ନୂଆଦିଲ୍ଲୀ, ୪।୨: ଭାରତରେ କ୍ରିକେଟର କ୍ରେଜ୍ କାହିଁରେ କେତେ। ସେଥିପାଇଁ ଭାରତୀୟ କ୍ରିକେଟରମାନଙ୍କୁ କେବଳ ଦେଶରେ ନୁହେଁ ବରଂ ସମଗ୍ର ବିଶ୍ୱରେ ସମ୍ମାନ ମିଳିଥାଏ। ହେଲେ ଏଭଳି ୫ କିମ୍ବଦନ୍ତୀ କ୍ରିକେଟର ଅଛନ୍ତି, ଯାହାକୁ ଭାରତୀୟ ପ୍ରଶଂସକ ବହୁତ ଘୃଣା କରନ୍ତି। ଅତୀତରେ ହୋଇଥିବା ଅନେକ ବିବାଦକୁ ନେଇ ଏହି କ୍ରିକେଟରମାନଙ୍କୁ ଭାରତୀୟ ପ୍ରଶଂସକ ଆଦୌ ପସନ୍ଦ କରନ୍ତି ନାହିଁ। ଆସନ୍ତୁ ଜାଣିବା:
୧- ଆଣ୍ଡ୍ରିୟୁ ସାଇମଣ୍ଡସ୍: ଏହି ଖେଳାଳି ଅଷ୍ଟ୍ରେଲିଆ ଲାଗି ଜଣେ ଗୁରୁତ୍ୱପୂର୍ଣ୍ଣ କ୍ରିକେଟର ଥିଲେ। ଭାରତୀୟ ବୋଲର୍ଙ୍କ ସାମ୍ନା କରିବାକୁ ସେ ଭଲ ପାଉଥିଲେ। ଭାରତ ବିପକ୍ଷରେ ସେ ଭଲ ପ୍ରଦର୍ଶନ ମଧ୍ୟ କରିଛନ୍ତି। ହେଲେ ପଡ଼ିଆରେ ସ୍ଲେଜିଂକୁ ନେଇ ତାଙ୍କ ପ୍ରତି ଭାରତୀୟ ପ୍ରଶଂସକଙ୍କ ମନରେ ଘୃଣା ଭାବନା ସୃଷ୍ଟି ହୋଇଥିଲା। ୨୦୦୭ରେ ଆଣ୍ଡ୍ରିୟୁ ଏବଂ ହରଭଜନଙ୍କ ମଧ୍ୟରେ ବଡ଼ ବିବାଦ ଦେଖିବାକୁ ମିଳିଥିଲା। ଏହାକୁ ମଙ୍କିଗେଟ୍ ବିବାଦର ଆଖ୍ୟା ଦିଆଯାଇଛି। ଏସବୁ ବିବାଦକୁ ନେଇ ଭାରତୀୟ ପ୍ରଶଂସକମାନେ ତାଙ୍କୁ ବିଲ୍କୁଲ୍ ପସନ୍ଦ କରନ୍ତି ନାହିଁ।
୨- ରିକି ପଣ୍ଟିଂ: ଅଷ୍ଟ୍ରେଲିଆର ଏହି ପୂର୍ବତନ ଅଧିନାୟକଙ୍କୁ ଭାରତୀୟ ପ୍ରଶଂସକ ପସନ୍ଦ କରନ୍ତି ନାହିଁ। ହେଲେ ସେ ବିଶ୍ୱ କ୍ରିକେଟର ଅନ୍ୟତମ ଶ୍ରେଷ୍ଠ ଖେଳାଳି। କ୍ରିକେଟରେ ତାଙ୍କର ଅନେକ ରେକର୍ଡ ରହିଛି। ଦିନିକିଆର ସବୁଠାରୁ ସଫଳ ଅଧିନାୟକ ରିକିଙ୍କ ପଡ଼ିଆର ଆଚରଣରେ ଭାରତୀୟ ପ୍ରଶଂସକ ଖୁସି ନ ଥିଲେ। ଅନେକ ଥର ସେ ଭାରତୀୟ ଖେଳାଳିମାନଙ୍କ ସହ ଝଗଡ଼ା କରିଥିଲେ। ସେ ପଡ଼ିଆରେ ଦେଉଥିବା ପ୍ରତିକ୍ରିୟା ଦେଖି ତାଙ୍କୁ ଘୃଣା କରାଯାଉଥିବା କୁହାଯାଏ।
୩-ଆଣ୍ଡ୍ରିୟୁ ଫ୍ଲିଣ୍ଟଫ୍: ଏହି ଖେଳାଳିଙ୍କ ମଧ୍ୟ ଭାରତୀୟ ପ୍ରଶଂସକ ପସନ୍ଦ କରନ୍ତି ନାହିଁ। ୨୦୦୨ରେ ଭାରତ ବିପକ୍ଷ ଏକ ଦିନିକିଆ ମ୍ୟାଚ୍କୁ ଜିତିବା ପରେ ସେ ନିଜର ଟି-ଶର୍ଟ କାଢ଼ି ଦେଇଥିଲେ। ତାଙ୍କର ଏହି ଆଚରଣର ଜବାବ ଦେଇଥିଲେ ସୌରଭ ଗାଙ୍ଗୁଲି। ୨୦୦୩ରେ ତ୍ରି-ସିରିଜ ଜିତିବା ପରେ ଶାର୍ଟ କାଢ଼ି ଗାଙ୍ଗୁଲି ମଧ୍ୟ ଅନୁରୂପ ବ୍ୟବହାର କରିଥିଲେ। ସେହିଭଳି ଆଇସିସି ଟି୨୦ ବିଶ୍ୱକପ୍ ୨୦୦୭ ସମୟରେ ଭାରତ ବନାମ ଇଂଲଣ୍ଡର ଏକ ମ୍ୟାଚ୍ରେ ଫ୍ଲିଣ୍ଟଫ୍ ଯୁବରାଜଙ୍କୁ କିଛି ଶବ୍ଦ କହିଥିଲେ। ଏହାକୁ ଶୁଣି ସେ ରାଗି ଯାଇଥିଲେ। ଏହାର ଜବାବ ଦେଇ ସେ ଛଅ ବଲ୍ରେ ଛଅ ଛକା ମାରିଥିଲେ।
୪- ଜାଭେଦ୍ ମିଆଁଦାଦ: ପାକିସ୍ତାନର ଏହି ପୂର୍ବତନ ବ୍ୟାଟ୍ସମ୍ୟାନ୍ଙ୍କୁ ଭାରତୀୟ ପ୍ରଶଂସକ ପସନ୍ଦ କରନ୍ତି ନାହିଁ। ଭାରତ ବିପକ୍ଷରେ ଖେଳାଯାଇଥିବା ଅନେକ ମ୍ୟାଚ୍ରେ ମିଆଁଦାଦ ପାକିସ୍ତାନକୁ ବିଜୟୀ କରାଇଥିଲେ। ହେଲେ ପଡ଼ିଆରେ ତାଙ୍କ ଆଚରଣ ନିରାଶଜନକ ଥିଲା। କାରଣ ସେ ଅଧିକ ଆକ୍ରୋଶ ପ୍ରଦର୍ଶନ କରୁଥିଲେ। ଏପରିକି ସେ ଭାରତୀୟ ଖେଳାଳିଙ୍କୁ ଅନେକ ଥର ନକଲ କରି ଚିଡ଼ାଉଥିବା ଦେଖାଯାଇଛି। ସେ ସଚିନ ତେନ୍ଦୁଲକରଙ୍କୁ ଲୋକେ ଅବସର ପରେ ଭୁଲିଯିବେ ବୋଲି କହି ମଧ୍ୟ ସମାଲୋଚିତ ହୋଇଥିଲେ।
୫-ମୁଶଫିକୁର ରହୀମ: ଏହି ତାଲିକାରେ ବାଂଲାଦେଶ ଉଇକେଟକିପର ବ୍ୟାଟ୍ସମ୍ୟାନ୍ ମୁଶଫିକୁର ସାମିଲ ଅଛନ୍ତି। ତାଙ୍କ ଅନ୍ଫିଲ୍ଡ ଆଚରଣ ହେତୁ ଭାରତୀୟ ପ୍ରଶଂସକ ତାଙ୍କୁ ପସନ୍ଦ କରନ୍ତି ନାହିଁ। ୨୦୧୬ ଟି-୨୦ ବିଶ୍ୱକପ୍ରେ ଭାରତ ସେମିଫାଇନାଲ ମ୍ୟାଚ୍ରେ ପରାଜିତ ହେବାକୁ ନେଇ ସେ ଖୁସି ବ୍ୟକ୍ତ କରିଥିଲେ।
