ନୂଆଦିଲ୍ଲୀ,୧୬।୧୨: ଦକ୍ଷିଣ ଆଫ୍ରିକା ଗସ୍ତରେ ଭାରତୀୟ କ୍ରିକେଟ ଟିମକୁ ଦୁଇଟି ବଡ ଝଟକା ଲାଗିଛି। ଓ୍ବାନଡେ’ ଟିମର ଅଂଶବିଶେଷ ଥିବା ଦୀପକ ଚାହର ତାଙ୍କ ନାମ ପ୍ରତ୍ୟାହାର କରି ନେଇଛନ୍ତି। ଟେଷ୍ଟ ଦଳରେ ଭାଗ ନେଇଥିବା ମହମ୍ମଦ ଶାମି ଆହତ କାରଣରୁ ଦଳ ବାହାରେ ଅଛନ୍ତି। ପରିବାରରେ ଚିକିତ୍ସା ସମସ୍ୟା ହେତୁ ଦୀପକ ଏହି ଦିନିକିଆ ସିରିଜରୁ ତାଙ୍କ ନାମ ପ୍ରତ୍ୟାହାର କରି ନେଇଛନ୍ତି। ଚୟନ କମିଟି ତାଙ୍କ ବଦଳରେ ଆକାଶ ଦୀପଙ୍କୁ ଚୟନ କରିଛନ୍ତି। ଶାମିଙ୍କ ବିଷୟରେ ଏହା ସ୍ପଷ୍ଟ ହୋଇସାରିଛି ଯେ ତାଙ୍କ ଖେଳିବା ତାଙ୍କ ଫିଟନେସ ଉପରେ ନିର୍ଭର କରିବ।
ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଉଭୟ ବୋଲରଙ୍କ ବିଷୟରେ ସୂଚନା ଶେୟାର କରିଛି। ଏହାପୂର୍ବରୁ ଆଫ୍ରିକା ବିପକ୍ଷରେ ଖେଳାଯାଇଥିବା ଟି -୨୦ ସିରିଜରେ ଦୀପକ ଚାହର ମଧ୍ୟ ଭାରତୀୟ ଦଳର ଏକ ଅଂଶ ଥିଲେ, କିନ୍ତୁ ସେ କୌଣସି ମ୍ୟାଚ ଖେଳି ନଥିଲେ, ସେ ଟିମ ଇଣ୍ଡିଆ ସହିତ ଆଫ୍ରିକା ଆସି ନ ଥିଲେ। ବର୍ତ୍ତମାନ ସେ ଡିସେମ୍ବର ୧୭ରୁ ଆରମ୍ଭ ହୋଇଥିବା ତିନି ମ୍ୟାଚ ବିଶିଷ୍ଟ ଦିନିକିଆ ସିରିଜରୁ ମଧ୍ୟ ତାଙ୍କ ନାମ ପ୍ରତ୍ୟାହାର କରିଛନ୍ତି। ଅଭିଜ୍ଞ ପେସର୍ ମହମ୍ମଦ ଶାମିଙ୍କ ବିଷୟରେ ବିସିସିଆଇ କହିଛି ଯେ ଡାକ୍ତରୀ ଦଳ ଶାମିଙ୍କ ଫିଟନେସ ସ୍ପଷ୍ଟ କରିନାହାଁନ୍ତି, ଯେଉଁଥିପାଇଁ ତାଙ୍କୁ ଡିସେମ୍ବର ୨୬ରୁ ଆରମ୍ଭ ହେବାକୁ ଥିବା ଦୁଇ ମ୍ୟାଚ ଟେଷ୍ଟ ସିରିଜରୁ ବାଦ ଦିଆଯାଇଛି।
