କୋକସରା,୨ା୬(ଡି.ଏନ.ଏ): ନକଲି ସାର୍ଟିଫିକେଟ ଦେଇ ଚାକିରି ହାତେଇଥିବା ଶିକ୍ଷକ ଏବେ ଜେଲରେ। ଏଭଳି ଏକ ଘଟଣା ଦେଖିବାକୁ ମିଳିଛି କୋକସରା ଥାନା ଅଞ୍ଚଳରେ।
ମିଳିଥିବା ସୂଚନା ମୁତାବକ, କଳାହାଣ୍ଡି ଜିଲା କେସିଙ୍ଗା ଥାନା ଅଞ୍ଚଳର ସାହାଜପତି ଗ୍ରାମର ସୁବାସ ଚନ୍ଦ୍ର ଚୌଧୁରୀ(୩୫) ଜାଲ୍ ସାର୍ଟିଫିକେଟ ଦେଇ କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଧଅଁରପୁର ପଞ୍ଚାୟତ ତେନ୍ତୁଳିପଡା ପ୍ରାଥମିକ ବିଦ୍ୟାଳୟରେ ୨୦୧୨ ନଭେମ୍ବର ୧୫ରୁ ଶିକ୍ଷକ ଭାବେ ନିଯୁକ୍ତି ପାଇଥିଲେ । ତେବେ ଏ ନେଇ ଜୟପାଟଣା ବ୍ଲକ ଭେଜିଗୁଡା ଗ୍ରାମର ବାଞ୍ଛାନିଧି ପୁରୋହିତ(୫୯) ନାମକ ଜଣେ ବ୍ୟକ୍ତି ୨୦୨୧ ସେପ୍ଟେମ୍ବର ୮ତାରିଖରେ କୋକସରା ଥାନାରେ ଅଭିଯୋଗ କରିଥିଲେ। ଏପରି କି ଗଞ୍ଜାମ ଜିଲାର ସୂଚନା ଅଧିକାର କର୍ମୀ ଭଗବାନ ପଣ୍ଡା ସୁବାସଙ୍କ ସାର୍ଟିଫିକେଟ ସମ୍ପର୍କରେ ତଥ୍ୟ ମାଗିଥିଲେ। ତଥ୍ୟରେ ନିଯୁକ୍ତି ପାଇଥିବା ଶିକ୍ଷକ ସୁବାସ ଯୁକ୍ତ ଦୁଇର ଜାଲ ସାର୍ଟିଫିକେଟ ଦେଇ ଚାକିରି କରୁଥିବା ଘଟଣା ସାମ୍ନାକୁ ଆସିଥିଲା । କେସିଙ୍ଗା ବ୍ଲକ ପଞ୍ଚାୟତ ମହାବିଦ୍ୟାଳୟ ବେଳଖଣ୍ଡି କଲେଜରୁ ଯୁକ୍ତ ଦୁଇରେ ୩୯୯ ମାର୍କ ପାଇଥିବା ବେଳେ ଜାଲିଆତି କରି ୪୦୯ ମାର୍କ କରାଯାଇଥିଲା। ତେବେ ଘଟଣାର ତଦନ୍ତ କରି କୋକସରା ପୋଲିସ ସୁବାସଙ୍କୁ ଗିରଫ କର ଗୁରୁବାର କୋର୍ଟ ଚାଲାଣ କରିଛି। କୋକସରା ଥାନା ସବ୍ ଇନ୍ସପେକ୍ଟର ଗୋପବନ୍ଧୁ ନାଏକ ଏହି ସୂଚନା ବେଳେ ସୁବାସଙ୍କ ବିରୋଧରେ ଥାନାରେ ଏକ ମାମଲା (ନଂ. ୧୭୯/୨୧) ରୁଜୁ ହୋଇଛି।
