ଭୁବନେଶ୍ୱର,୧୧।୬ (ପ୍ରସନଜିତ୍ ସାହୁ): କନ୍ଧମାଳ ଜଲେଶପେଟା ଆଶ୍ରମରେ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କୁ ହତ୍ୟା ଘଟଣାକୁ ନେଇ ଏ. ଏସ୍. ନାଇଡୁ କମିଶନ ତଦନ୍ତ କରି ସରକାରଙ୍କୁ ରିପୋର୍ଟ ଦେଇଥିଲେ। ସେହିଭଳି ଭୁବନେଶ୍ୱର ସମ୍ ହସ୍ପିଟାଲ ଭୟଙ୍କର ଅଗ୍ନିକାଣ୍ଡ ସମ୍ପର୍କରେ ଆର୍ଡିସି ତଦନ୍ତ କରି ରିପୋର୍ଟ ଦେଇଥିଲେ। ହେଲେ ଏହି ୨ ତଦନ୍ତ ରିପୋର୍ଟ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଗାଏବ ହୋଇଯାଇଥିବା ନେଇ ବୁଧବାର କ୍ୟାପିଟାଲ ଥାନାରେ ଅଭିଯୋଗ କରାଯାଇଛି। ଗୃହ ବିଭାଗର ଯୁଗ୍ମ ସଚିବ ଶରତ ଚନ୍ଦ୍ର ମାରାଣ୍ଡି ଏନେଇ ଅଭିଯୋଗ କରିଛନ୍ତି। ତଦନୁଯାୟୀ ଏକ ମାମଲା(ନଂ.୪୬୦/୨୦୨୬) ରୁଜୁ ହୋଇଛି। ଏହାର ତଦନ୍ତ ଦାୟିତ୍ୱ ଆଡିସନାଲ ଆଇଆଇସି ବି.ବି. ହୋତାଙ୍କୁ ଦିଆଯାଇଛି। ତେବେ କେବଳ ଏହି ୨ତଦନ୍ତ ରିପୋର୍ଟ ନୁହେଁ ବରଂ ଅନେକ ଫାଇଲ ଗାଏବ ହୋଇଥିବା ଜଣେ ସରକାରୀ ଅଧିକାରୀ ନାମ ଗୋପନ ରଖିବା ସର୍ତ୍ତରେ କହିଛନ୍ତି।
ଗତ ୬ ତାରିଖରେ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଗଣମାଧ୍ୟମକୁ ସୂଚନା ଦେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ୨ଟି ତଦନ୍ତ କମିଶନ ରିପୋର୍ଟ ଚୋରି ହୋଇଥିବା କଥା କହିଥିଲେ। ହେଲେ କେଉଁ ୨ଟି ରିପୋର୍ଟ ଗାଏବ ହୋଇଛି, ସେ ସମ୍ପର୍କରେ ଆଉ ଅଧିକ କିଛି କହି ନ ଥିଲେ। ଏହାପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଖୋର୍ଦ୍ଧାଠାରେ ଆୟୋଜିତ ଏକ ସରକାରୀ କାର୍ଯ୍ୟକ୍ରମରୁ ବାହାରିବା ପରେ ଗଣମାଧ୍ୟମକୁ କହିଥିଲେ, କେଉଁ ବିଧାୟକ କ’ଣ କହୁଛନ୍ତି ସେଥିରେ କିଛି ନାହିଁ। ଏନେଇ ଅଭିଯୋଗ ଆସିଲେ ଘଟଣାର ତଦନ୍ତ କରାଯିବ। ମୁଖ୍ୟମନ୍ତ୍ରୀ କହିବାର ୨ଦିନ ପରେ ହଜିଥିବା ଫାଇଲ୍କୁ ନେଇ ସରକାର ତତ୍ପର ହୋଇଥିବାରୁ ମନ୍ତ୍ରୀ କହିଥିବା କଥା ସତ ବୋଲି ସ୍ପଷ୍ଟ ହୋଇଛି।
ଗୃହ ବିଭାଗ ଯୁଗ୍ମ ସଚିବଙ୍କ ଅଭିଯୋଗ ଅନୁଯାୟୀ, ଏ.ଏସ୍. ନାଇଡୁ ରିପୋର୍ଟ (ଫାଇଲ ନଂ. ହୋମ୍-ଏସ୍ପିଏଲ୍୨-ଏଲ୍ଏଓସି-୦୦୧୭-୨୦୧୬) ୨୦୧୬ ସେପ୍ଟେମ୍ୱର ୧୬ରେ ମୁଖ୍ୟ ଶାସନ ସଚିବଙ୍କ କାର୍ଯ୍ୟାଳୟକୁ ଦିଆଯାଇଥିଲା। ଏହାପରେ ସେହିଦିନ ଏହି ରିପୋର୍ଟ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ପଠାଯାଇଥିଲା। ସେହିପରି ସମ୍ ହସ୍ପିଟାଲ ଅଗ୍ନିକାଣ୍ଡ ସମ୍ପର୍କିତ ଆର୍ଡିସି ତଦନ୍ତ ରିପୋର୍ଟ (ଫାଇଲ୍ ନଂ. ହୋମ୍- ଏସ୍ପିଏଲ୍୨-ଏଲ୍ଏଓସି-୦୦୦୮-୨୦୧୮) ୨୦୧୮ ମେ ୨୩ରେ ମୁଖ୍ୟ ଶାସନ ସଚିବଙ୍କ କାର୍ଯ୍ୟାଳୟକୁ ଯାଇ ଏହାର ଦିନକ ପରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଆସିଥିଲା। ଆଶ୍ଚର୍ଯ୍ୟର ବିଷୟ, ଉପରୋକ୍ତ ୨ ତଦନ୍ତ ରିପୋର୍ଟ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ଏବେ ମିଳୁ ନ ଥିବା ଦାୟିତ୍ୱରେ ଥିବା ଅଧିକାରୀଙ୍କ ଠାରୁ ଜଣାପଡ଼ିଛି।
ଏତଲାରେ ଦର୍ଶାଯାଇଛି ୨୦୨୪ ଜୁନ ୪ରେ ବିଧାନସଭା ନିର୍ୱାଚନ ଫଳାଫଳରୁ ଓଡ଼ିଶାରେ ସରକାର ପରିବର୍ତ୍ତନ ହେବାକୁ ଯାଉଥିବାବେଳେ ସେଦିନ ସ୍ୱାଭାବିକ ଭାବେ ଗୃହ ବିଭାଗରୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଯାଇଥିବା ସମସ୍ତ ରିପୋର୍ଟ ଏବଂ ଫାଇଲ୍ ଫେରିଆସିଥିଲା। ମାତ୍ର ହଜିଥିବା ୨ଟି ଯାକ ତଦନ୍ତ କମିଶନ ରିପୋର୍ଟ ଗୃହ ବିଭାଗକୁ ଫେରି ନ ଥିଲା। ଆଉ ସେହି ଫାଇଲ୍ ଏବେ ମିଳୁନାହିଁ। ଯେତେବେଳେ ଅନ୍ୟସବୁ ରିପୋର୍ଟ ବିଭାଗକୁ ସମୟ ଭିତରେ ଫେରି ଆସିଲା, ଉପରୋକ୍ତ ୨ଟି ଯାକ ରିପୋର୍ଟ ନ ମିଳିବା ସନ୍ଦେହ ସୃଷ୍ଟି କରୁଛି। ଏହାକୁ କେହି ଜାଣିଶୁଣି ନଷ୍ଟ, ହଜେଇ ଦେବା କିମ୍ୱା ବେଆଇନ ଭାବରେ ବ୍ୟବହାର କରିଥାଇପାରନ୍ତି ବୋଲି ଏତଲାରେ ଦର୍ଶାଯାଇଛି। ତଦନ୍ତ କମିଶନଙ୍କ ଦ୍ୱାରା ପ୍ରସ୍ତୁତ ଏହି ରିପୋର୍ଟ ସରକାରଙ୍କ ହେପାଜତରୁ ଗାଏବ ହେବା ଏକ ଗୁରୁତର ତ୍ରୁଟି। ଏଭଳି ଏକ ଗୁରୁତର ମାମଲାକୁ ଠିକ୍ ଭାବେ ତଦନ୍ତ କରି, ଯିଏ ଏଥିରେ ସମ୍ପୃକ୍ତ ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଭାଗ ପକ୍ଷରୁ କୁହାଯାଇଛି।
ସୂଚନାଯୋଗ୍ୟ, କିଛିଦିନ ତଳେ ଝାରସୁଗୁଡ଼ା ଜିଲା ଭେଡେନ ନାଳର ଶାଖା ଖେରୁଆଲ ନାଳରୁ ବେଆଇନ ଭାବେ ଜଳ ଉଠାଇବା ନେଇ ବେଦାନ୍ତ ଆଲୁମିନାକୁ ୨୩୩ କୋଟିରୁ ଅଧିକ ଟଙ୍କାର ଜରିମାନା କରାଯାଇଥିଲା। ଏ ସମ୍ପର୍କିତ ରିପୋର୍ଟ ମଧ୍ୟ ଉପରୋକ୍ତ ୨ ଟି ତଦନ୍ତ କମିଶନ ରିପୋର୍ଟ ସାଙ୍ଗରେ ହଜିଯାଇଥିବା ଶୁଣିବାକୁ ମିଳୁଛି।
