ନୂଆଦିଲ୍ଲୀ,୯।୯: ଆଫଗାନିସ୍ତାନ ବିପକ୍ଷ ଟି-୨୦ ସିରିଜ ପୂର୍ବରୁ ଭାରତୀୟ ଦଳ ସାମ୍ନାରେ ଏକ ବଡ଼ ପ୍ରଶ୍ନ ଠିଆ ହୋଇଛି। ଅଭିଷେକ ଶର୍ମାଙ୍କ ସହ ଇନିଂସ ଓପନ କରିବେ କିଏ? ଅଭିଜ୍ଞ ସଞ୍ଜୁ ସାମସନ ନା ଯୁବ ବିସ୍ଫୋରକ ବ୍ୟାଟର ବୈଭବ ସୂର୍ଯ୍ୟବଂଶୀ? ତିନିଜଣ ଖେଳାଳି ଦଳରେ ଥିବାରୁ ପ୍ଲେଇଂ ଇଲେଭେନ ବାଛିବା ଟିମ ମ୍ୟାନେଜମେଣ୍ଟ ପାଇଁ ଏକ ବଡ଼ ଚ୍ୟାଲେଞ୍ଜ ହୋଇଛି।
ଭାରତ ଓ ଆଫଗାନିସ୍ତାନ ମଧ୍ୟରେ ୩ ମ୍ୟାଚ ବିଶିଷ୍ଟ ଟି-୨୦ ସିରିଜ ସେପ୍ଟେମ୍ବର ୧୩ରୁ ଆରମ୍ଭ ହେବ। ତିନୋଟି ମ୍ୟାଚ ଯଥାକ୍ରମେ ସେପ୍ଟେମ୍ବର ୧୩, ୧୫ ଓ ୧୭ ତାରିଖରେ ଦିଲ୍ଲୀରେ ଖେଳାଯିବ। ଏହି ସିରିଜ ପାଇଁ ଶ୍ରେୟସ ଆୟରଙ୍କୁ ଅଧିନାୟକ ଏବଂ ତିଳକ ବର୍ମାଙ୍କୁ ଉପଅଧିନାୟକ ଦାୟିତ୍ୱ ଦିଆଯାଇଛି। ଦଳରେ ଅଭିଷେକ ଶର୍ମା, ବୈଭବ ସୂର୍ଯ୍ୟବଂଶୀ ଓ ସଞ୍ଜୁ ସାମସନ ମଧ୍ୟ ରହିଛନ୍ତି।
ଭାରତୀୟ ଦଳ ପାଇଁ ଓପନିଂ ଯୋଡ଼ିକୁ ନେଇ ଏହି ଦ୍ୱନ୍ଦ୍ୱ ନୂଆ ନୁହେଁ। ଆଇପିଏଲ ୨୦୨୬ରେ ଦମଦାର ପ୍ରଦର୍ଶନ ପରେ ବୈଭବ ସୂର୍ଯ୍ୟବଂଶୀ ଭାରତୀୟ ଦଳରେ ସ୍ଥାନ ପାଇଥିଲେ। ରାଜସ୍ଥାନ ରୟାଲ୍ସ ପାଇଁ ସେ ୧୬ଟି ମ୍ୟାଚରେ ୭୭୬ ରନ ସଂଗ୍ରହ କରିଥିଲେ। ତାଙ୍କ ବ୍ୟାଟିଂ ଆଭେରେଜ ୪୮.୫୦ ଏବଂ ଷ୍ଟ୍ରାଇକ ରେଟ୍ ୨୩୭.୩୦ ରହିଥିଲା। ଏହି ସମୟରେ ସେ ମାତ୍ର ୩୭ ବଲ୍ରେ ୧୦୩ ରନର ବିସ୍ଫୋରକ ଇନିଂସ ମଧ୍ୟ ଖେଳିଥିଲେ।
ତଥାପି ଆରମ୍ଭରେ ଟିମ ମ୍ୟାନେଜମେଣ୍ଟ ଅଭିଜ୍ଞ ସଞ୍ଜୁ ସାମସନ ଓ ଅଭିଷେକ ଶର୍ମାଙ୍କ ଓପନିଂ ଯୋଡ଼ି ଉପରେ ଭରସା ରଖିଥିଲା। କିନ୍ତୁ ଇଂଲଣ୍ଡ ଗସ୍ତ ସମୟରେ ପରିସ୍ଥିତି ବଦଳିଗଲା। ସଞ୍ଜୁ ପ୍ରାରମ୍ଭିକ ମ୍ୟାଚଗୁଡ଼ିକରେ ବଡ଼ ଇନିଂସ ଖେଳିବାରେ ବିଫଳ ହେବା ପରେ ସୂର୍ଯ୍ୟବଂଶୀଙ୍କୁ ସୁଯୋଗ ଦେବା ପାଇଁ ଚାପ ବଢ଼ିଥିଲା।
ଏହାପରେ ସଞ୍ଜୁଙ୍କୁ ପ୍ଲେଇଂ ଇଲେଭେନ୍ରୁ ବାଦ ଦେଇ ଅଭିଷେକ ଶର୍ମା ଓ ବୈଭବ ସୂର୍ଯ୍ୟବଂଶୀଙ୍କ ଯୁବ ଏବଂ ଆକ୍ରମଣାତ୍ମକ ଯୋଡ଼ିକୁ ଓପନିଂ ପାଇଁ ସୁଯୋଗ ଦିଆଯାଇଥିଲା। ତେବେ ଟିମ ମ୍ୟାନେଜମେଣ୍ଟର ପରୀକ୍ଷଣ ସେଠାରେ ଅଟକି ନଥିଲା। ଶେଷ ଟି-୨୦ ମ୍ୟାଚ୍ରେ ପୁଣି ଓପନିଂ ଯୋଡ଼ିରେ ପରିବର୍ତ୍ତନ ଦେଖିବାକୁ ମିଳିଥିଲା। ଫଳରେ ଆଫଗାନିସ୍ତାନ ସିରିଜ ପୂର୍ବରୁ ଭାରତର ଓପନିଂ କମ୍ବିନେସନ୍କୁ ନେଇ ଦ୍ୱନ୍ଦ୍ୱ ଆହୁରି ବଢ଼ିଛି।
ଏବେ ଦେଖିବାକୁ ବାକି ରହିଲା, ଆଫଗାନିସ୍ତାନ ବିପକ୍ଷ ସିରିଜ୍ରେ ଟିମ ମ୍ୟାନେଜମେଣ୍ଟ ଅଭିଷେକ ଶର୍ମାଙ୍କ ସହ କାହାକୁ ଓପନିଂ ପାଇଁ ବାଛୁଛି ସଞ୍ଜୁ ସାମସନ ନା ବୈଭବ ସୂର୍ଯ୍ୟବଂଶୀ?