ଚେନ୍ନାଇ,୩୦।୬: ତାମିଲନାଡୁ ରାଜ୍ୟପାଳ ଆରଏନ ରବିଙ୍କ ଦ୍ୱାରା ରାଜ୍ୟ ସରକାରଙ୍କ ମନ୍ତ୍ରୀ ସେଂଥିଲ ବାଲାଜିଙ୍କୁ ପଦରୁ ହଟାଇବା ଓ ନିଜ ନିଷ୍ପତ୍ତିକୁ ଫେରାଇନେବା ପ୍ରସଙ୍ଗକୁ ନେଇ ରାଜନୀତି ହୋଇଛି ସରଗରମ। ଡିଏମକେ ଏବେ ରାଜ୍ୟପାଳ ଓ କେନ୍ଦ୍ର ସରକାରଙ୍କୁ ଟାର୍ଗେଟ କରିଛି। ଗୋଟିଏ ପଟେ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ ରାଜ୍ୟପାଳଙ୍କ ନିଷ୍ପତ୍ତି ବିରୋଧରେ କୋର୍ଟ ଯିବା କଥା କହୁଥିବା ବେଳେ ଅନ୍ୟପଟେ ତାଙ୍କ ଦଳ ସ୍ଥାନେ ସ୍ଥାନେ ପୋଷ୍ଟର ଲଗାଇ ଦେଇଛି। ଏହି ପୋଷ୍ଟରରେ ସେହିସବୁ କେନ୍ଦ୍ର ମନ୍ତ୍ରୀଙ୍କ ଫଟୋ ରହିଛି ଯେଉଁମାନଙ୍କ ବିରୋଧରେ ମାମଲା ଚାଲୁଛି ଓ ଏବେବି ସେମାନେ କେନ୍ଦ୍ର ମନ୍ତ୍ରିମଣ୍ଡଳରେ ସାମିଲ ଅଛନ୍ତି।
ସୂଚନାଯୋଗ୍ୟ, ତାମିଲନାଡୁର ରାଜ୍ୟପାଳ ଆର.ଏନ ରବି ଏକ ବିରଳ ନିଷ୍ପତ୍ତିରେ ତାମିଲନାଡୁର ସରକାରୀ ମନ୍ତ୍ରୀ ସେଣ୍ଟିଲ ବାଲାଜୀଙ୍କୁ ମନ୍ତ୍ରୀ ପରିଷଦରୁ ବରଖାସ୍ତ କରିଛନ୍ତି। ଏକ ବିଜ୍ଞପ୍ତି ଜାରି କରି ରାଜ୍ୟପାଳ କହିଛନ୍ତି ଯେ ବାଲାଜୀ ଅନେକ ଗୁରୁତର ମାମଲାରେ କାର୍ଯ୍ୟାନୁଷ୍ଠାନର ସମ୍ମୁଖୀନ ହେଉଛନ୍ତି। ଏଭଳି ପରିସ୍ଥିତିରେ ସେ ଜଣେ ମନ୍ତ୍ରୀ ହୋଇ ତଦନ୍ତକୁ ପ୍ରଭାବିତ କରିପାରିବେ। ବିଜ୍ଞପ୍ତିରେ କୁହାଯାଇଛି, ଯେ ଆଶଙ୍କା ରହିଛି ଯେ ମନ୍ତ୍ରୀ ପରିଷଦରେ ସେଣ୍ଟିଲ ବାଲାଜୀଙ୍କ ଅବ୍ୟାହତି ନ୍ୟାୟ ପ୍ରକ୍ରିୟା ସମେତ ଆଇନଗତ ପ୍ରକ୍ରିୟା ଉପରେ ପ୍ରତିକୂଳ ପ୍ରଭାବ ପକାଇବ। ତେବେ ପରେ ରାଜ୍ୟପାଳ ତାଙ୍କ ନିଷ୍ପତ୍ତି ପ୍ରତ୍ୟାହାର କରି କହିଛନ୍ତି ଯେ ଆଟର୍ଣ୍ଣି ଜେନେରାଲଙ୍କ ପରାମର୍ଶ ପରେ ସେ ଏହି ବିଷୟରେ ନିଷ୍ପତ୍ତି ନେବେ।
