ଭୁବନେଶ୍ୱର,୩।୭: ଟାଟା ଷ୍ଟିଲ୍ର ଅତ୍ୟାଧୁନିକ ତଥା ସର୍ବପ୍ରଥମ ସମ୍ପୂର୍ଣ୍ଣ ସ୍ବୟଂକ୍ରୀୟ ନିର୍ମାଣ ସର୍ଭିସ୍ ସେଣ୍ଟର୍ (ସିସିସି) ଓଡ଼ିଶାର କଟକ ଜିଲା ଅନ୍ତର୍ଗତ ଟାଙ୍ଗିଠାରେ ଉଦ୍ଘାଟିତ ହୋଇଯାଇଛି। ଏହି ଅବସରରେ ଟାଟା ଷ୍ଟିଲ୍ର ଚେୟାରପର୍ସନ (ମାର୍କେଟିଂ ଏବଂ ସେଲ୍ସ ଓ ଲଙ୍ଗ ପ୍ରଡକ୍ଟସ୍ ବିଭାଗ) ଆଶିଷ ଅନୁପମ ସମ୍ମାନିତ ଅତିଥି ଭାବେ ଯୋଗ ଦେଇ ଏହାର ଉଦଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ଟାଟା ଷ୍ଟିଲର ବହୁ ବରିଷ୍ଠ ଅଧିକାରୀ ଓ ଅନ୍ୟମାନେ ଉପସ୍ଥିତ ଥିଲେ। ଉଲ୍ଲେଖଯୋଗ୍ୟ, କମ୍ପାନୀର ଚ୍ୟାନେଲ୍ ପାର୍ଟନର ସାଗର ବିଜ୍ନେସ ପ୍ରାଇଭେଟ୍ ଲିମିଟେଡ୍ ଆନୁକୂଲ୍ୟରେ ଉକ୍ତ ସେଣ୍ଟରର ଶୁଭାରମ୍ଭ କରାଯାଇଛି। ବିଶେଷ କରି ୧୧ ଏକର ପରିବ୍ୟାପ୍ତ ଅଞ୍ଚଳରେ ଉକ୍ତ ସିସିସି କାର୍ଯ୍ୟକ୍ଷମ ହେବ। ଏପରିକି ଏହି ଅତ୍ୟାଧୁନିକ ସ୍ବୟଂକ୍ରୀୟ ମାନୁଫାକଚରିଂ ସୁବିଧା ସହିତ କଟ୍ ଆଣ୍ଡ୍ ବେଣ୍ଡ୍ ରିବାର, କପଲର୍ ଥ୍ରେଡିଂ ଓ ୱେଲ୍ଡେଡ୍ ଓୟାର ମେସ୍ ଉପତ୍ାଦନ ଲାଗି ଉକ୍ତ କେନ୍ଦ୍ରର କ୍ଷମତା ୩୦୦୦ ଟିପିଏମ୍ (ମାସ ପିଛା ଟନ୍) ରହିଛି। ଏ ସମ୍ପର୍କରେ ଆଶିଷ ଅନୁପମ କହିଛନ୍ତି, ଓଡ଼ିଶାରେ ଏଭଳି ଏକ ଅତ୍ୟାଧୁନିକ ସୁବିଧା କେନ୍ଦ୍ରର ସ୍ଥାପନ କରି ଆମେ ବେଶ୍ ଉତ୍ସାହୀ ଅଛୁ। ଏପରିକି କମ୍ପାନୀ ସାଗର ବିଜନେସ୍ ପ୍ରାଇଭେଟ୍ ଲିମିଟେଡ୍ ସହ ସହଭାଗିତା ସ୍ଥାପନ କରିଥିବାରୁ ଆମେ ଉତ୍ସାହିତ ଓ ଏହା ଜରିଆରେ ଆମେ ଦୀର୍ଘସ୍ଥାୟିତ୍ୱ, ସୂକ୍ଷ୍ମ, ଗୁଣାତ୍ମକ ଓ ଦ୍ରୁତ ନିର୍ମାଣର ଏକ ନୂତନ ଯୁଗର ମୂଳଦୁଆ ସ୍ଥାପନ କରିଛୁ। ଅପରପକ୍ଷରେ ଭୁବନେଶ୍ୱରରେ ଏକ ଗ୍ରାହକ ସମ୍ମିଳନୀର ଆୟୋଜନ କରାଯାଇଥିଲା। ଉକ୍ତ ସମ୍ମିଳନୀରେ ଭିତ୍ତିଭୂମି, ଗୃହ ଓ ବାଣିଜ୍ୟ ଏବଂ ଶିଳ୍ପ କ୍ଷେତ୍ରର ବହୁ ବିଶିଷ୍ଟ ବ୍ୟକ୍ତି ବିଶେଷଙ୍କ ସହିତ ୬୦ରୁ ଅଧିକ ଗ୍ରାହକ ଓ ଅନ୍ୟମାନେ ଉପସ୍ଥିତ ଥିଲେ।
