କାବୁଲ,୧୧।୯: ଆତଙ୍କବାଦି କାର୍ଯ୍ୟ କଳାପ ସହିତ ଲିପ୍ତ ଥିବା ତାଲିବାନ ଏବେ ଆତଙ୍କବାଦ ବିରୋଧରେ ଲଢ଼େଇ କରିବ। ଏନେଇ ପଡ଼ୋଶୀ ଦୋମାନଙ୍କ ପକ୍ଷରୁ ତାଲିବାନକୁ ଅପିଲ୍ କରାଯାଇଛି। ତାଲିବାନ ସହିତ ଚାଇନା, ଇରାନ୍, ତାଜିକିସ୍ତାନ,ତୁର୍କମେନିସ୍ତାନ, ଉଜବେକିସ୍ତାନ ଏବଂ ପାକିସ୍ତାନ ଆଦି ଦେଶ ପକ୍ଷରୁ ଭର୍ଚୁଆଲ ବୈଠକରେ ଏଭଳି ଅପିଲ୍ ହୋଇଛି। ନିଜ ଶାସନରେ ତାଲିବାନ ବିଭିନ୍ନ ଆତଙ୍କବାଦୀ ସଂଗଠନର କାର୍ଯ୍ୟ କଳାପ ଆଫଗାନିସ୍ତାନରେ ପ୍ରଶୟ ନ ଦେବା ଉଚିତ ନୁହେଁ ବୋଲି ପଡ଼ୋଶୀ ଦେଶ ପକ୍ଷରୁ ପରାମର୍ଶ ଦିଆଯାଇଛି। ଏହା ସୂଚାଇ ଦେଉଛି ଯେ ତାଲିବାନ ଶାସନ ପ୍ରତି ପଡୋଶୀ ଦେଶଙ୍କ ମଧ୍ୟରେ ଆଶଙ୍କା ଏବଂ ଭୟ କମିନାହିଁ।
ଆଫଗାନିସ୍ତାନରେ ତାଲିବାନକୁ ଉଦାରବାଦୀ ନୀତି ଗ୍ରହଣ କରିବାକୁ ପଡ଼ୋଶୀ ଅନୁରୋଧ କରିଛନ୍ତି। ଭର୍ଚୁଆଲ ବୈଠକରେ ସ୍ବାଧୀନ ଚିନ୍ତାଧାରାକୁ ପସନ୍ଦ କରୁଥିବା ସରକାର ଗଠନ ଉପରେ ଗୁରୁତ୍ୱ ଦିଆଯାଇଥିଲା। ପଡ଼ୋଶୀମାନେ ଆଶା ପ୍ରକଟ କରିଛନ୍ତି ଯେ ତାଲିବାନ ଏକ ସରକାର ଗଠନ କରିବ ଯାହା ଆଭ୍ୟନ୍ତରୀଣ ଏବଂ ବାହ୍ୟ ନୀତି ପ୍ରତି ଉଦାରବାଦୀ ଆଭିମୁଖ୍ୟ ଗ୍ରହଣ କରୁଥିବା। ବିଶେଷକରି ଆଫଗାନିସ୍ତାନର ପଡୋଶୀ ଦେଶଗୁଡିକ ଉପରେ ଏହାର ନୀତି ବନ୍ଧୁତ୍ୱପୂର୍ଣ୍ଣ ହେବ। ଏହା ସହିତ ପାରସ୍ପରିକ ଶାନ୍ତି, ନିରାପତ୍ତା ଏବଂ ଦୀର୍ଘସ୍ଥାୟୀ ସମୃଦ୍ଧି ଦୃଷ୍ଟିରୁ ତାଲିବାନକୁ ନୀତି ପ୍ରସ୍ତୁତ କରିବାକୁ ଆହ୍ବାନ ଦିଆଯାଇଛି।
ତାଲିବାନ ବିଭିନ୍ନ ସମ୍ପ୍ରଦାୟ ସମେତ ମହିଳା ଏବଂ ଶିଶୁମାନଙ୍କର ମାନବିକ ଅଧିକାରକୁ ସୁରକ୍ଷା କରିବା ଆବଶ୍ୟକ ବୋଲି ଆବେଦନ କରାଯାଇଛି। ଏହା ସହିତ ତାଲିବାନ ଆଇଏସ, ଅଲ-କାଏଦା, ତେହେରିକ-ଇ-ତାଲିବାନ ପାକିସ୍ଥାନ, ବିଏଲଏ, ଜୋନ୍ଦୋଲ୍ଲାହ, ଇଟିଆଇଏମ ସମେତ ଅନ୍ୟାନ୍ୟ ଆତଙ୍କବାଦୀ ସଂଗଠନଠାରୁ ନିଜକୁ ଦୂରେଇ ରଖିବା ଉଚିତ ବୋଲି ବୈଠକରେ ପରାମର୍ଶ ଦିଆଯାଇଛି। ଆଫଗାନିସ୍ତାନର ଭବିଷ୍ୟତ ସ୍ଥିର କରିବା ପାଇଁ ତାଲିବାନ ସରକାରଙ୍କୁ ମିଳିତ ଜାତିସଂଘ ଘୋଷଣାନାମା ଅନୁଯାୟୀ ନୀତି ପ୍ରସ୍ତୁତ କରି ନିଷ୍ପତ୍ତି ନେବାକୁ ପଡ଼ିବ ବୋଲି ପଡ଼ୋଶୀ କହିଛନ୍ତି।
ଏପରିସ୍ଥଳେ ତାଲିବାନ ମଧ୍ୟ ପଡ଼ୋଶୀଙ୍କ ଆଶା ପୂରଣ କରିବା ବିଷୟରେ କହିଛି। ତାଲିବାନ ସମଗ୍ର ବିଶ୍ୱ ଏବଂ ପଡ଼େଶୀ ଦେଶ ସହ ସମନ୍ବୟ ରକ୍ଷା କରିବାକୁ କହିଛି। ତାଲିବାନ କାହାକୁ ନିଜ ଜମି ବ୍ୟବହାର କରି ଆତଙ୍କବାଦ ବିସ୍ତାର କରିବାକୁ ଦେବ ନାହିଁ ବୋଲି ଏହି ମର୍ମରେ ସଂଗଠନର ଜଣେ ବରିଷ୍ଠ ଅଧିକାରୀ ଅବଦୁଲ ହକ ଇମାଦ କହିଛନ୍ତି ।
ଏହା ସହିତ ଭର୍ଚୁଆଲ ବୈଠକରେ ନିଷ୍ପତ୍ତି ନିଆଯାଇଛି ଯେ ତାଲିବାନ ସରକାର ଏବଂ ପଡୋଶୀ ଦେଶର ମଧ୍ୟରେ ନିୟମିତ ବ୍ୟବଧାନରେ ଆଲୋଚନା ଅନୁଷ୍ଠିତ ହେବ। ପରବର୍ତ୍ତୀ ବୈଠକ ତେହେରାନରେ ଅନୁଷ୍ଠିତ ହେବ ବୋଲି ନିଷ୍ପତ୍ତି ଗ୍ରହଣ ହେଇଛି।