ସୋନପୁର,୯।୧୦:ସିଆର୍ପିଏଫ୍ରେ କାର୍ଯ୍ୟରତ ସୁବର୍ଣ୍ଣପୁର ସହର ମଝିପଡ଼ାର ପ୍ରତାପ କୁମାର ନାଏକଙ୍କ ସନ୍ଦେହଜନକ ଭାବେ ମୃତ୍ୟୁ ହୋଇଛି। ମାଆଙ୍କ ଶ୍ରାଦ୍ଧବାର୍ଷିକୀ ପାଇଁ ପ୍ରତାପ ନିଜ ଘରକୁ ଫେରୁଥିଲେ। ସେ ଗତ ୧ ତାରିଖରେ ନାଗାଲାଣ୍ଡରୁ ତିନିଶୁକିଆ-ବାଙ୍ଗାଲୋର ସୁପରଫାଷ୍ଟ ଟ୍ରେନ୍ରେ ଭୁବନେଶ୍ୱର ଅଭିମୁଖେ ବାହାରିଥିଲେ। ତେବେ ଗୁରୁବାର ତାଙ୍କ ମୃତ୍ୟୁ ଖବର ଘରେ ପହଞ୍ଚତ୍ ଥିବାବେଳେ ଶୁକ୍ରବାର ମଧ୍ୟାହ୍ନରେ ସିଆରପିଏଫ୍ ପକ୍ଷରୁ ଗାର୍ଡ ଅଫ୍ ଅନର ଦିଆଯାଇ ନାଗାଲାଣ୍ଡରେ ଶବ ସତ୍କାର କରାଯାଇଛି।
ମଝିପଡ଼ାର ତ୍ରିଲୋଚନ ନାଏକଙ୍କ ମଝିଆ ପୁଅ ପ୍ରତାପ ୨୦୦୭ ମସିହାରେ ସିଆର୍ପିଏଫ୍ରେ ଯୋଗ ଦେଇଥିଲେ। ସିଆର୍ପିଏଫ୍ ୮୨ ବାଟାଲିୟନରେ ଗତ ଦେଢ ବର୍ଷ ଧରି ସେ ନାଗାଲାଣ୍ଡରେ କାର୍ଯ୍ୟରତ ଥିଲେ। ଗତବର୍ଷ ଜାନୁୟାରୀ ୨୩ ତାରିଖରେ ତାଙ୍କ ବାପାଙ୍କ ହୃଦ୍ଘାତରେ ଏବଂ ଠିକ୍ ୯ ମାସ ପରେ ମା’ଙ୍କ କରୋନାରେ ମୃତ୍ୟୁ ହୋଇଥିଲା। ଅକ୍ଟୋବର ୧୨ ତାରିଖରେ ମାଆଙ୍କ ଶ୍ରାଦ୍ଧବାର୍ଷିକୀ ଥିଲା। ତେଣୁ ପ୍ରତାପ ଛୁଟି ନେଇ ଘରକୁ ଆସୁଥିଲେ। ନାଗାଲାଣ୍ଡର ଦିମାପୁର ରେଳଷ୍ଟେଶନରେ ସିଆର୍ପିଏଫ୍ ସୁରକ୍ଷା ଗାଡି ଅକ୍ଟୋବର ୧ ତାରିଖରେ ତାଙ୍କୁ ଛାଡିଥିଲା। ରାତି ୧୧ଟା ୩୩ ମିନିଟରେ ଦିମାପୁର ଷ୍ଟେଶନରେ ସେ ଟ୍ରେନ୍ ଚଢିଥିଲେ। କିନ୍ତୁ ପ୍ରତାପ ଭୁବନେଶ୍ୱରରେ ପହଞ୍ଚତ୍ଲେ ନାହିଁ କି ସକାଳୁ ସ୍ତ୍ରୀଙ୍କ ଫୋନ୍ ଉଠାଇ ନ ଥିଲେ। ତେଣୁ ପରିବାର ଲୋକଙ୍କ ସନ୍ଦେହ ହୋଇଥିଲା । ପ୍ରତାପଙ୍କ ନିଖୋଜ ନେଇ ପରିବାର ଲୋକେ ଭୁବନେଶ୍ୱର ସିଆର୍ପିଏଫ୍ରେ ଅଭିଯୋଗ କରିଥିଲେ। ତେବେ ୬ ତାରିଖ ପର୍ଯ୍ୟନ୍ତ କିଛି ଖବର ମିଳି ନ ଥିଲା। ୭ ତାରିଖରେ ପ୍ରତାପଙ୍କ ସାଙ୍ଗମାନେ ରେଳମନ୍ତ୍ରୀ ଅଶ୍ୱିନୀ କୁମାର ବୈଷ୍ଣବ, ସିଆର୍ପିଏଫ୍ ନାଗାଲାଣ୍ଡ ଓ ଓଡ଼ିଶା ପୋଲିସ ଡିଜିଙ୍କୁ ଟୁଇଟ୍ କରିଥିଲେ। ପରେ ପ୍ରତାପଙ୍କ ଭାଇ ପ୍ରଦୀପଙ୍କ ନିକଟକୁ ନାଗାଲାଣ୍ଡ ସିଆରପିଏଫ୍ କଣ୍ଟ୍ରୋଲ ରୁମ୍ରୁ ଏକ ଫଟୋ ପଠାଇ ଚିହ୍ନିବା ପାଇଁ କୁହାଯାଇଥିଲା। ପ୍ରଦୀପ ନିଜ ଭାଇଙ୍କୁ ଚିହ୍ନିବା ପରେ ପ୍ରତାପଙ୍କ ମୃତ୍ୟୁ ସ୍ପଷ୍ଟ ହୋଇଥିଲା । ପ୍ରତାପଙ୍କୁ ଟଙ୍କା ପାଇଁ ଦୁର୍ବୃତ୍ତମାନେ ବିଳମ୍ବିତ ରାତିରେ ଆକ୍ରମଣ କରି ଟ୍ରେନ୍ରୁ ତଳକୁ ଫିଙ୍ଗି ଦେଇଥିବା ସନ୍ଦେହ କରାଯାଉଛି। ପ୍ରତାପ ଦେଢ ବର୍ଷ ପୂର୍ବରୁ ବିବାହ କରିଛନ୍ତି। ସେ ଟ୍ରେନ୍ ଧରିବା ପୂର୍ବରୁ ନିଜ ସ୍ତ୍ରୀଙ୍କ ସହିତ ଫୋନ୍ରେ କଥା ହୋଇଥିଲେ। କିଛି ଅସାମାଜିକ ଲୋକ ତାଙ୍କ ପିଛା କରୁଥିବା ଓ ଟ୍ରେନ୍ର ସେହି ବଗିକୁ ଉଠିଥିବା ପ୍ରତାପ ସ୍ତ୍ରୀଙ୍କୁ ଜଣାଇଥିଲେ। ଅନ୍ୟପକ୍ଷେ ପ୍ରତାପ ସାଙ୍ଗରେ ଧରି ଆସୁଥିବା କିଛି ବ୍ୟାଗ୍ ୪ ତାରିଖ ବାଙ୍ଗାଲୋର ଷ୍ଟେଶନରୁ ଜିଆରପିକୁ ମିଳିଛି। ପ୍ରତାପଙ୍କ ମୋବାଇଲ ୨ ତାରିଖ ପରଠାରୁ ବନ୍ଦ ରହିଛି। ତେଣୁ ପ୍ରତାପଙ୍କୁ ହତ୍ୟାକରି ଲମଟିଙ୍ଗ୍ ଷ୍ଟେଶନ ନିକଟରେ ଫିଙ୍ଗି ଦେଇଥିବା ପରିବାର ଲୋକେ ଅଭିଯୋଗ କରିବା ସହ ଏହାର ଉଚ୍ଚସ୍ତରୀୟ ତଦନ୍ତ କରି ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି।