ନୂଆଦିଲ୍ଲୀ,୬।୪: ତାମିଲନାଡୁର ମଦୁରାଇ ଜିଲା କୋର୍ଟ ପୋଲିସ ହେପାଜତରେ ଜଣେ ପିତା ଏବଂ ପୁଅଙ୍କ ମୃତ୍ୟୁ ମାମଲାରେ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ସୋମବାର (୬ ଏପ୍ରିଲ, ୨୦୨୬) ମଦୁରାଇ କୋର୍ଟ ବ୍ୟବସାୟୀ ପି. ଜୟରାଜ ଏବଂ ତାଙ୍କ ପୁଅ ଜେ. ବେନିକ୍ସଙ୍କ ହେପାଜତ ମୃତ୍ୟୁ ମାମଲାରେ ୯ ଜଣ ପୋଲିସ କର୍ମଚାରୀଙ୍କୁ ମୃତ୍ୟୁଦଣ୍ଡ ଶୁଣାଇଛନ୍ତି। ଦୋଷୀ ସାବ୍ୟସ୍ତ ହୋଇଥିବା ପୋଲିସ ଇନ୍ସପେକ୍ଟର ଶ୍ରୀଧରଙ୍କୁ ମଧ୍ୟ ୧.୫ ଲକ୍ଷ ଟଙ୍କା ଜରିମାନା କରାଯାଇଛି।
କୋର୍ଟ ଯେଉଁ ପୋଲିସ କର୍ମଚାରୀମାନଙ୍କୁ ଦଣ୍ଡ ଶୁଣାଇଛନ୍ତି ସେମାନଙ୍କ ମଧ୍ୟରେ ଇନ୍ସପେକ୍ଟର ଶ୍ରୀଧର, ସବ-ଇନ୍ସପେକ୍ଟର ବାଲକୃଷ୍ଣନ ଏବଂ ରଘୁ ଗଣେଶ, ଏବଂ ପୋଲିସକର୍ମୀ ମୁରୁଗାନ, ସାମଦୁରାଇ, ମୁଥୁରାଜା, ଚେଲାଦୁରାଇ, ଥମାସ ଫ୍ରାନ୍ସିସ ଏବଂ ଭେୟିଲୁମୁଥୁ ଅଛନ୍ତି। କୋର୍ଟ କହିଛନ୍ତି, “ପ୍ରତିଶୋଧ ନେବା ପାଇଁ ପିତା ଏବଂ ପୁଅଙ୍କୁ ଉଲଗ୍ନ କରି ନିର୍ମମ ଭାବରେ ମାଡ଼ ମରାଯାଇଥିଲା। ଏହି ବିଷୟକୁ ପଢିଲେ ହୃଦୟ ଥରିଉଠୁଛି । ଯଦି ଖଣ୍ଡପୀଠ ଦ୍ୱାରା କୌଣସି ତଦାରଖ କରାଯାଇ ନଥାନ୍ତା, ତେବେ ସତ୍ୟ ଚାପି ହୋଇ ରହିଯାଇଥାନ୍ତା।
କୋର୍ଟ ଏହା ମଧ୍ୟ ଉଲ୍ଲେଖ କରିଛନ୍ତି , ଏହି ମାମଲାରେ ସିସିଟିଭି ଫୁଟେଜ ଉପସ୍ଥାପିତ ହୋଇଥିଲା, ଯାହା ସାଧାରଣତଃ ଏପରି ମାମଲାରେ ହୁଏ ନାହିଁ। ମଦୁରାଇ ଜିଲା କୋର୍ଟ ସ୍ପଷ୍ଟ କରିଛନ୍ତି ଯେ ତାମିଲନାଡୁରେ ଅନେକ ସଚ୍ଚୋଟ ପୋଲିସ ଅଧିକାରୀ ଅଛନ୍ତି ଏବଂ ଏହି ନିଷ୍ପତ୍ତି ପୋଲିସ ମଧ୍ୟରେ ଭୟ ସୃଷ୍ଟି କରିବ ନାହିଁ।
ମାମଲା ଜୁନ ୧୯, ୨୦୨୦ରେ ଆରମ୍ଭ ହୋଇଥିଲା, ଯେତେବେଳେ ମୋବାଇଲ ଦୋକାନ ମାଲିକ ଜୟରାଜ ଏବଂ ବେନିକ୍ସଙ୍କୁ ଲକଡାଉନ ସମୟରେ ଅନୁମୋଦିତ ସମୟଠାରୁ ଅଧିକ ସମୟ ପର୍ଯ୍ୟନ୍ତ ସେମାନଙ୍କ ଦୋକାନ ଖୋଲା ରଖିବା ପାଇଁ ଗିରଫ କରାଯାଇଥିଲା। ସେମାନଙ୍କୁ ସଥାନକୁଲମ ପୋଲିସ ଷ୍ଟେଶନକୁ ନିଆଯାଇଥିଲା ଏବଂ ପରେ ବିଚାର ବିଭାଗୀୟ ହାଜତକୁ ପଠାଯାଇଥିଲା। କିଛି ଦିନ ମଧ୍ୟରେ ଉଭୟଙ୍କ ମୃତ୍ୟୁ ହୋଇଥିଲା। ପୋଲିସ ହେପାଜତରେ ଥିବା ସମୟରେ ସେମାନଙ୍କୁ ମାଡ଼ ମରାଯାଇଥିଲା ବୋଲି ସେମାନଙ୍କ ପରିବାର ଅଭିଯୋଗ କରିଥିଲେ।
