ପାରଳାଖେମୁଣ୍ଡି,୩୦ା୩(ଡି.ଏନ୍.ଏ.): ଗଜପତି ଜିଲା ଗୋଷାଣୀ ବ୍ଲକ ଅନ୍ତର୍ଗତ ତାଟିପାଟି ଗ୍ରାମ୍ୟ ରାସ୍ତା ଅବସ୍ଥା ଶୋଚନୀୟ ହୋଇପଡିଛି । ଏହି ଗ୍ରାମ୍ୟ ରାସ୍ତାଟି ଦୀର୍ଘ ବର୍ଷ ଧରି ଏପରି ଅବସ୍ଥାରେ ପଡି ରହୁଥିବା ଏବଂ ରାସ୍ତା ନିର୍ମାଣ କରାଯାଉଥିଲେ ମଧ୍ୟ ନିମ୍ନମାନର କାମ ଯୋଗୁ ଏପରି ଅବସ୍ଥା ସୃଷ୍ଟି ହେଉଥିବାକୁ ନେଇ ଅସନ୍ତୋଷ ବୃଦ୍ଧି ପାଇଛି। ଗ୍ରାମବାସୀଙ୍କ କହିବା ମୁତାବକ, ନିମ୍ନମାନର କାମ ଯୋଗୁ ଏହି ଗ୍ରାମ୍ୟରାସ୍ତା ଖାଲଖମାରେ ପରିଣତ ହେଉଛି। ହେଲେ ବିଭାଗୀୟ କର୍ତ୍ତୃପକ୍ଷ ଏଥିପ୍ରତି ଅଣଦେଖା କରି ଚାଲିଛନ୍ତି। ଏ ନେଇ ସ୍ଥାନୀୟ ପ୍ରଶାସନ ଓ ବିଭାଗୀୟ କର୍ତ୍ତୃପକ୍ଷଙ୍କଠାରେ ବାରମ୍ବାର ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳୁନାହିଁ। ବିଶେଷ କରି ବର୍ଷା ଦିନେ ଉକ୍ତ ରାସ୍ତା ଅତି କଦର୍ଯ୍ୟମୟ ହୋଇପଡୁଥିବା ବେଳେ ବର୍ତ୍ତମାନ ପଶ୍ଚିମାଝଡ ପ୍ରଭାବରେ ବର୍ଷା ହେଉଥିବାରୁ ବର୍ଷା ପାଣି ଜମି କର୍ଦମାକ୍ତ ତଥା ଅସ୍ବାସ୍ଥ୍ୟକର ପରିବେଶ ସୃଷ୍ଟି ହୋଇଛି। ଏପରି ଖାଲଖମା ଓ କର୍ଦ୍ଦମାକ୍ତ ରାସ୍ତାରେ ଦୈନନ୍ଦିନ ଯାତାୟ କରି ଲୋକେ ଛୋଟ ବଡ ଦୁର୍ଘଟଣାର ଶିକାର ହେଉଥିବାର ପ୍ରକାଶ କରିଛନ୍ତି। ଉକ୍ତ ଗ୍ରାମ୍ୟ ରାସ୍ତାଟି ମୁଖ୍ୟ ରାସ୍ତା ହୋଇଥିବାରୁ ଦୈନନ୍ଦିନ ଗ୍ରାମବାସୀ କାଦୁଅଭରା ରାସ୍ତାରେ ଯାତାୟାତ କରୁଛନ୍ତି। ଏଥିସହ ଏହି ରାସ୍ତାର ମରାମତି ପାଇଁ ଯେତେ କହିଲେ ମଧ୍ୟ ସ୍ଥାନୀୟ ପ୍ରଶାସନ ଣୁଣିନଥିବାର ଗ୍ରାମବାସୀ କହିଛନ୍ତି। ଅନ୍ୟପକ୍ଷରେ ଏହି ଗ୍ରାମ୍ୟ ରାସ୍ତାଟି ନିର୍ମାଣ ପାଇଁ ପୂର୍ବତନ ସ୍ଥାନୀୟ ସରପଞ୍ଚ ଏମ୍ଜିଏନ୍ଆର୍ଇଜିଏସ୍ ଯୋଜନାରେ ନିର୍ମାଣ କରିଥିଲେ। ହେଲେ ବିଭାଗ ପକ୍ଷରୁ ସ୍ବଳ୍ପ ଅର୍ଥ ମଞ୍ଜୁର କରାଯାଇଥିବାରୁ ସେଠାରୁ କାମ ବନ୍ଦ ହୋଇପଡିଛି। ବର୍ତ୍ତମାନ ସୁଦ୍ଧା ଉକ୍ତ ରାସ୍ତା କାମର ସମ୍ପୂର୍ଣ୍ଣ ବିଲ ହୋଇପାରିନଥିବାରୁ ରାସ୍ତାକାମ ଆଗକୁ ହେଉନଥିବାର ଜଣାପଡ଼ିଛି। ତେବେ ଆଗାମୀ ଦିନରେ ଏହି ରାସ୍ତା ନିର୍ମାଣ ଏବଂ ସମସ୍ୟାର ସମାଧାନ ନ ହେଲେ ରାଜରାସ୍ତାକୁ ଓହ୍ଲାଇ ଆନ୍ଦୋଳାତ୍ମକ ପନ୍ଥା ଅବଲମ୍ବନ କରାଯିବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି।
