ଭୁବନେଶ୍ୱର,୩୦ା୧୧(ବ୍ୟୁରୋ): ଶିକ୍ଷକ ଆନ୍ଦୋଳନ ସରକାରଙ୍କ ଅଡୁଆ ବଢ଼ାଇ ଦେଇଛି। ଦାବି ପୂରଣ ନେଇ ସଚିବ ଓ ମୁଖ୍ୟ ଶାସନ ସଚିବ ସ୍ତରରେ ଆଲୋଚନା ଜାରି ରହିଥିଲେ ମଧ୍ୟ କୌଣସି ନିଷ୍କର୍ଷ ବାହାରିପାରି ନାହିଁ। ପଦ୍ମପୁର ଉପନିର୍ବାଚନ ପାଖେଇ ଆସୁଥିବାବେଳେ ଶିକ୍ଷକଙ୍କ ଆନ୍ଦୋଳନ ସରକାରଙ୍କୁ ହରଡ଼ଘଣାରେ ପକାଇଛି। ଗତ ୩ ଦିନ ହେବ ପ୍ରାଥମିକ ଶିକ୍ଷକମାନେ ଦାବି ପୂରଣ ନେଇ ଗାନ୍ଧୀ ମାର୍ଗକୁ ଅଚଳ କରି ରଖିଛନ୍ତି। ରାତିଦିନ ଧାରଣାରେ ବସି ରହିଛନ୍ତି। ଦାବି ପୂରଣ ନ ହେବାଯାଏ ଆନ୍ଦୋଳନରୁ ନ ଓହରିବାକୁ ଧମକ ଦେଇଛନ୍ତି। ଏଭଳିସ୍ଥଳେ ଶିକ୍ଷକଙ୍କ ପ୍ରସଙ୍ଗକୁ ନେଇ ବିଧାନସଭା ଅଚଳ ହୋଇଛି। ସରକାରଙ୍କୁ ଘେରିବାକୁ ବିରୋଧୀ ଭାଜପା ଏବଂ କଂଗ୍ରେସ ସଦସ୍ୟମାନେ ଶିକ୍ଷକଙ୍କୁ ଅସ୍ତ୍ର କରିଛନ୍ତି। ବିରୋଧୀଙ୍କ ହୋହଲ୍ଲାରେ ବିଧାନସଭା ପ୍ରଶ୍ନକାଳ, ଶୂନ୍ୟକାଳ, ମୁଲତବୀ ଆଲୋଚନା ଉଡ଼ିଯାଇଛି। ଶିକ୍ଷକଙ୍କ ସମସ୍ୟା ସମ୍ପର୍କରେ ସରକାରଙ୍କ ଆଲୋଚନା ବିଷୟରେ ବିଜ୍ଞାନ ଓ କାରିଗରି ମନ୍ତ୍ରୀ ଅଶୋକ ପଣ୍ଡା ଗୃହରେ ବିବୃତି ଦେଇଥିଲେ। ଏହା ସତ୍ତ୍ୱେ ବିରୋଧୀ ଶାନ୍ତ ପଡ଼ିନାହାନ୍ତି। ବିରୋଧୀଙ୍କ ହଟ୍ଟଗୋଳ ଯୋଗୁ ବିଧାନସଭା ବାରମ୍ବାର ମୁଲତବୀ ହୋଇଛି।
ମଙ୍ଗଳବାର ପୂର୍ବାହ୍ନ ୧୦ଟା ୩୦ ମିନିଟରେ ପ୍ରଶ୍ନୋତ୍ତର କାର୍ଯ୍ୟକ୍ରମ ଆରମ୍ଭ ହେବାମାତ୍ରେ ଶିକ୍ଷକଙ୍କ ସମସ୍ୟାକୁ ନେଇ ଭାଜପା ଓ କଂଗ୍ରେସ ସଦସ୍ୟମାନେ ଗୃହର ମଧ୍ୟଭାଗକୁ ଆସି ପ୍ରବଳ ହଟ୍ଟଗୋଳ କରିଥିଲେ। ପ୍ରଶ୍ନୋତ୍ତର ବାତିଲ କରି ଶିକ୍ଷକଙ୍କ ସମସ୍ୟା ଉପରେ ସରକାର କି ପଦକ୍ଷେପ ନେଇଛନ୍ତି ତୁରନ୍ତ ଗୃହକୁ ଜଣାନ୍ତୁ ଦାବି କରି ହୋ ହଲ୍ଲା କରିଥିଲେ। ପ୍ରଶ୍ନୋତ୍ତର କାର୍ଯ୍ୟକ୍ରମରେ ସହଯୋଗ କରିବାକୁ ବାଚସ୍ପତି ବିକ୍ରମ କେଶରୀ ଆରୁଖ ଅନୁରୋଧ କରିଥିଲେ ମଧ୍ୟ ବିରୋଧୀ ସଦସ୍ୟ ମାନି ନ ଥିଲେ। ଫଳରେ ବାଚସ୍ପତି ଗୃହକୁ ପୂର୍ବାହ୍ନ ୧୦ଟା ୩୩ ମିନିଟରୁ ୧୧ଟା ୩୦ ମିନିଟଯାଏ ମୁଲତବୀ ଘୋଷଣା କରିଥିଲେ। ୧୧ଟା ୩୦ ମିନିଟରେ ଗୃହକାର୍ଯ୍ୟ ଆରମ୍ଭ ହେବାମାତ୍ରେ ପୁଣି ହଟ୍ଟଗୋଳ ଆରମ୍ଭ ହୋଇ ଯାଇଥିଲା। ବାଚସ୍ପତି ଅଚଳାବସ୍ଥାକୁ ଦୂର କରିବାକୁ ସର୍ବଦଳୀୟ ବୈଠକ ଡାକିଥିଲେ। ସେଥିପାଇଁ ଗୃହକୁ ୧୧ଟା ୩୧ରୁ ୧୧ଟା ୪୫ ମିନିଟଯାଏ ମୁଲତବୀ ଘୋଷଣା କରିଦେଇଥିଲେ। ପରେ ପୁଣି ୧୦ ମିନଟ ମୁଲତବୀ ଘୋଷଣା କରାଯାଇଥିଲା।
୧୧ଟା ୫୫ ମିନିଟରେ ଗୃହକାର୍ଯ୍ୟ ଆରମ୍ଭ ହେବାମାତ୍ରେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଲେ, ଶିକ୍ଷକଙ୍କ ଆନ୍ଦୋଳନ ବିଷୟରେ ସୋମବାର ଗୃହରେ ବାଚସ୍ପତିଙ୍କ ଦୃଷ୍ଟି ଆକର୍ଷଣ କରିଥିଲୁ। ଶିକ୍ଷକଙ୍କ ସହ ଆଲୋଚନା ପାଇଁ ସରକାରଙ୍କୁ ବାଚସ୍ପତି ନିର୍ଦ୍ଦେଶଦେଲେ। ହେଲେ ବାଚସ୍ପତିଙ୍କ ନିର୍ଦ୍ଦେଶ କାର୍ଯ୍ୟକାରୀ ହେଲା ନାହିଁ। ସ୍କୁଲ ଓ ଗଣଶିକ୍ଷା ସଚିବ କହିଲେ, ମୁଁ ନୂଆ କରି ଆସିଛି, ଦାବି ବିଷୟରେ କିଛି ଜାଣିନି। ଶିକ୍ଷକମାନେ ରାତିସାରା ଆନ୍ଦୋଳନରେ ବସିଛନ୍ତି। ରାଜ୍ୟରେ ପାଠପଢ଼ା ସମ୍ପୂର୍ଣ୍ଣ ବ୍ୟାହତ ହୋଇଛି। ପାଠପଢ଼ା ନ ହେଲେ ଏ ରାଜ୍ୟର ଉନ୍ନତି ହୋଇପାରିବ ନାହିଁ। ଶିକ୍ଷକ ଆନ୍ଦୋଳନ ଯୋଗୁ ସାଧାରଣ ଲୋକ ହଇରାଣ ହେବା ସହ ରୋଗୀଙ୍କୁ ନେଇ ଯାଉଥିବା ଆମ୍ବୁଲାନ୍ସ ମଧ୍ୟ ଯାଇପାରୁ ନାହିଁ। ତତ୍କାଳୀନ ମୁଖ୍ୟମନ୍ତ୍ରୀ ବିଜୁବାବୁ ବିଧାନସଭାରେ ଉପସ୍ଥିତ ରହୁଥିଲେ। ଲୋକଙ୍କ ସମସ୍ୟା କଥା ଶୁଣୁଥିଲେ। ମାତ୍ର ତାଙ୍କ ନୀତି ଆଦର୍ଶରେ ଚାଲୁଥିବା ଶାସକ ଦଳର ମୁଖ୍ୟମନ୍ତ୍ରୀ ଗୃହକୁ ଆସୁନାହାନ୍ତି। ସବୁ ମନ୍ତ୍ରୀ ପଦ୍ମପୁର ନିର୍ବାଚନରେ ମାତିଛନ୍ତି। ରାଜ୍ୟରେ ଶିକ୍ଷା ବ୍ୟବସ୍ଥା ଭୁଶୁଡ଼ି ପଡ଼ିଛି। ଶିକ୍ଷା ଏକ ମୌଳିକ ଅଧିକାର। ସରକାର ଶିକ୍ଷକ ନିଯୁକ୍ତି କରିବାକୁ ବାଧ୍ୟ। ସରକାର ଚାହୁଁଛନ୍ତି ଶିକ୍ଷାର ବିକାଶ ନ ହେଉ। ଶିକ୍ଷାର ବିକାଶ ନ ହେଲେ ନିର୍ବାଚନ ଜିତିବା ସହଜ ହେବ। ସରକାର ତୁରନ୍ତ ଆଲୋଚନା କରି ସମସ୍ୟା ସମାଧାନ କରନ୍ତୁ ବୋଲି ନରସିଂହ କହିଛନ୍ତି।
ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ କହିଛନ୍ତି, ଶିକ୍ଷକମାନେ ଶୀତକାକରରେ ରାଜରାସ୍ତାରେ ପଡ଼ିରହିଛନ୍ତି। ଆମ କ୍ୱାର୍ଟର୍ସରେ ଜାଗା ନାହିଁ। ପରିସ୍ଥିତି ଅସମ୍ଭାଳ ହେଲାଣି। ବାଚସ୍ପତି ରୁଲିଂ ଦେବା ପରେ ଶିକ୍ଷକ ପ୍ରତିନିଧିଙ୍କ ସହ ଯାହା ଆଲୋଚନା ହୋଇଛି, ତାହା ବିଫଳ ହୋଇଛି। ଆମେ କିଛି ଜାଣିପାରୁ ନାହୁଁ। ତୃତୀୟ ଦିନରେ ଆନ୍ଦୋଳନ ପହଞ୍ଚିଲାଣି। ଶିକ୍ଷା ବିଭାଗ ସଚିବ ଦାବି ବିଷୟରେ ଜାଣିନାହାନ୍ତି। ଶିକ୍ଷାମନ୍ତ୍ରୀ ବିଜେଡିକୁ ଜିତାଇବାକୁ ପଦ୍ମପୁରରେ ଡେରା ପକାଇଛନ୍ତି। ଦଳ ଜିତିଲେ ସେ ଟିକେଟ ପାଇବେ। ଟିକେଟ ପାଇଲେ ପୁଣି ଥରେ ମନ୍ତ୍ରୀ ହେବେ। ସେଇ ଚିନ୍ତାରେ ସେ ଅଛନ୍ତି। ଶିକ୍ଷକଙ୍କ କଥା ପଚାରେ କିଏ। ମିଳିତ ପ୍ରାଥମିକ ମହାସଂଘ ବିଭାଗୀୟ ସଚିବ, ୫-ଟି ସଚିବ, ମୁଖ୍ୟ ଶାସନ ସଚିବଙ୍କୁ ଦାବି ବିଷୟରେ ପୂର୍ବରୁ ଜଣାଇଛନ୍ତି। ତଥାପି ସରକାର ସେମାନଙ୍କ ଦାବି ବିଷୟରେ ଜାଣି ପାରୁନାହାନ୍ତି। କ’ଣ ଆଲୋଚନା ହୋଇଛି ଗୃହକୁ ମନ୍ତ୍ରୀ ଜଣାନ୍ତୁ। ନଚେତ୍ ଏ ଗୃହ ଚାଲିପାରିବ ନାହିଁ।
ବିଜେଡି ସଭ୍ୟ ଅମର ପ୍ରସାଦ ଶତପଥୀ କହିଲେ, ରାଜ୍ୟ ସରକାରଙ୍କ ଗଣଶିକ୍ଷା ସଚିବ ଶିକ୍ଷକମାନଙ୍କ ସହ ଆଲୋଚନା କରିଛନ୍ତି। ଆନ୍ଦୋଳନରୁ ରାଜନୈତିକ ଫାଇଦା ଉଠାଇବାକୁ ଉଦ୍ୟମ କରାଯାଉଛି। କେନ୍ଦ୍ର ସରକାର ସର୍ବଶିକ୍ଷା ଅଭିଯାନ ଅନୁଦାନକୁ ବନ୍ଦ କରିଦେଇଛନ୍ତି। ରାଜ୍ୟ ସରକାର ପର୍ଯ୍ୟାୟକ୍ରମେ ଶିକ୍ଷକମାନଙ୍କ ସମସ୍ୟା ସମାଧାନ ଦିଗରେ ପଦକ୍ଷେପ ନେଉଛନ୍ତି। ଆଲୋଚନା ଶେଷ ହୋଇନାହିଁ। ସରକାରଙ୍କ ଦ୍ୱାର ଖୋଲା ରହିଛି। ଆଲୋଚନା ଜରିଆରେ ସମସ୍ୟା ସମାଧାନ ଦିଗରେ ପଦକ୍ଷେପ ନିଆଯାଉଛି।
କଂଗ୍ରେସ ସଭ୍ୟ ତାରା ପ୍ରସାଦ ବାହିନୀପତି କହିଛନ୍ତି, କେବଳ ଶିକ୍ଷକ ନୁହନ୍ତି, ନର୍ସ, ଅଙ୍ଗନଓ୍ବାଡି କର୍ମୀ, ଆଶାକର୍ମୀ ଧାରଣାରେ ବସିଛନ୍ତି। ସମସ୍ତଙ୍କ ସହ ସରକାର ଆଲୋଚନା କରନ୍ତୁ। ଶୀତଦିନରେ ମା’ ଭଉଣୀମାନେ ରାଜରାସ୍ତାରେ ଶୋଇଛନ୍ତି। ସେମାନଙ୍କ ସମସ୍ୟା ସମାଧାନ କରା ନ ଗଲେ ଏ ଗୃହ ଚାଲିପାରିବ ନାହିଁ। କଂଗ୍ରେସ ସଭ୍ୟ ସନ୍ତୋଷ ସିଂ ସାଲୁଜା କହିଲେ, ଶିକ୍ଷା କ୍ଷେତ୍ରରେ ରାଜ୍ୟ ୨୦ ନମ୍ବର ସ୍ଥାନରେ ରହିଛି। କେରଳରେ ୯୬ ପ୍ରତିଶତ ସାକ୍ଷରତା ହାର ଥିବା ବେଳେ ଓଡ଼ିଶାରେ ୭୨ ପ୍ରତିଶତ ରହିଛି। ବିଜେଡି ସଦସ୍ୟମାନେ ଶିକ୍ଷକଙ୍କ କଥା କିଛି କହିବେନି, କାରଣ ତାଙ୍କର ଟିକେଟ କଟିଯିବ। ପଦ୍ମପୁରରେ ଶିକ୍ଷାମନ୍ତ୍ରୀ ନିର୍ବାଚନ ପ୍ରଚାର କରୁଛନ୍ତି। ସେଠାରେ ନିର୍ବାଚନ ପକ୍କା ହାରିବେ। ସରକାର ଶିକ୍ଷକଙ୍କ ଦାବି ମାନି ନିଅନ୍ତୁ।
ଭାଜପା ସଭ୍ୟ ଭାସ୍କର ମଢ଼ାଇ କହିଲେ, ଶିକ୍ଷକମାନଙ୍କର ୩ ଦଫା ଦାବି ସରକାର ତୁରନ୍ତ ପୂରଣ କରନ୍ତୁ। ଏହି ସମୟରେ ବିରୋଧୀ ସଦସ୍ୟମାନେ ଗୃହର ମଧ୍ୟଭାଗକୁ ଆସି ପାଟିତୁଣ୍ଡ କଲେ। ବାଚସ୍ପତି କହିଲେ, ଶିକ୍ଷକଙ୍କ ସମସ୍ୟା ଉପରେ ସ୍ବତନ୍ତ୍ର ଭାବେ ଆଲୋଚନା କରିବାକୁ ସୋମବାର ସରକାରଙ୍କୁ ନିର୍ଦ୍ଦେଶ ଦିଆଯାଇଥିଲା। ଆଲୋଚନା ସମ୍ପର୍କରେ ବିଜ୍ଞାନ ଓ କାରିଗରି ବିଭାଗ ମନ୍ତ୍ରୀ ଅଶୋକ ପଣ୍ଡା କହିବେ ବୋଲି କହିଥିଲେ। ମନ୍ତ୍ରୀ କହିଲେ, ସ୍କୁଲ ଓ ଗଣଶିକ୍ଷା ସଚିବ ୪୫ ମିନିଟ ଧରି ଶିକ୍ଷକ ପ୍ରତିନିଧିଙ୍କ ସହ ଆଲୋଚନା କରିଛନ୍ତି। ଦାବିର ବିଭିନ୍ନ ଦିଗ ଉପରେ ଆଲୋଚନା ହୋଇଛି। ବିଭାଗୀୟ ସଚିବ ଦାବି ବିଷୟରେ ଅବଗତ ଅଛନ୍ତି। ଆଲୋଚନା ପାଇଁ ସରକାରଙ୍କ ଦ୍ୱାର ଖୋଲା ରହିଛି। ରାଜ୍ୟର ଆର୍ଥିକ ଅବସ୍ଥାକୁ ଦେଖି ସରକାର ପଦକ୍ଷେପ ନେବେ। ଆଜି ମୁଖ୍ୟ ଶାସନ ସଚିବଙ୍କ ସହ ଦାବି ସମ୍ପର୍କରେ ଆଲୋଚନା ହେବ। ଏହା କହିବା ବେଳେ ବିରୋଧୀ ସଦସ୍ୟମାନେ ଗୃହର ମଧ୍ୟଭାଗକୁ ମାଡ଼ି ଆସି ପ୍ରବଳ ପାଟିତୁଣ୍ଡ କଲେ। ପରିସ୍ଥିତି ଅଣାୟତ୍ତ ହେବାରୁ ବାଚସ୍ପତି ଗୃହକୁ ୧୨ଟା ୩୬ରୁ ଅପରାହ୍ନ ୪ଟା ଯାଏ ମୁଲତବୀ ଘୋଷଣା କରିଥିଲେ। ତେବେ ଅପରାହ୍ନରେ ମଧ୍ୟ ବିରୋଧୀ ପୁଣି ହଟ୍ଟଗୋଳ କରିଥିଲେ। ପାଟିତୁଣ୍ଡ ଭିତରେ ବିଧାନସଭାରେ ଓଡ଼ିଶା ଜିଲା ଯୋଜନା କମିଟି (ସଂଶୋଧନ) ବିଲ୍-୨୦୨୨ ପାରିତ ହୋଇଥିଲା। ପରିସ୍ଥିତିରେ ସୁଧାର ନ ହେବାରୁ ବାଚସ୍ପତି ଗୃହକୁ ଅପରାହ୍ନ ୪ଟା ୧୩ ମିନିଟରୁ ବୁଧବାର ପୂର୍ବାହ୍ନ ୧୦ଟା ୩୦ ମିନିଟଯାଏ ଗୃହ ମୁଲତବୀ ଘୋଷଣା କରିଥିଲେ।
