ନୂଆଦିଲ୍ଲୀ,୧୭।୫: ଆମ ଆଦମୀ ପାର୍ଟିର ରାଜ୍ୟ ସଭା ଏମପି ସ୍ବାତୀ ମାଲିୱାଲଙ୍କ ମାମଲା ଦିନକୁ ଦିନ ବିବାଦ ଘେରକୁ ଟାଣି ହେବାରେ ଲାଗିଛି। ଯେଉଁଥିରେ ଏଏପି ଅଡୁଆରେ ପଡିଛି। ତେବେ ଶୁକ୍ରବାର ସକାଳେ ଏସମ୍ପର୍କିତ ଭିଡିଓ ସୋସିଆଲ ମିଡିଆ ଏକ୍ସ’ ରେ ଭାଇରାଲ ହୋଇଛି। ଏଥିସହ ସ୍ବାତୀ ମଧ୍ୟ ପୋଲିସ ପାଖରେ ଏନେଇ ମାମଲା ରୁଜୁ କରିଛନ୍ତି। ଯେଉଁଥିରେ ତାଙ୍କର ଛାତି ଓ ପେଟରେ ଗୁରୁତର ଆଘାତ ଲାଗିଥିବା ସେ ଦର୍ଶାଇଛନ୍ତି। ଏହାକୁ ନେଇ ସଂଧ୍ୟାରେ ଏଏପି ପ୍ରେସମିଟ୍ କରିଛି। ଯେଉଁଥିରେ ଦିଲ୍ଲୀର ଶିକ୍ଷାମନ୍ତ୍ରୀ ଆତିଶୀ ମାରଲେନା ବଡ଼ ବୟାନ ଦେଇଛନ୍ତି।
ସେ କହିଛନ୍ତି, ସ୍ବାତୀ ମାଲିୱାଲଙ୍କୁ ଭାଜପାର ଚେହେରା ଓ ମୋହରା ସାଜିଛନ୍ତି। ସେ କାହାକୁ ନ ଜଣାଇ ମୁଖ୍ୟମନ୍ତ୍ରୀଙ୍କ ବାସଭବନରେ ପହଞ୍ଚିଥିଲେ। ତାଙ୍କର ଉଦ୍ଦେଶ୍ୟ ଥିଲା ମୁଖ୍ୟମନ୍ତ୍ରୀଙ୍କ ବିରୋଧରେ ଅଭିଯୋଗ ଆଣିବା, କିନ୍ତୁ ସେତେବେଳେ ସିଏମ ଘରେ ନ ଥିଲେ।
ଆତିଶୀ ଆହୁରି କହିଛନ୍ତି, ଅରବିନ୍ଦ କେଜରିୱାଲ ଜାମିନ ପାଇବା ପରଠାରୁ ଭାଜପା ନର୍ଭସ ଅଛି। ଷଡଯନ୍ତ୍ର କରି ଭାଜପା ସ୍ବାତୀଙ୍କୁ ମେ ୧୩ ସକାଳେ ମୁଖ୍ୟମନ୍ତ୍ରୀଙ୍କ ବାସଭବନକୁ ପଠାଇଥିଲା। ଯେତେବେଳେ ତାଙ୍କ ବାସଭବନରେ ସିଏମ ମିଳି ନ ଥିଲେ, ସେତେବେଳେ ସେ ତାଙ୍କ PA ବୈଭବ କୁମାରଙ୍କୁ ଅଭିଯୋଗ କରିଥିଲେ। ଆଜି ସାମ୍ନାକୁ ଆସିଥିବା ଭିଡିଓରୁ ଅନେକ କିଛି ସ୍ପଷ୍ଟ ହୋଇ ଯାଇଛି।
ସେ ଆହୁରି ଦାବି କରିଛନ୍ତି ଯେ, ଯେଉଁ ଭିଡିଓ ସାମ୍ନାକୁ ଆସିଛି ତାହା ସ୍ବାତୀଙ୍କ ଅଭିଯୋଗର ସମ୍ପୂର୍ଣ୍ଣ ବିପରୀତ। ଭିଡିଓରୁ ଅନେକ କିଛି ସ୍ପଷ୍ଟ ହୋଇଯାଇଛି । ଭିଡିଓରେ ସ୍ବାତୀ ମାଲିୱାଲ ବିବେକଙ୍କୁ ଧମକ ଦେବା ସହ ତାଙ୍କୁ ନେଇ ଅଭିଯୋଗ କରିବାକୁ କହୁଛନ୍ତି। ଉଚ୍ଚ ସ୍ବରରେ କଥାବାର୍ତ୍ତା କରୁଛନ୍ତି। କେବଳ ଏତିକି ନୁହେଁ ସେ ସେଠାରେ ଉପସ୍ଥିତ ଥିବା ସୁରକ୍ଷା କର୍ମୀଙ୍କୁ ମଧ୍ୟ ଧମକ ଦେଉଛନ୍ତି।
ସ୍ବାତୀଙ୍କ ଅଭିଯୋଗ ମିଥ୍ୟା ଅଟେ। ବୈଭବ ଆଜି ଦିଲ୍ଲୀ ପୋଲିସକୁ ମଧ୍ୟ ଅଭିଯୋଗ କରିଛନ୍ତି। ସେ ଘଟଣା ସମ୍ପର୍କରେ ପୋଲିସକୁ ସୂଚନା ଦେଇଛନ୍ତି। ମୁଖ୍ୟମନ୍ତ୍ରୀଙ୍କୁ ଭେଟିବା ପାଇଁ ସ୍ବାତୀଙ୍କ ପାଖରେ କୌଣସି ଆପୋଏଣ୍ଟମେଣ୍ଟ ନ ଥିଲା, କିନ୍ତୁ ସେ ଫାଟକରେ ମିଛ କହିଥିଲେ। ଯେତେବେଳେ ଡ୍ୟୁଟିରେ ଥିବା ପୋଲିସ ଆପୋଏଣ୍ଟମେଣ୍ଟ ଲିଷ୍ଟ ଯାଞ୍ଚ କରିଥିଲେ, ସେଥିରେ ତାଙ୍କ ନାମ ନ ଥିଲା।
