିକଳ୍ପ ଦାୟିତ୍ୱ ସବୁବେଳେ ଲୋକଙ୍କ ପାଖରେ ରହିବା ଆବଶ୍ୟକ ବୋଲି ପ୍ରଧାନମନ୍ତ୍ରୀ କହିଛନ୍ତି।
ଜାତିସଂଘ ସୁରକ୍ଷା ପରିଷଦ (ୟୁଏନ୍ଏସ୍ସି)ର ସଂସ୍କାର ଆଉ ଇଚ୍ଛାଧୀନ ହୋଇ ରହିନାହିଁ ବରଂ ଜରୁରୀ ହୋଇପଡ଼ିଛି। ବୈଶ୍ୱିକ ଶାସନ ସଂସ୍ଥାଗୁଡ଼ିକରେ ପରିବର୍ତ୍ତନ ପାଇଁ ଭାରତ-ବ୍ରାଜିଲ-ଦକ୍ଷିଣ ଆଫ୍ରିକା ସ୍ପଷ୍ଟ ବାର୍ତ୍ତା ପଠାଇବାକୁ ହେବ ବୋଲି ପ୍ରଧାନମନ୍ତ୍ରୀ କହିଛନ୍ତି। ଭାରତ-ବ୍ରାଜିଲ-ଦକ୍ଷିଣ ଆଫ୍ରିକା (ଆଇବିଏସ୍ଏ) ନେତୃବର୍ଗଙ୍କ ସମ୍ମିଳନୀରେ ଉଦ୍ବୋଧନ ଦେଇ ମୋଦି କହିଛନ୍ତି, ଗୋଟିଏ ସମୟ ଯେତେବେଳେ ବିଶ୍ୱ ଖଣ୍ଡିତ ଏବଂ ବିଭାଜିତ ପ୍ରତୀତ ହେଉଥାଏ, ସେତେବେଳେ ଆଇବିଏସ୍ଏ ଏକତା, ସହଯୋଗ ଓ ମାନବୀୟତାର ବାର୍ତ୍ତା ପ୍ରଦାନ କରିଥାଏ।
Dharitri – The Largest & Most Trusted Odia Daily
