ନୂଆଦିଲ୍ଲୀ,୨୮ ।୮: ତାଲିବାନ କେବଳ ଯେ ଆଫଗାନିସ୍ତାନ ଉପରେ କବଜା କରିଛି ତା’ନୁହେଁ । ଏବେ ତାଲିବାନ ନିକଟରେ ବହୁ ପରିମାଣରେ ଅତ୍ୟାଧୁନିକ ଅସ୍ତ୍ରଶସ୍ତ୍ର ଓ ହେଲିକପ୍ଟର ବି ରହିଛି । ତାଲିବାନ ହାତରେ ଲାଗିଥିବା ଆମେରିକା ସେନାଙ୍କ ଅତ୍ୟାଧୁନିକ ଅସ୍ତ୍ରଶସ୍ତ୍ର ବଡ ବିନାଶର କାରଣ ହୋଇପାରେ ବୋଲି ଅନୁମାନ କରାଯାଉଛି । ଆମେରିକା ସାଂସଦ ଜିମ ବ୍ୟାଙ୍କସ୍ ଏମିତି ଖାମଖିଆଲି ନୀତି ଯୋଗୁ ଆମେରିକାର ଜୋ ବାଇଡେନ ସରକାରଙ୍କୁ ସମାଲୋଚନା କରିଛନ୍ତି । ବ୍ୟାଙ୍କସ୍ ଏମିତି କିଛି କଥା କହିଛନ୍ତି ଯାହା ସମସ୍ତଙ୍କୁ ଚକିତ କରିଛି । ସେ କହିଛନ୍ତି ଏବେ ତାଲିବନ ପାଖରେ ଏତେ ପରିମାଣରେ ବ୍ଲାକ ହଙ୍କ ହେଲିକପ୍ଟର ରହିଛି ଯାହା ବିଶ୍ୱର ପ୍ରାୟ ୮୫ ପ୍ରତିଶତ ଦେଶ ନିକଟରେ ନାହିଁ । ଆମେରିକା ସେନା ଓ ନୌସେନା ଦ୍ୱାରା ବ୍ୟବହାର କରାଯାଉଥିବା ବ୍ଲାକ ହଙ୍କ ହେଲିକପ୍ଟର ବିଶ୍ୱର ସବୁଠାରୁ ଭଲ ହେଲିକପ୍ଟର ବୋଲି କୁହାଯାଏ । ସାଂସଦ ଜିମ ବ୍ୟାଙ୍କସ୍ କହିଛନ୍ତି, ତାଲିବାନ ହାତରେ ଏବେ ଆମେରିକାର ମିଲେଟ୍ରି ଉପକରଣର ୮୫ ବିଲିୟନ ଡଲାରରୁ ଅଧିକ ସମ୍ପତି ରହିଛି । ଏଥିରେ ୭୫ ହଜାର ଗାଡି, ୨୦୦ରୁ ଅଧିକ ଏରୋପ୍ଲେନ ଓ ହେଲିକପ୍ଟର, ୬ ଲକ୍ଷ ସ୍ମଲ ଓ ଲାଇଟ୍ ଆର୍ମ ୱିପନ । କେବଳ ଏତିକି ନୁହେଁ ଏବେ ତାଲିବାନ ନିକଟରେ ନାଇଟ୍ ଭିଜନ ଗଗଲ୍ସ, ମେଡିକାଲ ଉପକରଣ ବି ରହିଛି । ସବୁଠାରୁ ଦୁଃଖର କଥା ହେଲା ତାଲିବାନ ନିକଟରେ ଏବେ ବାୟୋମେଟ୍ରିକ ଉପକରଣ ରହିଛି । ଏଥିରେ ଫିଙ୍ଗର ପ୍ରିଣ୍ଟ, ଆଇ ସ୍କାନ ଓ ବାୟୋଗ୍ରାଫିକାଲ ତଥ୍ୟ ରହିଛି । ଏହି ତଥ୍ୟ ସେହି ଆଫଗାନ ଲୋକଙ୍କର ଯେଉଁମାନେ ୨୦ ବର୍ଷ ହେବ ଆମେରିକାକୁ ସାହାଯ୍ୟ କରି ଆସୁଥିଲେ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ବାଇଡେନ ପ୍ରଶାସନ ନିକଟରେ କୌଣସି ପ୍ଲାନ ନାହିଁ କେମିତି ଏହି ସମ୍ପତିକୁ ହାସଲ କରାଯାଇ ପାରିବ ।
