ନୂଆଦିଲ୍ଲୀ,୬।୧୧: ଆଇସିସି ମହିଳା ବିଶ୍ୱକପ୍ ୨୦୨୫ ଜିତି ଇତିହାସ ରଚିଥିବା ଭାରତୀୟ ମହିଳା କ୍ରିକେଟ୍ ଦଳର ପ୍ରତ୍ୟେକ ଖେଳାଳିଙ୍କୁ ଟାଟା ମୋଟର୍ସ ଏକ ବଡ଼ ଉପହାର ଦେବାକୁ ଘୋଷଣା କରିଛି। ପ୍ରଶଂସାର ସ୍ୱରୂପ, ଦଳର ପ୍ରତ୍ୟେକ ସଦସ୍ୟଙ୍କୁ କମ୍ପାନୀର ଖୁବ୍ ଶୀଘ୍ର ଲଞ୍ଚ୍ ହେବାକୁ ଥିବା ଆଇକନିକ୍ ‘ଟାଟା ସିଏରା’ (Tata Sierra) ଏସୟୁଭିର ଟପ୍-ଏଣ୍ଡ୍ ମଡେଲର ପ୍ରଥମ ବ୍ୟାଚ୍ ପ୍ରଦାନ କରାଯିବ।
ଗତ ସପ୍ତାହରେ ନଭି ମୁମ୍ବାଇରେ ଦକ୍ଷିଣ ଆଫ୍ରିକାକୁ ୫୨ ରନରେ ପରାସ୍ତ କରି ଭାରତୀୟ ମହିଳା ଦଳ ପ୍ରଥମ ବିଶ୍ୱକପ୍ ଟାଇଟଲ୍ ହାସଲ କରିଛି।
ଟାଟା ମୋଟର୍ସ ଏକ ବିବୃତ୍ତିରେ କହିଛି, “ଲିଜେଣ୍ଡ୍ସ ସହିତ ଲିଜେଣ୍ଡ୍ସଙ୍କର ଭେଟ। ଭାରତୀୟ ମହିଳା କ୍ରିକେଟ୍ ଦଳ ଏବଂ ସେମାନଙ୍କର ଐତିହାସିକ ଆଇସିସି ମହିଳା ବିଶ୍ୱକପ୍ ପ୍ରଦର୍ଶନକୁ ପାଳନ କରି ଟାଟା ମୋଟର୍ସ ପାସେଞ୍ଜର ଭେଇକିଲ୍ସ ଗର୍ବର ସହ ଦଳର ପ୍ରତ୍ୟେକ ସଦସ୍ୟଙ୍କୁ ‘ଟାଟା ସିଏରା’ ପ୍ରଦାନ କରୁଛି – ଯାହାକି ଏକ ସାହସୀ, ବହୁମୁଖୀ ଏବଂ କାଳଜୟୀ ଲିଜେଣ୍ଡ୍।”
ଏହି ଖୁସିର ମାହୋଲ ମଧ୍ୟରେ ଗୁରୁବାର ଦଳର ସଦସ୍ୟମାନେ ରାଷ୍ଟ୍ରପତି ଭବନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟିଥିଲେ। ଅଧିନାୟକ ହରମନପ୍ରୀତ କୌର ସମସ୍ତ ଖେଳାଳିଙ୍କ ଦ୍ୱାରା ସ୍ୱାକ୍ଷରିତ ଏକ ଜର୍ସି ରାଷ୍ଟ୍ରପତିଙ୍କୁ ଭେଟି ଦେଇଥିଲେ ଏବଂ ବିଶ୍ୱକପ୍ ଟ୍ରଫି ମଧ୍ୟ ପ୍ରଦର୍ଶନ କରିଥିଲେ।
ରାଷ୍ଟ୍ରପତି ମୁର୍ମୁ ଖେଳାଳିମାନଙ୍କୁ ଅଭିନନ୍ଦନ ଜଣାଇ କହିଥିଲେ ଯେ ସେମାନେ କେବଳ ଇତିହାସ ସୃଷ୍ଟି କରିନାହାଁନ୍ତି, ବରଂ ଯୁବପିଢ଼ି ପାଇଁ ଆଦର୍ଶ ପାଲଟିଛନ୍ତି। ସେ କହିଥିଲେ ଯେ ଏହି ଦଳ ଭାରତର ପ୍ରତିଫଳନ, ଯେଉଁଠି ବିଭିନ୍ନ ଅଞ୍ଚଳ, ସାମାଜିକ ପୃଷ୍ଠଭୂମିର ଖେଳାଳିମାନେ ଗୋଟିଏ ‘ଟିମ୍ – ଇଣ୍ଡିଆ’ ଭାବରେ ପ୍ରତିନିଧିତ୍ୱ କରୁଛନ୍ତି।
