ନୂଆଦିଲ୍ଲୀ,୯।୧୧: ୧୮ ବର୍ଷ ବୟସରେ ଟିମ୍ ଇଣ୍ଡିଆ ଲାଗି ଡେବ୍ୟୁ କରିଥିବା ପୃଥ୍ବୀ ଶ’ଙ୍କ ଆଜି ଅର୍ଥାତ ଗୁରୁବାର ହେଉଛି ଜନ୍ମଦିନ। ସେ ନିଜର ଡେବ୍ୟୁ ମ୍ୟାଚ୍ରେ ଶତକ ମାରି ଇତିହାସ ରଚିଥିଲେ। ଶ’ ପାଲଟିଥିଲେ ଭାରତ ଲାଗି ସବୁଠାରୁ କମ୍ ବୟସରେ ଡେବ୍ୟୁ ମ୍ୟାଚ୍ରେ ଶତକ ମାରିଥିବା ବ୍ୟାଟ୍ସମ୍ୟାନ। ସେ ଜାତୀୟ ଦଳରୁ ସମସ୍ତ ଫର୍ମାଟରେ ୧୨ ମ୍ୟାଚ୍ ଖେଳିଛନ୍ତି। ତେବେ ଫିଟ୍ନେସ ଏବଂ ଶୃଙ୍ଖଳାଗତ ସମସ୍ୟାକୁ ନେଇ ସେ ଅନେକ ମୁକାବିଲା ମିସ୍ କରିଥିଲେ। ବର୍ତ୍ତମାନ ସେ ଟିମ୍ ଇଣ୍ଡିଆରୁ ବାହାରେ ଅଛନ୍ତି। ସେ ୨୦୨୧ ପରଠାରୁ ଭାରତ ଜର୍ସି ପିନ୍ଧି ନାହାନ୍ତି।
ୱେଷ୍ଟଇଣ୍ଡିଜ ବିପକ୍ଷ ଡେବ୍ୟୁ ସିରିଜରେ ଦୁଇଟି ଟେଷ୍ଟ ମ୍ୟାଚ୍ରେ ୨୩୭ ରନ ସ୍କୋର କରିବା ପରେ ଶ ’ଫେବୃଆରୀ ୨୦୨୦ରେ ଭାରତ ପାଇଁ ଖେଳିଥିଲେ। ପ୍ରଥମ ମ୍ୟାଚ ପୂର୍ବରୁ ୱାର୍ମଅପ୍ ଖେଳରେ ତାଙ୍କ ଗୋଡରେ ଆଘାତ ଲାଗିବା ପରେ ସେ ୨୦୧୮-୧୯ ବର୍ଡର ଗାଭାସ୍କର ସିରିଜରୁ ବଞ୍ଚିତ ହୋଇଥିଲେ। ପରେ ଡୋପିଂ ଉଲ୍ଲଂଘନ ହେତୁ ଶ’ଙ୍କୁ ୨୦୧୯-୨୦ରେ ପରବର୍ତ୍ତୀ ଘରୋଇ ସିଜନ୍ ପାଇଁ ନିଲମ୍ବିତ କରାଯାଇଥିଲା। ସେ ଏକ କଫସିରପ ଖାଇଥିଲେ ଯେଉଁଥିରେ ଏକ ପଦାର୍ଥ ରହିଥିଲା ଯାହା WADA ନିଷେଧ ପଦାର୍ଥ ତାଲିକାରେ ରହିଥିଲା। ଏହାକୁ ନେଇ ତାଙ୍କୁ ଆଠ ମାସ ପାଇଁ ନିଲମ୍ବିତ କରାଯାଇଥିଲା। ଫଳରେ ସେ ବାଂଲାଦେଶ ଏବଂ ଦକ୍ଷିଣ ଆଫ୍ରିକା ବିପକ୍ଷ ଘରୋଇ ସିରିଜରୁ ବାଦ ପଡ଼ିଥିଲେ। ସେ ଶେଷ ଥର ପାଇଁ ଜୁଲାଇ ୨୦୨୧ରେ ଖେଳିଥିଲେ। ସେବେଠାରୁ ଶ’ ଘରୋଇ କ୍ରିକେଟ ଏବଂ ଆଇପିଏଲ୍ରେ ନିଜର ଜବରଦସ୍ତ ପ୍ରଦର୍ଶନ କରୁଛନ୍ତି। ଆସାମ ବିପକ୍ଷ ରଣଜୀ ଟ୍ରଫି ୨୦୨୨-୨୩ରେ ସେ ତ୍ରିଶତକ ମାରିଥିଲେ। ଆଇପିଏଲ ୨୦୨୧ ଏବଂ ୨୦୨୨ ଭଲ ଥିବା ବେଳେ ୨୦୨୩ ଭଲ ନ ଥିଲା। ଏହି ସିଜନର ୮ ମ୍ୟାଚ୍ରେ ସେ ହାରାହାରି ୧୩.୨ ଭାବେ ରନ୍ ସ୍କୋର କରିଥିଲେ।
ବ୍ୟକ୍ତିଗତ ଜୀବନକୁ ଦେଖିଲେ ଶ’ ୪ ବର୍ଷ ବୟସରେ ମା’ଙ୍କୁ ହରାଇଥିଲେ। ଏହା ତାଙ୍କ ଲାଗି ବଡ଼ ଝଟ୍କା ଥିଲା। ପୃଥ୍ବୀଙ୍କ ବାପା ସ୍ତ୍ରୀଙ୍କ ମୃତ୍ୟୁ ପରେ ତାଙ୍କୁ ଏକ କ୍ରିକେଟ ଏକାଡେମୀରେ ଭର୍ତ୍ତି କରିଥିଲେ। ସେ ନିଜର ଜୀବନ ପୃଥ୍ବୀଙ୍କ ଲାଗି ଉତ୍ସର୍ଗ କରି ସ୍ବପ୍ନକୁ ସାକାର କରିବାକୁ ପ୍ରୟାସ କରିଥିଲେ। ସେ ପୋଷାକ ବ୍ୟବସାୟ କରୁଥିଲେ। ହେଲେ ପୃଥ୍ବୀଙ୍କ ଲାଗି ସେ ନିଜ ଦୋକାନ ବିକ୍ରି କରିଥିଲେ। ଏପରି କରି ସେ ତାଙ୍କ ସହ ସର୍ବଦା ରହିଥିଲେ।
ମୋଟ ସମ୍ପତ୍ତି ଦେଖିଲେ ପୃଥ୍ବୀ ୨୫ କୋଟି ସମ୍ପତ୍ତିର ମାଲିକ। ମହାରାଷ୍ଟ୍ରର ଭିରାରେ ତାଙ୍କର ବିଳାସପୂର୍ଣ୍ଣ ଘର ରହିଛି। ଏହାଛଡ଼ା ତାଙ୍କ ରିଅଲ ଇଷ୍ଟେଟ୍ରେ ସମ୍ପତ୍ତି ରହିଛି। ଏହାସହ ତାଙ୍କ ପାଖରେ ଦୁନିଆର ସର୍ବୋତ୍ତମ ବିଳାସପୂର୍ଣ୍ଣ କାର ମଧ୍ୟ ରହିଛି।
