ଯାଜପୁର ଅଫିସ,୩ା୮: ଜିଲାରେ ସିମେଣ୍ଟ କାରଖାନା ପ୍ରତିଷ୍ଠା ପରେ ପ୍ରଦୂଷଣ ମାତ୍ରା ଅଧିକ ହୋଇଛି। ସୁକିନ୍ଦା ରେଲୱେ ସାଇଡିଂରେ ସିମେଣ୍ଟ କାରଖାନା ପାଇଁ ଉଦ୍ଦିଷ୍ଟ କଞ୍ଚମାଲ ଜିପସମ୍ ଅନଲୋଡିଂ ଆଖପାଖ ଅଞ୍ଚଳବାସୀଙ୍କ ଜୀବନକୁ ଦୁର୍ବିସହ କରିଛି। ଏହିମର୍ମରେ ଅଞ୍ଚଳବାସୀ ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ (ଏନ୍ଜିଟି)ର ଦ୍ୱାରସ୍ଥ ହୋଇଛନ୍ତି। ଅନ୍ୟପକ୍ଷେ ଦାନଗଦି ବ୍ଲକ ଧୂଳିଗଡ଼ ପଞ୍ଚାୟତର ସରପଞ୍ଚ ମୀନାରାଣୀ ବେହେରା ସୁକିନ୍ଦା ରେଲୱେ ସାଇଡିଂ ନିକଟବର୍ତ୍ତୀ ନୀଳପଦା, ମାନଗୋବିନ୍ଦପୁର, ସହରସାହି ଗ୍ରାମକୁ ବିସ୍ଥାପିତ କରିବାକୁ ଯାଜପୁର ଜିଲାପାଳଙ୍କୁ ଲିଖିତ ଭାବେ ନିବେଦନ କରିଛନ୍ତି। ଏହାସହ ମାନଗୋବିନ୍ଦପୁରସ୍ଥିତ ୧ରୁ ୧୦ମ ଶ୍ରେଣୀ ପର୍ଯ୍ୟନ୍ତ ଏମ୍ଇ ଓ ହାଇସ୍କୁଲ, ନୀଳପଦା ଅଙ୍ଗନବାଡି କେନ୍ଦ୍ର, ସରକାରୀ ଖୁଚୁରା କେନ୍ଦ୍ରକୁ ସ୍ଥାନାନ୍ତରଣ କରିବାକୁ ସେ ଦାବି କରିଛନ୍ତି। ଆସନ୍ତା ୧୫ ଦିନ ମଧ୍ୟରେ ଏହି ସମସ୍ୟାର ସମାଧାନ ନହେଲେ ଆମରଣ ଅନଶନ କରିବାକୁ ବାଧ୍ୟ ହେବୁ ବୋଲି ସରପଞ୍ଚ ବେହେରା ଚେତାବନୀ ଦେଇଛନ୍ତି।
ଯାଜପୁର ଜିଲା ଦାନଗଦି ବ୍ଲକର ଜନସାଧାରଣ ଶିଳ୍ପାୟନ ପାଇଁ ଜମି ଅଧିଗ୍ରହଣକୁ ସାଦରେ ଗ୍ରହଣ କରିନେବାରୁ ଆଜି କଳିଙ୍ଗନଗର ଓଡ଼ିଶାର ଏକ ପ୍ରମୁଖ ଶିଳ୍ପ କାରଖାନାର ଅଞ୍ଚଳ ଭାବରେ ପ୍ରତିଷ୍ଠା ଲାଭ କରିଛି। କିନ୍ତୁ ଶିଳ୍ପାୟନ ପ୍ରକ୍ରିୟାରେ ଅଞ୍ଚଳରେ ଦେଖାଯାଇଥିବା ପ୍ରଦୂଷଣ ସମସ୍ୟା ଓ ଏହାର ନିୟନ୍ତ୍ରଣ ଦିଗରେ ସରକାରଙ୍କ ବିଫଳତା ଲୋକଙ୍କୁ ଏଭଳି ହତାଶ କରିଛି ଯେ ଆର୍ଥତ୍କ ଅଭିବୃଦ୍ଧିର ସ୍ବାଦ ଚାଖିବେ କ’ଣ ନିଜ ଗାଁ ମାଟି ଛାଡିବାକୁ ଇଚ୍ଛା କଲେଣି। ଅନ୍ୟସ୍ଥାନରେ ଲୋକେ ‘ମରିବୁ ପଛେ ଜନ୍ମମାଟି ଛାଡ଼ିବୁ ନାହିଁ’ ବୋଲି କହି ଆନ୍ଦୋଳନ କରୁଛନ୍ତି। କିନ୍ତୁ କଳିଙ୍ଗନଗର ଅଞ୍ଚଳବାସୀ ଗାଁ ଛାଡିବାକୁ ମନସ୍ଥ କରି ସେଗୁଡିକର ଅଧିଗ୍ରହଣ ପାଇଁ ଦାବି କରିବା ଆରମ୍ଭ କରିଛନ୍ତି। ଧୂଳିଗଡ ସରପଞ୍ଚ ବେହେରା ତାଙ୍କ ନିବେଦନରେ ଦର୍ଶାଇଛନ୍ତି ଯେ, ବାୟୁ ପ୍ରଦୂଷଣ ଯୋଗୁ ଏହି ପଞ୍ଚାୟତର ୮୦ ରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ହୋଇସାରିଛି। ଏବେ ଶତାଧିକ ଲୋକ ବାୟୁ ଓ ଜଳ ପ୍ରଦୂଷଣ ଜନିତ ରୋଗରେ ଆକ୍ରାନ୍ତ ହୋଇଛନ୍ତି। ଏହି ରେଲୱେ ସାଇଡିଂରେ ପଞ୍ଚାୟତବାସୀ କମ୍ କାମ କରୁଥିବାବେଳେ ଏକାଧିକ ମେଶିନ ଦିନରାତି କାମ କରୁଛି। ନିୟମିତ ବ୍ୟବଧାନରେ ଅଭିଯୋଗ ହେଉଥିଲେ ବି କେହି ଶୁଣୁନାହାନ୍ତି। ତେଣୁ ଆମ ଜମି, ଗାଁ ନିଅ, ଆମକୁ ବିସ୍ଥାପିତ କର ବୋଲି ସରପଞ୍ଚ ବେହେରା ନିବେଦନ କରିଛନ୍ତି।
