କୋକସରା,୨୪।୮(ଦୁଷ୍ମନ୍ତ କୁମାର ପାଟ୍ଟଯୋଶୀ): କଳାହାଣ୍ଡି ଜିଲା କୋକସରା ବ୍ଲକ ଗୋଷ୍ଠି ଶିକ୍ଷା ବିଭାଗ ଅଧୀନ ଆମପାଣି ପଞ୍ଚାୟତ ବିରିମୁହାଣ ଗ୍ରାମକୁ ଗୁରୁବାର କୋକସରା ତହସିଲଦାର ଦେବବ୍ରତ କରାଟି ସରକାରୀ କାର୍ଯ୍ୟରେ ଯାଇଥିବା ବେଳେ ବିରିମୁହାଣ ଉଚ୍ଚ ପ୍ରାଥମିକ ବିଦ୍ୟାଳୟ ମଧ୍ୟ ପରିଦର୍ଶନ କରିଥିଲେ। ସ୍କୁଲ ପ୍ରଧାନ ଶିକ୍ଷକ ଈଶ୍ୱରୀ ପ୍ରସାଦ ଅଗସ୍ତିଙ୍କ ସହ ତହସିଲଦାର ସ୍କୁଲର ବିଭିନ୍ନ ସମସ୍ୟା ବିଷୟରେ ଆଲୋଚନା କରି ଫେରୁଥିଲେ। ସେତିକିବେଳେ ପୂର୍ବରୁ ସ୍କୁଲରେ ଶିକ୍ଷକ ଥିବା ବିରଞ୍ଚି ନାରାୟଣ ନାଏକ ତହସିଲଦାରଙ୍କୁ ଦୁର୍ବ୍ୟବହାର କରିଥିଲେ। ସୂଚନା ମତେ ବିରିମୁହାଣ ଉଚ୍ଚ ପ୍ରାଥମିକ ବିଦ୍ୟାଳୟରେ ୨୦୧୧ରୁ ବିରଞ୍ଚି ସହକାରୀ ଶିକ୍ଷକ ରହିଥିଲେ। ଗତ ୨୦ ତାରିଖରେ ତାଙ୍କୁ ବିରିମୁହାଣରୁ ତେତେଲପଡା ବିଦ୍ୟାଳୟକୁ ବଦଳି ହୋଇଥିବା ବେଳେ ସେ ଗୁରୁବାର ସ୍କୁଲ ନ ଯାଇ ଏଠାକୁ ଆସିଥିଲେ।
ଏ ନେଇ ବିଦ୍ୟାଳୟ ପ୍ରଧାନ ଶିକ୍ଷକ ଈଶ୍ୱରୀ ପ୍ରସାଦ ଅଗସ୍ତିଙ୍କୁ ପଚାରିବାରୁ ଶିକ୍ଷକ ପୂର୍ବରୁ ମଦ ପିଇ ସ୍କୁଲକୁ ଆସୁଥିଲେ। ବିଇଓଙ୍କୁ ଅଭିଯୋଗ ମଧ୍ୟ ପୂର୍ବରୁ କରାଯାଇଛି ବୋଲି କହିଛନ୍ତି। ଏ ନେଇ ବିଇଓ ରଶ୍ମିତା ନେତମଙ୍କ ପ୍ରତିକ୍ରିୟା ନେବାରୁ ଘଟଣା ସମ୍ପର୍କରେ ଅବଗତ ଅଛି, ବିଭାଗୀୟ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି। ଏ ନେଇ ତହସିଲଦାର ଦେବବ୍ରତ କରାଟିଙ୍କ ପ୍ରତିକ୍ରିୟା ନେବାରୁ ଶିକ୍ଷକ ମୋତେ ଦୁର୍ବ୍ୟବହାର କରିଛନ୍ତି ଓ ତାଙ୍କ ବିରୋଧରେ ଡିଇଓ ଓ ଜିଲାପାଳଙ୍କୁ ଅଭିଯୋଗ କରିବି ବୋଲି କହିଛନ୍ତି।
