ନୂଆଦିଲ୍ଲୀ,୧୦।୩: ଦୁବାଇରେ ଟ୍ରଫି ଜିତିବା ପରେ ଭାରତୀୟ ଦଳ ନିଜ ଦେଶକୁ ଫେରିଛି। ୨୦୨୫ ଚାମ୍ପିୟନ୍ସ ଟ୍ରଫିର ଫାଇନାଲରେ ଟିମ ଇଣ୍ଡିଆ ନ୍ୟୁଜିଲାଣ୍ଡକୁ ୪ ଉଇକେଟ୍ରେ ପରାସ୍ତ କରିଛି। ସୂଚନା ଅନୁସାରେ, ଭାରତୀୟ ଦଳର କିଛି ଖେଳାଳି ଦୁବାଇରୁ ସିଧାସଳଖ ମୁମ୍ବାଇରେ ପହଞ୍ଚିଥିବା ଜଣାପଡ଼ିଛି। ଏହି ବିମାନଟି କିଛି ସମୟ ପୂର୍ବରୁ ମୁମ୍ବାଇ ବିମାନବନ୍ଦରରେ ଅବତରଣ କରିଛି। ଅଧିନାୟକ ରୋହିତ ଶର୍ମାଙ୍କୁ ତାଙ୍କ ପରିବାର ସହିତ ମୁମ୍ବାଇ ବିମାନବନ୍ଦରରେ ଦେଖିବାକୁ ମିଳିଛି ଏବଂ ତାଙ୍କୁ ଦେଖିବା ପାଇଁ ବିମାନବନ୍ଦରରେ ପ୍ରଶଂସକଙ୍କ ଭିଡ଼ ଜମିଥିଲା।
ଭାରତୀୟ ଦଳ ଏମିରେଟ୍ସ ବିମାନ EK 508 ଯୋଗେ ମୁମ୍ବାଇରେ ଅବତରଣ କରିଛନ୍ତି। ସୋମବାର ବିଳମ୍ବିତ ରାତିରେ ସମସ୍ତ ଖେଳାଳି ନିଜ ନିଜ ସହରକୁ ଫେରିବେ ବୋଲି ଖବର ରହିଛି। ଅଧିନାୟକ ରୋହିତ ଶର୍ମାଙ୍କ ବ୍ୟତୀତ ଶ୍ରେୟସ ଆୟର, ହାର୍ଦ୍ଦିକ ପାଣ୍ଡ୍ୟା ଏବଂ ଅକ୍ଷର ପଟେଲଙ୍କୁ ମଧ୍ୟ ମୁମ୍ବାଇ ବିମାନବନ୍ଦରରେ ଦେଖିବାକୁ ମିଳିଛି। ରୋହିତ ଶର୍ମା ତାଙ୍କ ଲଗଜରୀ କାର୍, ରେଞ୍ଜ ରୋଭରରେ ବିମାନବନ୍ଦର ଛାଡିଥିବାର କିଛି ଫଟୋ ସାମ୍ନାକୁ ଆସିଛି। ଅନ୍ୟପକ୍ଷରେ, ଦିଲ୍ଲୀ ବିମାନବନ୍ଦରରେ ଭାରତୀୟ ଦଳର ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀରଙ୍କ ସହ ଦ୍ରୁତ ବୋଲର ହର୍ଷିତ ରାଣାଙ୍କୁ ମଧ୍ୟ ଦେଖିବାକୁ ମିଳିଛି।
