କାବୁଲ୍,୧୫।୮: ଆଫଗାନିସ୍ତାନ ରାଜଧାନୀ କାବୁଲର ଦକ୍ଷିଣରେ ଥିବା ଲୋଗାର ପ୍ରଦେଶକୁ ତାଲିବାନ ଆତଙ୍କବାଦୀମାନେ ଦଖଲ କରିବା ସହ ଶନିବାର ମଜାର-ଇ-ଶରିଫ୍ ଉପରେ ଆକ୍ରମଣ ଅବ୍ୟାହତ ରଖିଛନ୍ତି। ଆମେରିକା ସୈନ୍ୟ ସମ୍ପୂର୍ଣ୍ଣ ପ୍ରତ୍ୟାହାର ହେବାକୁ ଆଉ ୩ ସପ୍ତାହରୁ କମ୍ ସମୟ ଥିବାବେଳେ ତାଲିବାନ ଦେଶର ଉତ୍ତର, ପଶ୍ଚିମ ଏବଂ ଦକ୍ଷିଣ ଭାଗର ଅଧିକାଂଶ ଅଞ୍ଚଳକୁ ନିଜ ନିୟନ୍ତ୍ରଣକୁ ନେଇସାରିଲାଣି। ଆତଙ୍କବାଦୀମାନେ ଦେଶ ଶାସନକୁ କବ୍ଜା କରିବା ସହ ଅନ୍ୟ ଏକ ଗୃହଯୁଦ୍ଧର ଆଶଙ୍କା ବଢ଼ିବାରେ ଲାଗିଛି।
କାବୁଲକୁ ତାଲିବାନ ଆତଙ୍କବାଦୀମାନେ ଚାରିପଟୁ ଘେରିଗଲେଣି। ଆତଙ୍କବାଦୀମାନେ ରାଜଧାନୀର ଯେତେ ନିକଟତର ହେଉଛନ୍ତି, ଲୋକଙ୍କ ମଧ୍ୟରେ ଆତଙ୍କ ସେତିକି ବଢ଼ିବାରେ ଲାଗିଛି। ଏବେ ରାଜଧାନୀ ଛାଡ଼ି ପଳାଇଯିବା ପାଇଁ କାବୁଲ ଅନ୍ତର୍ଜାତୀୟ ବିମାନବନ୍ଦର ଏକମାତ୍ର ମାର୍ଗ। ଆକ୍ରମଣ ଭୟରେ କାବୁଲ ଛାଡ଼ିବା ପାଇଁ ବିମାନବନ୍ଦର କାଉଣ୍ଟର ଏବଂ ଟର୍ମିନାଲ ବାହାର ପାର୍କିଂ ସ୍ଥଳଗୁଡ଼ିକରେ ଲୋକଙ୍କ ପ୍ରବଳ ଭିଡ଼ ଲାଗି ରହିଛି। ଧାଡ଼ିରେ ଛିଡ଼ାହୋଇଥିବା ଲୋକେ ସେମାନଙ୍କ ଲଗେଜ ଓ ଅନ୍ୟାନ୍ୟ ଜିନିଷକୁ ଠେଲି ଠେଲି ନେଉଥିବା ଦେଖାଯାଇଛି। ଯେଉଁମାନେ ଟିକେଟ ପାଇଯାଉଛନ୍ତି, ସେମାନଙ୍କୁ ଭାଗ୍ୟବାନ ବିବେଚନା କରାଯାଉଛି। ଏହା ପରେ ଟର୍ମିନାଲକୁ ଯିବା ଲାଗି ଆଉ ୩ ଘଣ୍ଟା ଅପେକ୍ଷା କରିବାକୁ ପଡ଼ୁଛି। ଶେଷରେ ସମ୍ପର୍କୀୟମାନଙ୍କୁ ଅଶ୍ରୁଳ ନୟନରେ ବିଦାୟ ଦେଇ ସେମାନେ ଦେଶ ଛାଡ଼ୁଛନ୍ତି।
ଶନିବାର ତାଲିବାନ ସମ୍ପୂର୍ଣ୍ଣ ଲୋଗାର ପ୍ରଦେଶକୁ ଦଖଲ କରିବା ସହ ଏହାର ପ୍ରାଦେଶିକ ଅଧିକାରୀମାନଙ୍କୁ ଗିରଫ କରିଛି। ଆତଙ୍କବାଦୀମାନେ ଚାର୍ ଆସ୍ୟାବ ଜିଲାରେ ପହଞ୍ଚତ୍ଛନ୍ତି, ଯାହା କାବୁଲଠାରୁ ମାତ୍ର ୧୧ କିଲୋମିଟର ଦୂର। ଏହା ବ୍ୟତୀତ ସେମାନେ ପାକିସ୍ତାନ ସୀମାକୁ ଲାଗିଥିବା ପାକ୍ଟିକା ପ୍ରଦେଶର ରାଜଧାନୀ ଶାରାନାକୁ ମଧ୍ୟ କବ୍ଜା କରିଛନ୍ତି। ଦେଶର ଅନ୍ୟତମ ବୃହତ୍ ସହର ମଜାର-ଇ-ଶରିଫକୁ ଚାରିପଟୁ ଆକ୍ରମଣ କରାଯାଉଛି। ସହର ଉପକଣ୍ଠରେ ଜୋର୍ଦାର ଲଢ଼େଇ ଜାରି ରହିଥିବା ପ୍ରାଦେଶିକ ରାଜ୍ୟପାଳଙ୍କ ମୁଖପାତ୍ର ମୁନିର ଅହମଦ ଫରହାଦ କହିଛନ୍ତି।
ଶାନ୍ତି ଆଲୋଚନା ଟେବୁଲ୍କୁ ଆଣିବା ପାଇଁ ଇସ୍ଲାବା ଉପରେ ଚାପ ବଢ଼ୁଛି। କ୍ଷମତା ବଣ୍ଟନ ଲାଗି ଆଫଗାନ ରାଷ୍ଟ୍ରପତି ଅଶ୍ରଫ୍ ଗନିଙ୍କୁ ବାଦ୍ ଦେଇ ସରକାରଙ୍କ ସହ ତାଲିବାନର ଆଲୋଚନା ପାଇଁ ପାକିସ୍ତାନ ପ୍ରସ୍ତାବ ଦେଇଛି। ସେପଟେ ଆଫଗାନିସ୍ତାନ ସରକାରଙ୍କ ସହ ଆଲୋଚନା ପାଇଁ ଆତଙ୍କବାଦୀ ସଂଗଠନ କଠୋର ସର୍ତ୍ତ ରଖିଛି। ସମସ୍ତ ତାଲିବାନ୍ ବନ୍ଦୀଙ୍କୁ ମୁକ୍ତ କରିବା ସହ ଜାତିସଂଘ ଉକ୍ତ ସଂଗଠନକୁ ଆତଙ୍କବାଦୀ ତାଲିକାରୁ ବାଦ୍ ଦେବାକୁ ସୁନ୍ନି ଇସ୍ଲାମୀୟ ସଂଗଠନ କହିଛି। ଏଥିସହିତ ମିଳିତ ସରକାରରେ ସମସ୍ତ କ୍ଷମତା ତାଲିବାନକୁ ମିଳିବା ଆବଶ୍ୟକ ବୋଲି ଉକ୍ତ ସଂଗଠନ ସର୍ତ୍ତ ବାଢ଼ିଛି। ଗତ ମାସ ୧୭ରୁ ୧୯ ମଧ୍ୟରେ ରାଷ୍ଟ୍ରପତି ଗନିଙ୍କ ସହ ତାଲିବାନ ନେତାଙ୍କ ବୈଠକ ବିଫଳ ହୋଇଥିଲା। ଗନିଙ୍କ ସହ ଆଲୋଚନା କରିବାକୁ ତାଲିବାନ ନେତାମାନେ ରାଜି ହୋଇ ନ ଥିଲେ।]
