ନୂଆଦିଲ୍ଲୀ,୩।୧୦: ଆଫଗାନିସ୍ତାନରେ ୨୦୨୧ ଅଗଷ୍ଟରେ ତାଲିବାନ କ୍ଷମତା ଦଖଲ କରିବା ପରେ ପ୍ରଥମ ଥର ପାଇଁ ତାଲିବାନ ସରକାରର ବୈଦେଶିକ ମନ୍ତ୍ରୀ ଆମିର ଖାନ ମୁତ୍ତାକି ଅକ୍ଟୋବର ୯ରୁ ୧୬ ତାରିଖ ମଧ୍ୟରେ ଭାରତ ଗସ୍ତ କରିବେ। ଏହା ଭାରତ-ତାଲିବାନ ସମ୍ପର୍କରେ ଏକ ନୂଆ ଅଧ୍ୟାୟର ଆରମ୍ଭ। ଜାତିସଂଘ ସୁରକ୍ଷା ପରିଷଦ ମୁତ୍ତାକିଙ୍କୁ ଏହି ଗସ୍ତ ପାଇଁ ଅସ୍ଥାୟୀ ଭାବେ ଆନ୍ତର୍ଜାତୀୟ ଯାତ୍ରା ପ୍ରତିବନ୍ଧକୁ ମୁକ୍ତ କରିଛି।
ଭାରତ ଆଫଗାନିସ୍ତାନକୁ ୫୦,୦୦୦ ଟନ ଗହମ, ୩୩୦ ଟନରୁ ଅଧିକ ଔଷଧ ଓ ଟିକା ଏବଂ ୪୦,୦୦୦ ଲିଟର କୀଟନାଶକ ସମେତ ଅନେକ ଅତ୍ୟାବଶ୍ୟକ ସାମଗ୍ରୀ ଯୋଗାଇ ଦେଇଛି। ସେପ୍ଟେମ୍ବରରେ ଆଫଗାନିସ୍ତାନରେ ସଂଘଟିତ ଭୂମିକମ୍ପ ପରେ ଭାରତ ୧,୦୦୦ ପରିବାର ତମ୍ବୁ ଓ ୧୫ ଟନ ଖାଦ୍ୟ ସାମଗ୍ରୀ ସହ ଅତିରିକ୍ତ ୨୧ ଟନ ରିଲିଫ ସାମଗ୍ରୀ ପଠାଇ ତୁରନ୍ତ ସାହାଯ୍ୟ ଯୋଗାଇଥିଲା।
ଏହି ଗସ୍ତ ପାକିସ୍ତାନ ପାଇଁ ଏକ ଝଟକା ବୋଲି ବିବେଚନା କରାଯାଉଛି, କାରଣ ପାକିସ୍ତାନର ଆଫଗାନ ଶରଣାର୍ଥୀ ପ୍ରତ୍ୟାବର୍ତ୍ତନ ନୀତି ତାଲିବାନ ସହ ସମ୍ପର୍କକୁ ଦୁର୍ବଳ କରିଛି। ଅକ୍ଟୋବର ୧୦ରେ ହେବାକୁ ଥିବା ଦ୍ୱିପାକ୍ଷିକ ବୈଠକ ଭାରତ ଓ ଆଫଗାନିସ୍ତାନ ମଧ୍ୟରେ ସହଯୋଗର ଏକ ନୂଆ ଦିଗ ପ୍ରତିଷ୍ଠା କରିପାରେ।
